АIрайле кьоIдле сен илгъечIу, коронавирусни чIырвалин хыл’ ил’дебатIан. Мани эзерын аазырбышиква инсанар гьайни дюнйейле вуккы. Манбышди аIрее йишин делесинбыб, гогьарбыб вухьайнбы.

АIхреени вахтал’ ыккыйни профилактик ишбышихъа гора,  гьауйни вакцинабышихъа гора мана чIырывалла кIыл’хъоохьи гибгъыл.  ГьаIшде чIырыхъоохьенбышин сай кIылхъехьи водун. Больницеехъа гябакIанбышиле, хъувабакканбы хаIбба вобунбы. Мани ишее хаIбна заIгьмат дохтураршина, медсестрабышда, фельдшераршина, волонтёраршина вобна. ХаIм-йигъ манбыше гьаIракатауйн оIги ыIхас. Коронавирусыке гьабатIан дохтурарыб кIылба деш вухьа. Анджах манбышди гыргынбыше джон Гиппократын кIын быкырауйн. Гьел’бедти, манчин оIги даянмишаъасдимее, хаIдда кьадагъабы гиххьы. Масалан, хаIбба инсанар сабайлен джигабы: банкетный залбы, ушахаршин мактаббы, телябабышин колледжбы, техникумбы, институтбы, университетбы, кинобы гьагван утагъбы, чIакIын маджлисбы илгъечIен джигабы  утIумауйнбы. Сабара вахтна манзикбышеейид садибын уIл’джуман кубар гьаъас инсанар гьавайкIан вухьа деш. ХаIдданани джигабышеехъа  Q-кодбы дена, маскIабы дена къоокка вухьа деш. Къийнад кьадагъабы медни оIлкабышилхъа гьабкIынийкван, мейид водунбы. Машинбышиква махъа вуIххъас вааIха деш. Саджу махъа самолетбышиква илеебахха.

ГьаIшде сыкIылда ман къадагъабы, вазият юг хъоохьи  горайхъа,  Роспотребнадзорни мислягьаIтыква, боше хъаъа водунбы. Масалан, гыргыни мактаббышее, кооледжбышее, университетбышее дарсбы дистанционныда деш, гьаммашийнбы хьинне аIлгъаа водунбы. Манчиле гъайре, ушахарше рагьаIт алятIан клуббы, спортын утагъбы, чIарбы хъаъан джигабы ва медынбы ишлемишехьи гидгъыл. ГьаIшде Q-кодбы дена ивийкарас воохьенбы. Анджах, маскIабышее джамаъаIтнани джигее ивийкырий ва вахтале-вахталхъа дизtнфекцие гьауй мейид водун.