Къийнийни йигъыл’ Россиейни авхуйни миллетбышди игитершиква саджигее цIаIхни халкьни джаванршед СВО хаIдын иштырак гьаъа. Манбыше йишда хаIбна Ватан Украине сабыйни миллетчершике азадааъа. Манбышди хаIббананбышди гьаIкIее ши «Нур» кIазете макьалабы гьувойнбы. Къийна йишда гаф Тюбее ешемишоохьени кьаIгьраман чубабышди Тарланый Таджидин АIгьмадоваршини гьаIкIее вухьес.
Манбышда кок Мишлешни хивейнчена вобна. Джегьилершини деккейи едее, Уруджейи Хадижате, Тюбей юрд абчына хаIдда сенбы водунбы. Манбыше джони гювъур-сугъооцыйква, арыйни мигьманыс гьагвани къайгъыйква хаIбна гьуIрмат къазанмишавъу. Джон ушахарыб деккиныйий ед’ни йаIххъын абкIын.
Урудж чоджейий Хадижат баджей хьебыйре дих чIаIкIы хъавъу. Манбышис тербие цIаIхни халкьыс аваакьыйн тербие гьуво, манбы хизанбышин сагьибар гьавъу.ГьаIшде манбышеджон ушахар хаIбхъааъа. Деккейий едей ушахаршис гьувойни тербиейни аIрайл’ кьомана джига ватанпарварийвалийн авхъу.
АIгьмадоваршини хизанее Тарлан хааIрна, Таджидин йыIкьнекна дих ворна. Манбыше джони ыIмрена йаIхъ ис эскерни пешейс къабсыр. Тарлан 2023-ъэсди сенни декабрьни вузаке Донецк Республикайни миллетбышди гвардиейна эскер ворна. Таджидин Нижегородни вилаетни миллетбышди гвардиейна эскер ворна. Манбышда кьоIйирсана СВО иштыракчер вобунбы.
Чубабышди кьоIнкъвее къийна игитерше хьинне Ватанни гьийдын джон бордж хъели. Манбыше джони командирарше гьагуйни саягъыл’ джомардба тезеда Россиейлхъа аликкыйни регионбышее вурушбы ыккекка, шагьарбыйий районбы миллетчершике аазадаъа. Чубабыше гьагуйни игитийвалис, манбышди дирибашийвалис гьокуIматын хаIдданани таIрифбышисий медалбышис лайикьба къавджу.
Урудж АIгьмадовни увгьойка, гадебы шаке акьаIнаба вухьейиб, гьар уIл’джумее хаахъа зегбы гьаъанбы. Манбыше йишин хъидгIынбы гьаъанбы. Шинаб джона вазият вацIоохьена. Манбыше нишикенджаб зигаара гьааъа деш. Гадебышихъаб кеситийвалла дешда. Одхьунийид, илёдгъыйид, аляаъасын палтарыд гьеххааликва водунва, -манбыше эйгьи.
Ушахар эскерийвалейнкъаI хаIдда хаджалат едярше цIыцIаъа. Манбы хаIм-йигъна фыкырее воохьи. Ушахаршини балее аахва. Хадижат баджийкIле, эскераршина ед’ йихьайхъа гора, гыргын ман карбы югда ацIа. МаIнкъе эйгьен, къийна зы хьиннен россиейни акьвал’ аазырбышиква инсанар вобунбы. Манбышеб джони СВО воохьени ушахаршда йаIхъ гозетяаъа. Садджу сагъвалла вухьена. Гыргынбышин СВО воохьен духйе сагъба, саламатба хайбышейхъа савкIалас кьисматаъан.
Духйе эскерейнче садджу декей едей джаб деш, манбышди ушахаршеб, делесынбышеб гозетяаъанбы. Манбышин уллеббы гьаммаше йаIххъыл’ водунбы. ГьаIшде са насыл, нейид са хизан дешда манбышин делесынбы СВО дешин. Манбышед СВО экIда таамхьесдимее, гьар йигъыс дилягбы гьеххъа.
Йишда иш гьаIкIена вобна. Россиейн авхъуна йаIхъыб гьаIкIена вобна. СВО таамхьесын. Ши гьаIкIени йаIххъыл’ вухьай дюнйейс ацIаал’ гьаъасын. ДаIвъий таамувхьа, маа иштыракаъан эскерар сагъба-саламатба хайбышейхъа савкаIаланбы!
