ГьаIшдийна ракьамни технологиебышда асыр вобна. Манчин ыIмырни гыргыни сферабышис таIъсыр гьаъа водун. Манчин таIъсыр гьааъани ва оокIанни йишойквад багълыда. Къийнийни йигъыл’ ракьамни технологиебышди кумагыка арайлхъа тезе джуваббы, джитIан джумлебы хъадайли. Манчин вахтни ысрыфыс имкан гьооли.
Гьелбетти, арайлхъа хъадыйн гьар тезе кар ишлемишаъас аIхас ыккан. Бес ракьамни асыре цIаIхна миз’ ши наIгьабне гьалеб гьаракатейхъа абчес? КьоIбле вазна гьихъа Россиейни журналистаршини Союзни Дагъыстанни регионал шоIъбайн «Едина миз’ ракьамни асыре» конкурс эълан гьау. Манчина макьсад гьаIшдийни заманэй едини мизяаршини хайирыс ракьамни технологиебышике нени къайдайл’ истифада гьаъас фыкырбы ацIахьай вухьа.
Конкурсейхъа йицIынчиле гьеххан мани темайс ааидын ишбы хъады. Едини мизел’ хъыIгъаани кIазетбышди журналистарше къийнийни шарааитбышил’ иш гьихъа абкIынийниме нен тадбырбые къаджес ыккан джон фыкырбы увгьо. «Нур» кIазетни шоIъбайни редакторе Кьурбан Омаханове конкурсейхъа къаховуйни материале ракьамни асыре цIаIхна миз’ артмишавхьайниме нени усулбышикейий истифада гьаъас ыхьай аIтрафлыда джун фыкырбы агъмишау.
Конкурсын екунбы февральни 27-чил, Дагъыстанни журналистаршини чIакIынбыше СМИ-бышди эл’чершис Рамандини вузас къадсырыйни ифтаре ыккы. Мааъад Дагъыстанни маIълуматни ва чапни Агентствайни регьбере Арсен Юсупове, Россиейни журналистаршини Союзни Дагъыстанни регионал шоIъбайни садрэй МаIгьаммад Ибрагьимове, манкъуни маIъвыне, «Нур» кIазетни хааIрни редакторе Байрам АIбдуллаеве, «Этномедиахолдинг «Дагъыстан» ташкилатни хаIрынкъве АIгьмад МаIгьамаеве, республикайни теле-радио компаниебышди, кIазетбышдийий журналбышди чIакIынбыше иштыракау.
Маджлис М. Ибрагьимове ачмишавъу. Манкъве гыргынбы Рамандини вузаква табрикавъу ва ахъхаххъан сивар Аллагье кьабыляъанбыва увгьо. Хъийгъа манкъве конкурсын натийджебы агъмишау. Манкъуни джуваббышихъа гора, конкурсни жюрийн хъадыйни ишбышис ахтыйна кьиймат гьуво. ЦIеббыйна джига «Лезги газетни» хааIрни редакторни маIъвыне Куругъли ФерзаIлиеве авхъу. Манкъус шарафна грамота ва хьебцIал’ аазыр манат пылна гьуво. КьоIъэсди джигайс йишда гьамбаз, «Нур» кIазетни шоIъбайна редактор Кьурбан Омаханов лайикьра къаджы. Манкъус шарафна грамота ва къад аазыр гьуво. Хьебеъэсда джига агъулбышди «Вести Агула» кIазетни хааIрни редакторус Алёна МаIгьаммадовайс кьисматувхьа. МаIнкъыс шарафна грамота ва йицIыд аазыр манат гьуво.
Дагъыстанни журналистаршини хаIрынкъве конкурсын мукафатчер табрикавъу ва геледжагъылид угъурбы аIрзуламишаъу. Гойне М. Ибрагьимове ифтар тешкиляаъас хыл’авхъуйни Дагинформни регьберни мыIслягьатчийс Мурад МаIгьаммадкеримовус миннатдарийвалла агъмишавъу ва кисайс барака гьевленава увгьо.
Манкъуле гъайре конкурсе гъамувхьайнбы республикайни маIълуматни ва чапни Агентствайни регьбере А. Юсупове,журналистаршини гильдиейни Дагъыстанни шоIъбайни башчийе Гь. Сагитове, «Нур» кIазетни хааIрни редакторе Б. АIбдуллаеве табрикавъу.
Йишди редакциейни коллективын ишина гьамбаз Кьурбан маIъаллим заIгьматыс гьувойни ахтыйни кьийматука табрикаъа ва геледжагъылид югун-югун угъурбы аIрзаъа!
