Январьни йицIымоледчил’ ДДПУ-ни иджласбы илгъечIени утагъее форум «Агъулна миз’: гьувааджий ва артымишавъуй» илгъечIу. Мани маджлисее ДДПУ-ни ректоре Нариман Асварове, ДР-ни миллет сиясатни ва динни ишбышди министре Энрик Муслимове, ааIли мактаббышди ааIлимарше, агъулни мизени маъаIллимарше, журналистарше, артистарше ва ДДПУ-ни телябабыше иштцырак гьаы.
Мана, агъулни мизес къабсырна маджлис, ДДПУ-ни агъулни мизен дарсбы гьелени ааIлиме Нариман Исрафилове вукку.
Анджах мани маджлисее Дагъыстанни хъаIдхъийни ва ыIлимни министкрствайн, Дагъыстанни ыIлим ахтармишааъани институтын (ДНИИП им. А.А. Тахо-Годи ), Дагъыстанни маъаIллимаршина дараджа ахтыхъани институтын ( ДИРО) регьберар ваяхуд эл’чера еший. Няъас девхьай мааъаб, манчина сабабыб ваацIа деш.
Форумна иш гивийгъвлвнкъаI, Н. Исрафилове агъулни мизекен ва адабиятыкен маIълумат гьуво . Манкъве къийна гьиджо дагъамивал’бый мизени сардан вод, маджлисеехъа сабыйнбышис ашкарау. Н. Исрафилове увгьойн: «..Ши едина миз’ гьувааджес чалышмишивхьес вуккан. Мана миллетна наххварий вобна, манчеенчин миллетын оIт’мишхьайн, гьаIшдийн, хъалесын таарых гьагва….»
Гойне саламыква къаршламишааъан чыхышбы университетни ректоре Н. Асварове, министре Муслимов гьау.
Манбыше форумни ишис кьуват гивхьу ва джо хыл’ авхъас гьазирба вобунбыва увгьо.
КIоран, вааджибын, марахыкван чыхыше ДДУ-ни профессоре, агьулни мизени дагъайдни сыныфбышди китаббышди авторе Салминат ГьаIсановае гьаы.
МаIнкъее джени чыхышее увгьойн: «..5 сенна гьихъа гьаIйнягьдын форум гьайни майдама илгъечIу. Манке ши нягьаIбий миз гьувааджес, гьиджо ишбыйи къаджес ыккан мислягьаIтбыний къадже. Анджах, манчина саджаб мисалла гьаIллавъу деш. Гыргын мисалабы кагъызеле ооъад аху. Къийнад агъулбышди ушахаршихъад китаббы дешинбы. Дагъайдни сыныфбышисын китаббы гьазирауйнбы, анджах манбы нении сабабыхъа горамы къекка деш. ГьаIмагьабна джаб вазият цIаIхни, рутулни мизени китаббышиква багълыба вобна. Медни мизяаршикен китаббы къекканбы, анджах йишди хьебни мизяаршини китаббышис йаIхъ гьооли деш. Мана иш быкыравъуй ДР хъаIдхъийни ва ыIлимни министерствайн бордж ва саIгьф водун. Агар чапысын пыл къайикке, ман китаббышин рукописьбы МаскIав гьазирда водунбы…»
Мани форуме маIълуматыкван чыхыш агъулни мизелин теле-радио верлишбы ыккеккани журналисте ГьаIджий Алхасове гьау. Манкъвее нягьаIбый агъулна миз’ гьувааджес ва артымишааъас джун мислягьаIтбы гьувы.
