Сабара йигъбышиле, июльни 9-чил’, дюнйейл’ни мусурманаршини уммайн Кьурбанын ХаIдын йигъ шадда, шугьлетыква алгъагьас. Ман байрам хьебыдле йигъна цIыцIахьи.
Кьурбанни Хаlдни йигъбышди гьийб гьар сен гьаIдж къил’мишааъа. Гьайни сен гьаIдж къил’мишааъас гьаIбкIынийнбышди аIрее йишди миллетын чубабыйий йичибыб вобунбы. Ин ша Аллаг, манбы сагъба-саламатба джон бордж хъувы хъавалесынбы. Манбышин сабарабы Сулейман Керимовни харджийква гьабкIын. Садибба Дагъыстанеенче гьаIджилхъа 5 аазыр инсан гьаркIын.
Кьурбанын ХаIдын йигъ мусурманаршин , Рамандин ХаIдын йигъ хьинне, хаIдын байрам водун. Ман йигъ Аллагье йишди диныс ыlбаадат гьаъани уммайлхъа къахову. Ман байрам Рамандини Хаlдни йигъыле хъийгъа йигlцlал’ йигъ илгъечIуйле хъадайли. Кьурбанни ХаIдни йигъыле гьихъа ХаIбна хаIм алгъаагьа. Инсанар джони гогьарбышди горханабышилхъа гьавайкIан. РыIгьбышис югда ихьеджинва доъаI хъаIббаххъа, садакьа гьели. ХаIбни хаIмде Кьуръан хъаIбаххъа. КьоIдъэсди йигъыл’, мичIееб, хаIдын гиджаIрахыйбы алеетIу манзикехъа гьавайкIан. ХаIдни йигъын кубара мааъад гьаъа. Манчиле хъийгъа, Кьурбанбы гяатIа гивийгъал. Мана эн хаIбна фарзыква барабарна сунна вобна. Гёокlана гьаIйваныб сагъна, уфтанна вухьес вуккан. ЧIырына, ха- сийна гьаIйван Кьурбаныс гивкIас гёохьа деш. Исламни диней одкIунийхъа гора, Кьурбанын Хаlдын йигъ гьале инчиле аазыр сенбына гьихъа алгъайгьи гидгъыл. Манке Аллагье, джулхъан инам ацlахьесдимее ва тасдикьаъасдимее, Ибрагьам пейгъанбарыс джуна дих Кьурбанна гикIас амыр гьуво. Мана Ибрагьам пейгъанбарна тек са дих ыхьа. Манчихъа ил’дяккы, Ибрагьам пейгъанбар манкъуни джувабеенче хъигъечIу деш. Ибрагьам пейгъанбар мичIейр чакра сугъоцу, аIмалейс алугъ ыIхы, гьаагуйни сувалхъа, сафарийейхъа хъигъечIи. Хьебыдъэсди йигъыл’ мана дих Кьурбанна къарсыл’ни джигейхъа гьийхьар. АIмалейий къулар мааъаб гьавайсар. Манкъве къуларшикIле эйгье: «Шу гьиняаъаб илёозре, зы духайква зияратылхъа илхъебчIы, ыIбаадат гьау савкIааласынбы. Сувал’ни зияратылхъа, алхъааIнкъа, духее деккике хъийгIан: «Ши зияратылхъа алхъааIнбы, нявхьа бес йишда Кьурбанна давар?» Ибрагьиам пейгъанбарее саркIыл’ духайкIле эйгье: «Аллагье Кьурбаныс, йизда гыранна дих, гъу къарсыл’ ворна». Мана гаф вухьайле хъийгъа, манбы кьурбан гивкIасди зияратылхъа хъавайле. Мааъаб уджагъ хъаагьа. Ибрагьам пейгъанбаре духайн къел’-хыл’ айтIыл, гикIас гьазираъа. ЧIика алеетIу, дих гикIасда хыл’ сугъоцаъа. Гарданылхъа чIикIа гиххьыйнкъаI, аIршеле Аллагьни маляаикын сес хъайли: «Духайлхъа Кьурбанна гикIас хыл’ ил’мабатIа. Мана селлим гьеъэ. ГьаIшде Аллагье валхъа гьаIкIен инам гьаъан, гъу манкъуна йаIхъ авхъуна динэгьлий ворнава. Гьин ихтилет къайиххьы, Ибрагьам пейгъанбаре вукIул’ сугъооцааъа. Джуни йыкьаIл’ гачбышиквана къарг къооджи. Духайни эвезее мана гёокIа. Мани гьаIдисайле хъийгъа, сенис имкан вобни мусурманерше Кьурбаныс давар гёоокIа.
Къийнад гыргыни мусурманарше ман байрам хаIдни шадлыгъ- бышиква алгъайгьи. Мани йигъыл’ инсанарше садакьайс гивкlуйни гьаIйванни чуруныке джурабаджура дадакван хорагбы хъойхьар. Баракайс абыйнбышис ман охьанаъа. Кьурбанни хаIдни йигъын инсанар сана-санкъуква гьалеб делес хъааъа. Джони аIрейдын мугьуIб гьеххаъа. Симысынбы барышмишааъа.
АIзизын ва гыранын чубабы, йичибы! Шу гыргыба Кьурбанни ХаIдни йигъыква табрикааъа! Гьасре гьар мусурманийни хааъад болваллайий шадвалла вухьеджин. Шос джанана сагъвалла, йикIена шадвалла гьевлена! Шу садакьайс гятIасын Кьурбанбы Аллагье кьабыл’ гьаъанбы! Гьаарункъуни йикIеежын хаирыкван ниятбы быкырхьенбы!
