Декабрьни 2-чил’, МаскIавни шагьарни Мигьманршини магьаIлле (Гостевой двор) « Миллетбышин каамыл’ фыкырбы» антологиейн презентацие илгъечIу.
Мани маджлисеехъа Россиейни гьарджура республикабышенче, вилаетбышиле, шагьарбышеенче доюкан язычер, шааирар, ааIлимар, фольклористар ва адабиятын танкьитчер абы.
Мани йигъбышее Мигьманаршини магьаIллее китаббышин гьагуй илгъечIу. Тезеда хъигъечIуйни китаббышин презентациебы илгъечIесдимее, майдамбы къурмишау.
«Миллетбышин каамыл’ фыкырбы» антологиейн презентацие 1- ни майдама ыхьа.
2017-ъэсди сен Россияйни Правительствайни кьарарыква « Программа поддержки национальных литератур народов России» кьабылявъу. Манчина метлеб вухьана Россиейл’ ешемишехьени миллетбышин адабиятбы, маданиятбы, языбы гьуваджий ва гьаIракатеехъа хъаляуй. Гьамани джад сен цIеддыйн антологиейн том «Поэзия» чапыке МаскIав хъигъечIу. Манчеехъа цIаIхбышди шааирын Валегь Гьамзатын шечIбы гядкIу. ЦIаIхни поэзиейни гьаIкIеедын маIълумат зы, Кьурбан Омаханове гьувы. Мани китабын Россиейл’ 2017 сен чапыке къайиккыйни китаббышди аIрее 1 джига конкурсе авхъу. Манчис ахтыйна кьиймат Россиейни Президенте Владимир Путине гьуво. 2018-ъэсди сен кьоIдъэсын том « Детская литература» хъигъечIу. Мани томеейид йишди шааираршин асарбы водунбы. 2019 –ъэсди сен хьебдъэсын том « Проза» чапыке хъигъечIу. Манчеехъа Кь. Омахановыний Х. Назировайн асарбы гядкIу. 2020 ёкьудъэсын том «Драматургия» чапыке хъигъечIу. Махъа цIаIхни адабиятын асарбы гядкIу деш. 2021 сен хьодъэсын том « Художественная публицистика» чапыке хъигъечIу. 2022 сеныд йихьыдъэсын том «Народные мудрости» чапыке хъигъечIу. Мани томеехъа профессор Гь. Ибрагьимове, язычее Кь.Омаханове, ааIлиме М. ГьаIсановае, маъаIллиме М. Шамхалове, ДДУ-ни телябабыше сауйн месалабыйий гьаIракийбы (пословицы и поговорки) гядкIу.
Ман гыргын антологиейн томбы Россияйни ва хаариджи оIлкабышди китабханабышее водунбы. Манчини гьаарынчихъад электрон вариант водун. Йихьыдсана антологиейн томбы хаариджи мизяршилхъа сакIалау.
АIхреедын том шенсанчике джурахьен, няъас увгьее манчина автор – миллет’. Шениса антологиебышеехъан асарбы ва макьалебы авторарше одкIун.
«Народные мудрости» антологиехъа 65 Россиейни миллетбышди мизяаршин 14 аазыр текстбы гядкIу. Манчини аIрее ойкIанан язы дешди миллетбышин текстбыд водунбы.
Маджлисеехъа абыйни мигьманаршини аIрее чIакIын къуллухчера, язычер, фольклористар, типографиебышин ишчера, адабиятын танкьитчер, журналистар ва мебынбы вухьа.
Презентацие иштырак гьаъас Дагъыстанеенче язычий, журналист Кь. Омаханов, ДДУ-на ааIлим М. ГьаIсанова, татаршина шааир П. Мишиев хъобтIул.
Маджлис проектни хааIрни редакторе Максим Амелине ачухавъу.
М. Амелинни увгьойка, гьийд къайиккыйни антологиейни томбышее хаIдда месалабы, гьаIракийбы, фразеологизмабы хъызаххы. Ши мислягьаIтеехъа хъабыйнбы , манчин том джурайда чапыке къайиккас. Ши тезе дюнйе ачмишау шас. Гьар миллетыхъад джос ааидын, джони ешайишиква алаакьан фыкырбы вод. Сабара месалабы ва гьаIракийбы акаранбыд хъызахханбы. Масалан, зы цIаIхбышди , рутулбышди месалабыше марахламишау.
Гойне маджлис вуккекани модераторе абыйни мигьманаршис чыхышбы гьаъас хааишау.
Зы йишди миллетни таарыхни, мизени, ешайишни, адабиятни гьаIкIеедын чыхыш гьау ва гьиджо дагъамийвал’бышиквайий щи растына хъабайли увгьы.
Йишди чыхышиле хъийгъа, М. Амелине увгьойн: «Ши цIаIхбышди шааираршини, язычершини, публицистаршини асарбышиква дёлессе танышба вобунбы. Са зыджад деш, доюкани адабиятни устадарше вушди ишис кьиймат гьооли. Сабара вушин макьалебы йишди мислягьаIтыква РФ-ни адабиятни журналбыше ва кIазетбыше чапаъа водунбы. Сабара вахтна гьихъа «Санкт-Петербург «Аврора» журнале вушда макьалее Валегь Гьамзаевни поэзиейни гьаIкIеена хъигъевчIу. Мани шааирын асарбы засыд кьабылехьенбы. ГьаIшде цIаIхни миллетни ва адабиятни гьаIкIее садджу Дагъыстанееджад деш ацIахьес, Россияйлид, хаариджий оIлкабышилид ацIахьесын. Шос мани ишее угъурбы зы аIрзуламишаъа».
Мани маджлисе дагъыстанни адабиятни гьаIкIеедын чыхышбы М. ГьаIсановае, П. Мишиеве гьаы. Манбышиле гъайре марахыкван чыхышбы Якутиенче, Карелиейнче, Ямалыле, Таймырыле ва медни вилаетбышиле абыйни мигьманарше гьау.
Маджлисни аIхрее абыйни мигьманаршис пайбы гьувы, фото- видео-сессия илгъечIу. Презентациейн екунбы ресторане ыккы. Мааъаб мигьманар сана-санкъуква танышивхьа.
