АIхырейни вахтал’ джони хаишиква СВО вуххъаIнбышин сай хаIдхъыхьа. Джаванарше хаIнни иштагьайква контрактбы ойкIан. Гьайни йигъбышее сайид мани саягъылидин контракт Этномедиахолдинг «Дагъыстан» ташкилатни ишчее АIли ГьыIсейнове одкIун.

АIли ГьыIсейнов СВО джуни хаишиква Ватан къорамишааъасдимее ооIххъаI. Мана Этномедиахолдинг «Дагъыстан» ташкилатее редакциебышее ишлемишехьени транспортыхъа илякка. Манкъве гьааъани ишихъа ил’дяккы, СВО воохьени эскераршини джаргейхъа илёзарасди кьарарейхъа хъары. Къийна манкъуни гьамбазаршини, дёлесинбышди, ваацIанбышди аIрайл’ СВО иштыракааъанбы кIылба дешинбы. Манбышда геллесда СВО гидгъылни цIеддыйни йигъыле мааъаб вобунбы. Къийна манбыше адамейрше хьинне джомардба Ватанни гьийд бордж хъели. Манбы йишди хаIнни оIлкайна садибийвалла гьувааджес чалышмишоохьи. АIлийир манбышик акар ихьес ыккан. Манкъве гьамбазаршиква санад гыргыда джони гьийд водун мисалабы аIхырейхъамее быкыраъасди фыкрее ворна.
АIлийни гьаIракатыс ахтына кьиймат гьооленкъаI республикайни чапныйий маIълуматни Агентствайни хаIрынкъуни кумагчее Аслудин МагьаIммадове увгьойн: «Джони гьаIракатыква дагъыстанлыбыше СВО воохьени эскераршис Ватанылхъан аIшкь гьагва. ШакIле ацIан, 1999-ъэсди сен Дагъыстаныс, Россиейс сибыкын хъады деш. Манке ши йишин гьунар, такьат гьагуйн. Дагъыстан азгъунувхьайни банддестебышике темизявъуна. АIлее Ватанни гьийдын бордж хъеленкъаI, ши манкъуни аилейс кумаг гьагвасын.
Этномедиахолдинг «Дагъыстан» ташкилатни хаIрынкъве Арсен Юсупове джуни ихтилете увгьойн: «Къийна АIли ГьыIсейнове СВО оххъаIс гьаIзирхьайква, джуна ватанпарварийвалла, Ватанылхъа водун мугьуIб гьагва. АIлий хьиннени игитерше Дагъыстанын, йишди хаIнни оIлкайн до, дараджа ахтыхъаъа. Манбышди гьаIракатын, авхуйнбыб джок’ акар вухьес хъоотIал».
Маныд эгьес, къийна республикее гьаракатыква СВО вуххъаIс гьаIзирувхьайнбыше контрак ойкIан. Контракт одкIунийнбышис регионын са милйон манат пылын гьели. Манбы 500 000 республикайн, 400 000 федерал хазнейче, 100 000 муниципалетбышин гьелен кумаг водун.