Инсанни ыIмрее хъаIдхъийн йыIкьненкна джига авхъаахъа. Манчис ши нягьаIбе фыкыр гьуво геледжагъыл’ ашкарехьен.
Халкьни арайл’ эйгьен: «ХъаIдхъас ненкеджад геджда дешодун». Энки хаIбна дагъамийвалла танбалыйвалла вобна. ОIлкайн къийнийн ва къийхъийн йигъ ацIааликвани, камалукани санаъаIткаршике аIслыда.
Совет гьуIкуматни вахтал’ хъаIдхъийс еттыгъна фагьам гьооли вухьа. Манчини аллад советни хъаIдхъийква барабарын дешдий. Мани девырее инсан гьар сураке девлетни къайгъвений эйхьена.
СССР донан оIлка гьыIгъадкырийн 31 сен водун. Манчика саджигее кIыл’ба – кIыл’ба хъаIдхъийна системайиб «хъивийшал» гибгъыл. МаIгьадни гьаракатбышиква маъаIллимни санаъаIтна кьиймат са кIапIекIылхъа къаъавгьу. Хаариджийни оIлкабышехъан дарвазабы ачмишауйка, ши шахъад водни югни карбышикеб хыл’ алябтIуна. ГьуIкуматни вукIлелинбыше хаариджийн гиур– сугъоцый, хъаIдхъий халкьыке хъидгIындена маджбыраъа ыхьа. ГьаIшде шакIле къедженки, Болонна система йишди хъаIдхъийниме хайирысда деш, кIоран гов гьадсырийна зиянысда система вухьа.
ЦIахбы гьар–гьаммаше хъаIдхъийлхъа аIшкьнан халкь ыхьа. Эгьес эйхьи, ман йишди эбее водун. Гьин джуваббы кIыл’ни миллетыке хъигъебчIуйни ахтыйни дараджайквани хаIббанани ааIлимарше, дохтурарше, хивни тасарруфатни ишчерше, медни пешебышди санаIъаткарарше субутаъан. Ман насылыле насылылхъа, архайле архайлхъа илгъечIен лышан водун. ГьаIшдийн геллесын джегьилерыб мани гьаIкIени йаххъыIл’ аIлгьаа, миллетын до ахты хъаъас чалышмышоохьи.
Июльни 12-чил Дагъыстанни девлет университете аIълада хъаIдхъийни телебабышис чIаIран дипломбы гьувойс къабсырна маджлис вухьа. 2022 сен мани аали мактабни чIаIрани дипломбышис 558 джегьилер лайикьба къавджу. Гьайни сен университет 3852 инсане быкрау.
ДДУ-ни ректорни МуртазаIлий Рабадановни увгьойка, илгъечIуйн хъаIдхъийн сен раIгьатын ыхьа деш, манчихъа ил’дяакы ши гыргыни карбышди ыIгьтейнче хъабыйнбы.
Манкъуни джуваббышихъа гора, къийнийни йигъыл’ йишда иш югни ацIааликван санаIъаткарар гьазиравъуйка быкыроохьи дешда, гьаIшдийни оIлкайни абни ва къабни вазиятын Ватанылхъа джан гёйхьанан, аIкьни йикIекван, тербиейкван, йаIгь–ламысыкван джаванар чIакIы хъавъуй гозетяаъа.
Дагъыстан девлет университетни ректорни профессор М. Рабадановни хыленче чIаIрана диплом алебтIуна сайир юридический факультет таамауна калеллий Микаилов Рауф АIлийна дих ыхьа.
Рауфе маIгьачкъалайн №29 йыIкьнекин мактаб быкрау. Мактабе хъаIдаххъанкъаджад манкъухъад гуманитарни предметбышилхъан гьавас ыхьа. Манчини аллар мана шагьарни, республикайни олимпиадабышее таарыхни, английский мизени предметбышкена иштыракчий ыхьа ва мааъад ахтыйн джигабы аххъы.
Джегьил’ни увгьойка, джус мактабе къизлен медал алятIас кьисмат дехьайн ва кьоIъэс пышман дехьайниме, аали мактабейхъа иккечIуйни цIеддыйни йигъыке университет чIаIрани дипломыква быкраъасынва макьсад гивхьу. Манкъве гьувойн джуваб аххъыйн.
Рауфни джуваббышихъа гора, бакалаврна диплом алябтIуйка джун хъаIдхъий чIаIвехьи дешодун. Юриспруденциейна гьаIкIена санаIъаткар ыхьайниме магистратура быкраъас ыккан.
Дагъуниверситетни чIаIран дипломбы гьувойс къабсырыйни маджлисни аIхрее джуваб аали мактаб таамауйнбышис гьуво. Джуни чыхышее Рауф Микаилове увгьойн: «Университете алгъавгьуйн ёкьудле сен са йигъ хьинне адкIын. Мани манзилее шу шаква хил’дже йаIхъ гьобгьур, хаIдданан шас башта гьау. Ши ман заIгьматбы ненкеджад кIелиханаъас деш. Зас юридический факультет таамауйни джегьилершини доюле шос, аIзизын маIъаллимар, миннатдарийвалла агъмишааъас вуккан. Гьасре геледжагъыл’ шохъаб шалеб югун телебабы вухьенбы!».
Шинад Рауф Микаиловыс геледжагъыл’ угъурбы аIрзаъа, йикIеедын гыргын мураадбы быкырхьенбыва эйгьи. Манкъука саджигее цIаIхбышин джегьилер аали мактаббы быкрауйка табрикааъа, шосуд югун гьелен!
