ГьуIрматукван чоджеер ва баджеер, гьаlдж къилмишавъуй гьар мусурманийлхъа гёохьена фарз вобна. Аlзизни джигабышилхъа ыlбаадат гьауй гьар мусурманийна мураад вобна.

ОIгийл’ни девырбышее йишди инсанаршин Маккайлхъа пиядаба гьавайкIан вухьа ва манбышин гьабкIыний хъабый вазбына айкIан ыхьа. Нимее дагъамийваликва инсан махъа гьаркIынее манкъус суваб геед водон. Совет гьоIкумат дагъылмышхьайле хъийгъа, йишди инсанаршин гьаIджилхъа гьавайкIананбышин сай сен — сеныле хаIдхъехьи водон, нъяас увгьее гьар сен махъа хаIбба цIаIхбы гьавайкIан. ОIтмишхьайни йишди кIазетни нeмреt зы Умра (кIыл’на гьаIдж) къылмишавъуйни гьаIкIее, ва манчини усулбышди гьаIкIеt одкIун ыхьа. Гьайни зарбас зы зака мани кIыл’ни гьаIджилхъа гьабкIынни йишди эл’ни инсанаршини гьаIкIее окIанас ыккан. Манбы Къызларни районни Мирный донани хивее ешемишоохьен Неби Юсуфна дих Шигьбиядов, джуна хьунаше Зарема Шигьбиядова, сайир Зарема баджийна йичи АIйназ Байрамбекова вухьа.
Йишди районенче шале гъайре Рутулни хивенче Метлеб чоджна йиш Солмаз ва джена дих АIбдулджелил вухьа.
Мирныйни хивехъа Неби Шигьбиядов джуни делесынбишиква Азербайджанни Закаталайни районенче кочмишхьа хъары, амма манбышда кок Сувал’ни Мишлешни хивенче вобна. Шигьбиядоваршина хизан дин гьаъана вобна, ва манбышда са чодж Ислам Мирныйни хивни манзикна имамна ишлемишехьи ворна.
Манбышкан цIеддийн йизын горуш МагьаIчкъалайни аэропортыл’ ыхьа ва манче саджигэй Шарджайни шагьарехъа алебхы.
Йишин группабы джурайда ыхьейид, ши саджигэй гьабкIын ва сайджигэй ыIбаадат гьаъу хъабы. Манбы зынахьинне махъа цIебба гьабкIын вухьа.
Джос ЫIмрехъан путевкабы джони дихе пайис алищу. Ман путевкабы манбышис Къызларни районни имаме Муслим КъазимагьаIммадове хахъа ары хъуво.
Декис, едис мана гееб гыранна пай вухьа, махуIбна пай гьале воохьена деш, няъас увгьее гьар инсанна мурад вобна гьаIджилхъа гьаркIын Маккайий, Медина къавджуй ва джаа ыIбаадат гьауй.
Маккайни, Мединайни шагьарбышее зияратбышилхъа ши саджигее гьабкIын ва гойне са йигъылиб саджигэй Каабайни гьихъийалла таваф гьаъу,
Сафа ва Марва донани сувабышди гьихъийалла Сай гьаъу (йыгIни элес ивийкырийнбы манчини гьихъийалла).
ГьаIджилхъа гьаркIынна инсан чалышмишехьена гыргын манчис гьагван лазымын ыIбаадатбы ва дуъаIбы гьаъас. Нимее хаIдда манбы гьаэй, гьаманимега хаIдда суваб водон. Манчихъа гора ши чалышмишувхьайнбы Медине йишда Пейгъамбар (с.в.с.) бастураъуйни Ан-Набия донани маздике гыргын кубаар гьаъас, ва Маккайл’ гьар йыгъыс Ал’-ГьаIрам донани маздикехъа гьабкIын Каабайни гьихъийалла таваф гьаъас, Сафа ва Марва донани сувабышил’ Сай гьаъас.
Зас гьаман эгьес ыккан, мани ислам динни зияратбышил’ ыхьана инсан геер хошбахт инсан ворна, няъас увгьее Аллагье манбышин гунагьбы багъышаъанбы ва джо йикIенче гьауйн дуъаIбы ва кубаара кьабыляъанбы.
ИншаАллагь ши гьауйн кубаар, дуъаIбы ва гьеххъийн дилягбы Аллагье кьабыляъасынбы, ва шас меб махъа вооIххъас кьисмат гьевлесда. Аамин!