Россиейн Донбасыл’ даIъвый вуккеккан хьебыдъэсын сен быкырехьи. Къийна СВО гуджнаква аIл`гьаани вурушбышее йишди оIлкайни кьуввабыше украинайни эскераршис ва манбышис кумаг гьеленбышис диндж гьели деш.
ХаIддаа миллетбынани Россиейни цIаIхни халкьни джаванаршед СВО джон гьунарбы, гьаракатбы гьагванбы. Манбышин геллесынбы гьаагуйни игитийвалис сикIы гьокуIматни наградабышис лайикьба къавджу. Манбышди джарге гвардийна хаIрна сержант Мурадов Аслан Сулейманна дихыр ворна.
ХааIрна сержант А. Мурадов 1977-ъэсди сен Калмыкиейни республике едике ыхьа. Манкъуна кок ХыIягъни хивейнчена вобна. Асланни деккихъаб, Сулейман дайийхъаб, хаIбна йицIылле ушахнана хизан вухьа. Манкъве джуни ыIмрени ёлдашиква Гузел’ халайква саджигее молюйре гадейий кьоIйре ичий хаIбхъавъу, манбы эвле-атта гьавъу. Ушахаршини аIрайл’ хизанее Аслан хьебыръэсда ворна.
Асланын молюлле сен быкырхьайнкъаI, манбышда хизан Къызларни районни Большая Арешовка хивейхъа кочмишувхьа. ЮчIыдъэсын сыныф чIавауйле хъийгъа, манкъве трактористын саIнаъат алятIасдимее Черняевкайни хивейни техникIумейхъа иккечIу.
А. Мурадов «Южный уралец» батальонна эскер ворна. Мана джуни хайишиква 2022-ъэсди сен СВО аркIын. Къийнийни йигъылхъамее маннкъве хаIдданани вурушбышее иштыракау. Манбы ДНР, ЛНР азад гьаъан вурушбы ыхьа. Манчини аIрайл` энки дагъамынбы Кременная-Торское шагьар миллетчершике азад гьааъанкъаI адкIынийн вурушбы ыхьа.
СВО гидгъылни сифтийни йигъыле Аслане джуни гьамбазаршиква Ватаныс хидматааъа. Манбы энки гуджнаква вурушбы аIл`гьаани шагьарбышейхъа йаIххъыл` гьааъа вухьа. Водни дагъамийвал`бышихъа ил`дяакы, командираршин амурбы угъадука быкыраъанбы.
А. Мурадов манкъуни командираршикIле, гьамбазаршикIле джомард эскер хьинне ацIа. Манкъуни гьаIкIее гаф гибхьыйнкъаI, манбыше эйгьен: « Асланылхъа гьаммаше далбы хъадчес эйхьи. Манкъве ненкеджаб джукван гьамбазар дагъамийвалей гьавассарас деш. Мана гьар вахтал` кумаг гьелес гьаIзирра ворна. Гойне хьинне манкъухъад гьаIкIени адамийн хьиннен са джуваб эйхьи. ШакIле манкъуни гIаленче заке ахаI деш, нейид заке ихьес деш кал`мабы ненкеджад къайиххьы деш. МаIгьдын ихтелетбы манкъус аваакIа дешинбы».
КомандираршекIлейий гьамбазарше Асланын хасият гыргынкъуле югда ацIан. Батальоне манкъун до гьаммаше югни сураке агъмишаъа.
Къийнар мана СВО ворна. АIхырейни вузаршее манбышди батальонын Бахмут, Соледар, Красная Гора шагьарбы миллетчершике темизяу. ГьаIшде Аслан джуни гьамбазаршика Клещеевка шагьар азаад гьааъа.
ХааIрна сержант А.Мурадов хаахъа истираIгьатыс хъарыйнкъар, динджира гийъарна деш. Манкъве гуманитар акциебы алгъайгьи. СВО воохьени эскераршис тадарукбы, лазымын дезгагьбы къихели.
А.Мурадове гьагуйни игитийвалис сикIы гьокуIматни сураке алятIуйн хаIдда наградабы водонбы. Манбы 6-ъэсди мотострелковый дивизиейн, 3-ъэсди армейский корпусни сураке алятIуйн «За боевые отличия» медалый джурабаджура таIрифын кагъызбыйий грамотабы водонбы. Манчиле гъайре, Аслан гьинчиле сабара вахтна гьихъа РФ-ни гьокуIматни «Суворовни» медалыс лайикьра къаджы.
Са-кьоIлле кал`ма Асланни хизанни гьаIкIее эгьес ыккан. Манкъухъаб кьоIйре дихый са йиш ворна. Йиш Аэлита вудж СВО – нанкъаI едике йихьа. Гадебышис Тимурысый Маратыс кIыл’валейджаб ватанпарварыйвалла хаIбхъааъа. ГьаIшде манбыше деккин экIра хаахъа саркIылий гозетяъа. Манбышиква саджигее Асланни дёлесинбышед, гьамбазаршед ман йигъ гозетяъа водун. Иншаалаагь, ман йигъ, умудааъана, акьаIнада дешин. СВО экIда таамхьа, Аслан джуни аилейсахъа, ушахаршисахъа сакIаласда. 
