МаIгьачкъале, Дагъыстанни девлет университете, октябрьни 24-25 чил’ ааIлим Рамазан ГьуIсейновни 90 сенни едигарыс къадсырыйн IХ Быкырроссиейн ыIлим-практик конференцие «Актуальные проблемы лингивистики» илгъечIу.
Мани ыIлимни конференциее иштыракаъас МаскIавгъанче, Санкт- Петербургъанче, Архангельскенче ва медни Россиейни регионбышеенче ааIлимар, джун ишин гьамбазар сабы. Манбышиле гъайре, хаариджий оIлкабышиле: Мексикенче, Алжиргъанче ааIлимар-лингивистар абы.
ГьуIсейнов Рамазан Ибрагьимна дих едике Рутул районни ДжинаIгъни хивее едике ыхьа. Манкъвее джуна ыIмыр лингивистикайни ыIлимыс къабсыр. Манчина хаIббанана вахт ДДУ-ни хаариджий мизяаршини факультетыква алаакьаба вухьа.
1964 сен Рамазан маъаIллиме кандидатна диссертация: «История развития моделей глаголов по способам образования личных неаналитических форм времени в английском языке» мудафия гьавъу. Гойне, 1988 сен манкъвее докторни ыIлимна диссертация: «Диахрония полевой структуры части речи». Мана кьоIйибсана ыIлимна иш инглисни мизеква багълыбанана вухьа. Университете ишлемишехьенкъаI хаIдданан сенбына манкъвее инглисни мизени кафедрайс хаIбвалла гьавъу, ваIшбышиква телябабы къавуккы, ыIлимын китаббы одкIун.
Конференциейна иш гивийгъаланкъаI, ДДУ-ни ректоре МуртазаIли Рабаданове абыйн мигьманар саламыква къаршламишавъуйле хъийгъа, джуни чыхышее увгьойн : « Профессор Рамазан ГьуIсейнове инглисни мизен кафедра ва быкырда хаариджий мизяаршин факультет ачмишаъасдиме ва гьаIракатехъа адчесдиме хаIбна заIгьмат гьавъу. Мана Дагъыстанее германский мизяаршикена докторна диссертация мудафия гьавъуна цIеррыйна ааIлим ворна. Манкъуна заIгьмат университетын кIеливханааъас деш. Рамазан ГьуIсейнов хаIбни дараджайс лайикьна ааIлим ыхьа…»
Хъийгъа ДДУ ректоре конференцие иштыракаъасди ааIлимаршис угъурбышиквана иш арзуламишавъу ва МаскIавни девлет университетыквайий Санкт-Петербургни университетбышиква ыIлимыква багълыданан савдабы одкIун.
Мани иджласее профессор Рамазан ГьуIсейновни ыIмреква ва джуни ыIлимни ишбышиква багълыданан аIтрафлы чыхышбы ДДУ-ни иглисни кафедрайни хааIрынкъе, филологиейни ыIлимни кандидате Хайбат Кадачиевае, ДДПУ-ни хаариджий мизяаршини кафедрайни декане Румик Шихкеримове, инглисни мизени кафедрайни профессорарше АIлисултIан АIлисултIанове ва Татьяна Баранниковае гьаъы.
Конференциее хаариджий мизяаршини гьаIкIеедын , тарджумабышди, фольклорни гьаIкIеедын докладбы абыйни мигьманарше ва джигайл’ни ааIлимарше гьаъы.
М. В. Ломоносовни дойил’ни МаскIавни девлет университететенче абыйни ааIлимарше ДДУ-ни телябабышис мастер-классбы гьагу.
Октябрьни 25-чил ДДУ-ни майдама круглый стол «Переводы в контексте популяризации фольклорного наследия народов Дагестана илгъевчIу.
Ман Рамазан маъаIллимыс къадсырыйн ыIлим-конференцие йишди миллетис вааджибда водун.
Йишди увгьойква , маIгьадни йигъынджагъбышее Рамазан маъаIллимни гогьарбышед, цIаIхбышди интеллигенциейныд, цIаIхни миллетни СМИ-ше : кIазетни редакциейн, теле-радио верлишбы ыккекани журналистарше, ушахаршини журнални ишчерше , Калел’ни администрациейни, ДжинаIгъни мактабни чIакIынбыше иштыракаъас ыккан. Манкъве джуни гьаIракатбышиква йишди миллетын дойид ахтыхъаъы. Зы иням гьаъан, манкъвее кумаг гьаыйн инсанарыб йишди миллетни аIрее кIылба дешобунбы.
Гьел’бедти, шавайий ман конференцие алгъайгьи , хабар гьевлесний вуккан. Мункум вобна инсанаршикIлед дяцIахьес.
