Къийна сабара цIаIхбышди хиваршее джегьилерше фондбы ачмишау водунбы. Манчина  метлеб  хивни адын ишбы гьаъый, дареехъа гирхьуйни инсаныс кумаг гьувой вобна.

Садибни фондеехъа гьаарункъвее джуни кьул’пеенче гехьан пыл кечирмишаъа. Пыл сыкIылин садымее, ишбы къеджи. Садыйн пылбы няхъайий ишлемишаъа ва гьиджо ишбыйий гьаъа гыргынкъукIле ашкарда къеджен.Къийна гьаIракатыква Аттални, Калел’ни, Хьойикни, ЦIаIхни хиваршин фондбы ишлемишехьи водунбы. Сабара вахтна гьихъа, ши мани фондбышди чIакIынбышиква хъызаахийнбы. Манчини гьаIкIеедын маIълумат ши «НУР»  кIазете гьувойн.

Къийнад ман ишбы ыккекка водунбы. ШакIле ацIан, сабара сенбына гьихъа Сувал’ни маIгьалыл’на Калел’, джамаъат кочмишивхьа, кьаIра хъувхьа. Шаца хаIбна заIгьмат, хив меб тезелемишааъасдимее, калел’ни джамаъаIтын гьавъу. ЦIеддыйн аддым  гьаIракатыкван ыхьа. Джегьилершини ниятее кIылба-кIылба хив хъавъуй водун. Бабаюртгъанче, МаIгьачкъалеенче манбы гьабкIын хивын горханабы гьаIсареехъа сау, йаIхъ-кьыIт хъау, инсан ешемишхьесын вагон гиххьы. Са уIлджимна манбы мааъаб ишлемишивхьа, анджах ишбы быкыраъас гёгъыйбыше инкам гьувы деш. Гьайни сен калел’бышди джаIмаъатын Бабаюртни бинабышиле махъа ейлагъыс чаврабышин наIхир хъыккы. ГьаIшде манбы сувал’ ухьийхьан водунбы. Ин ша Аллагь, цувылийс  манчин чуры саъасын.

Гьайни сен июльни вуза меб Сувал’ни Калел’хъа ишбы гьаъас  хивын джамаъаIт гьадкIын. Гьинче манбыше шахъа машнека  быкырын юк каран ыккы. Манбыше ахуйн някьбы сетIкайква гьаIррамеехъа алеетIу . Манбышди фыкрее водун са-кьоIдле хав гьалекийс аляуй, поштина йаIхъ цIыцIавъуй, токIан иших хъадый ва гармабы аляуй.

Ши мааъаб ишлемишивхьайни джаIмаъаIтыкле сагъул-варул эйгьи, заIгьматбы хайирысынбы ихьенбыва эйгьи. Аллагье вушда иш сибыкхъааъана!