Декабрьни 3-чил Сергей Меликове вааджибни суалбышди аллан иджлас ыккы.
Иляакани суалбышди аIрее ыхьайнбы: гьоIкуматни къуллухчерше халкьыни мураджиятбышилхъа фагьым гьувой; «Национальная система пространственных данных» гьоIкуматна программа ишекечирмишавъий; Дагъыстанын муниципалитетбы утIумни коммунални гьаIшбышдиме контейнербышиква таIъмырхьай; 2025 сен республикайни ешайишни ташкилатбышее одхьуний тешкиляуй ва медынбы.
ГьоIкуматни къуллухчерше халкьыни мураджиятбышилхъа фагьым гьувойнчини суални гьаIкIее Др-ни ХаIрынкъуни ва Правительствайни Администрациейни регьбере МаIгьач УIмарове чыхышау. Манкъуни увгьойка, регионни ЦУР-ни доюлхъа ноябрьни вуза 6 аазырыле агъаллан мураджиятбы хъады. Манчике гьоIкуматни ташкилатбышейхъа 1728 къахову, муниципалитетбышейхъа – 2636, менни ташкилатбышейхъа – 1656 мураджиятбы.
15 муниципалитетбышее токIани ишгъеква багълыданан дагъамийваллабы кIыл’хъыхьа. Ноябрьни вуза вахтал’ гьаIш хъидевкуйка алаакьанан шикаятбыд октябрылхъа иляаканкъаI кьоIникъатна кIыл’хъыхьа. МаIгьач УIмарове проблембы агъмишау ва манчини ыIгьтеенче хъавалесди йаIхъбышди гьаIкIее гаф вукку.
КьоIдъэсди суални гьаIкIее Дагъыстанна вице-премьер, регионни чIиебышди алаакьабышда министр Заур Эминов юшенхьа. Манкъве къейд гьауйнки, ЕГРН лазымни маIълуматбышиква гяцIаийн суал ва НСПД программа ишекечирмишавъуй ахтыйни къайдал’ гьаллаъа ыхьа.
Муниципалитетбышди сергьатбышди гьаIкIее 763 ЕГРН 738 сергьатбышин маIълуматбы адчыйнбы, манчин 97% гьаъа. Мани сардан муниципалитетбыше гьаракатукана иш къавджу. 11 администрациебыше мана иш быкырба таамавъуна.
Росреестре алгъагьани рейтинге республикайн югун натийджебы гьагу. Регионни хаIрынкъве МаIгьачкъалайн генплан кьабылявъийна мисала гивхьу. Манчин транспортни, инженерни ва социални инфракъурлышни инкишафыс имкан гьевлес. Манчиле гъайре кьаанунденани тикинтибышин оIги ыIхас.
Хъийгъа Заур Эминове гьоIкуматни ва муниципални унитарни ташкилатбышди тезелемишаийнчини гьаIкIее ихтелет гьау. Манкъуни джуваббышихъа гора, иш регионни правительствайни кьарарыс уйгъунба вуккекка. План-графикейхъа 318 муниципал ва унитар ташкилатбы адчу водунбы, манчике 278 тезелемишаъас ыккан.
Хъийгъа джуваб регионни экологиейни министрыс Ратмир Расуловус Гьуво. Манкъве контейнербышиквана вазият юшенавъу. Министрни увгьойка, гьаIшде гьалекийс контейнербышикена кеситийвалла вобна. Сабара районбышее контейнерын майданбы дешинбы джад. Манчини аIрее Ногъайин, Бабаюртын ва Къурахын районбы. Ногъайни районе контейнербы гиххьесын торпахбы джураъа водунбы.
Регионни башчийни джуваббышихъа гора, къийнийни йигъыл’ ТКО лазымын шарааитбы яратмишаъа водунбы. Манбы кейфиятука ишлемишхьес деш, агар ши муниципалитетбышее манчис еттыгъна фагьым гьидёве. 2025 сен мани сардан муниципалитетбыше мана иш гьаракатейхъа абчес вуккан.
Гойне мактаббышее къуIмани одхьунийка ушахар таIъмыр гьавъуйнчини суални гьаIкIее ихтелет гьау. Къийна республике 1400 мактаб водун. Манчее 479 аазыр шыгыртарше хъаIдаххъа. Манбышике къуIмани одхьунийка 1-4 сыныфбышин 214 аазыр ушахар таIъмыравъу. Сергей Меликове мани сардан увгьойн, сабара мактаббышее наIгьакьын ишбы къедже ыхьа. Ёхламабыше манбы ашкараийнбы ва тахсиркараршис джазаа гьувона. Мани ишее саймазыйвалла гьааъас караваъалес деш. Ушахар йишин къийхъийн йигъ водун. Манбышда саламатийвалла шаке аIслыба.
Иджласе менни вааджибни суалбышди гьаIкIейиб гаф вукку.
