СанаъаIтбышее энки ахтына дараджа, маъаIллимийвалиc гьевлес вуккан, няъас увгье маъаIллимийвалла гьавъуй вахарийн кар дешодун, гойнед инсане цIетдыйн тербие, ацIал’ мактабее алятIа ва манчина сабабкар маъаIллим ворна.
Зы гьаммаше ахтына кьиймат йишди маъаIллимаршис гьуво ва гьооли вобна, манбы йишди миллетин интеллигенция водун.
Манбышди джаргее Мишлешни мактабее ишлемишехьена СаидгьаIсанов Адам МагьаIммадна дихыр ворна. Гьайни йыгъбышее Адам маъаIллимын 70-л’ сен быкырхьа ва манчин, эгьес эйхьи, 50-л’ сен маъаIлимийвалис манкъвее къадсыр.
Адам СаидгьаIсанов едике 1953-ъэсди сен июнни 10-че Рутул районни Мишлешни хивее колхозчийни хизане едике ыхьа. Мишлешин йыIкьнекин мактаб таамау мана эскерейхъа аркIын. Эскерийвалла гьавъу хъарийле хъийгъа, Дагъыстанни девлет университетни (ДГУ) биологиейни факультетейхъа иккечIу. Мааъар мана югда хъаIдаххъаIна телеба ыхьа ва мааъад комсомолни сураке къеджени ишбышее хаIдын иштиракаъа ыхьа. Университет таамгьауйле хъийгъа, мана Мишлешни мактабее биологиейн ва химиейн дарсбы гьели гиргъыл’ ва къийнийни йыгъылхъамее мааъар ишлемишехьи ворна.
Сен-сениле манкъвее ушахаршини, мактабни коллективни гьийб гьуIрмат къазанмышааъа вухьа ва мактабее къеджени ишбышее дирибашийвалла гьаагва вухьа. Дирибашийвалла Адам маъаIллиме вуджее гьелени дарсбышейиб гьаагва вуха. Биологиейни ва химиейни дарсбышин усулбы ушахаршилхъа рагьаIтда гьихьарасдимее манкъвее чис аидын методика гьазираъа ыхьа. Гьар сен мани мактабни ушахарше биологиейке ва химиейке ахтйын кьийматбы аляатIа ыхьа ва манбы институтбышейхъа ва техникомбышейхъа иккебачIи вухьа ва джоке югун санаъаIткарар хъигъебчIу.
Адам CаидгьаIсанове къооджена иш районни, республикайни чакIынбышикIле къооджи вухьа ва манчихъа гора, мана Мишлешни мактабыс къоIни элейс директорна сечмишаъу. Манкъвее мактабыс хаIбвалла гьаъанкъаI манчин инкишааф югда ихьесдимее хаIдда ишбы къаджы. Масалан, мактаб ремонт гьаъас конкурсее миллйон пулын алятIу, ва вуджейид Президентын Грант алетIу. Эгьес эйхьи, Адам СаидгьаIсанов Мишлешни мактабни коллективее джар деш, гыргыни йыхъбышди маъаIллимаршди аIрее геер гьуIрматнана ва афтаритетыквана маъаIллим ворна.
Къавджейни ишыхъа гора, А. СаидгьаIсанов РФ-ни, РД-ни хъаIдхъийни министерствабышди сураке грамотабышис, дипломбышис лайикьау. Мана «Отличник образования РД», «Отличник образования РФ», «Заслуженный учитель РД» ворна.
Адам маъаIллим хивни, районни, йишди миллетни балей ахвана инсан ворна, няъас увгьое манкуъни джувабылхъа хаIббананбыше кIыры гьели ва джука мислягьаIт къооджи. Мана йишди кIазетни Редакционный Советна уIзви ворна ва мани Совете миллетыс аидни ишбышди гьаIкIее гаф вуккейканкъаI, манкъуква сабара карбышее мислягьаIт къооджи.
Адам маъалимыхъаб уфтанна, мегьрибан хизан вобна. Манкъвее джуни хьунащейква екьуйре дих хаIбхъавъу ва манбышис югун тербие гьуво.
Ши, цIаIхбы (йихъбы), гьаммаше йишди саватыквани, камалыквани, абырыквани маъаIллимаршиле гуянмишувхьес вуккан. Къийнийни йигъылиб мактабе, аали мактаббышее миллетын, республикайн, оIлкайн до ахты хъаъан маъаIллимар кIыл’ба дешобунбы. Ши манбышда даража ахтыба гьувааджес вуккан.
P.S. «НУР» кIазетни ишчерше Адам маъаIллим джуни юбилейква тебрикаъа ва джус хыллийна ыIмыIр, джанана сагъвалла ва йикIена шадвалла арузаламишааъа!
