Са вузале СВО гидгъылыйн хьебыдле сен быкырхьес. Мана кIыл’на вахт дешобна. Йишди эскерарше явашдевхьа хаIм-йигъна азгъунувхьайни миллетчершини дестебышиква вурушбы ыккекка. Манбышике Россиейн торпахбы темизяъа.
Къийна СВО иштыракаъани джаванаршини аIрайл’ йишди цIаIхни халкьын духйеб еттыгъба вобунбы. Манбышед, авхуйнбыше хьинне, Ватанни гьийдын бордж хъели. Дирибашийваликва ва игитершини гьаIракатбышиква миллетчершиле гъамувхьес чалышмишоохьи.
Гыл’мецIни хивейнчена гвардий лейтенант Мирзоев АIлимагьаIммад Межлумна дих СВО гидгъылни цIеддыйн йигъыле мааъар ворна. Мана хаIдданани дагъамни вурушбышда иштыракчий ворна. Манкъве хаIбвалла гьааъани взводун хил’дже шагьарбыйий районбы, хивар миллетчершике азадаъас кумагау.
АIлимагьаIммад Мирзоев 1983-ъэсди сен Рутул районни Гыл’мецIни хивее маъаIллимни хизане едике ыхьа. 2000-ъэсди сен едике ыхьайни хивын йыIкьнекин мактаб быкрау. 2001-2003 ъэсди сенбышее эскерийвалей ыхьа. Манкъве кьоIдле сенна Хабаровскни крайыл’ Ватанни гьийдын бордж хъуво. Эскерейнче хъарыйле хъийгъа, са сенна джурабаджура ишбышил’ ишлемишхьа. 2014 сен Ростовни шагьарее РФ-ни Миноборонайкан цIеддыйн контракт одкIун. Мана Краснодар крайни Темрюк шагьарейхъа эскерна къуллухааъас къахову. Мааъар морской пехотайни джурайни десантни штурмовой ротайни командир взводна кумагчий хьинне ишлемишехьи гиргъыл’.
АI. Мирзоев СВО гигъалассе гьихъа хаIдданани джигабышее ыхьа. 2014-ъэсди сен мана джуни гьамбазаршиква саджигее Крым Россиейлхъа аливкасди тадбырбышее иштыракау. 2015-ъэсди сен Сириейна Республика душманаршике азадааъани джурайни операциейл иштыракау. Са сенна мааъар ыхьайле хъийгъа, мана Темрюкни шагьарейхъа частейхъа саркIыл’. Манчиле хъийгъа мана Севастопольни шагьарейхъа йаIххъыл’ гьау. Мааъар ишлемишехьени вахтал’ АI. Мирзоеве МГУ ТУ университете хъаIдхъы. Шаца ноябырьни вуза мана командир взводни къуллухулхъа илгъечIу.
АI. Мирзоеве заквани ихтелете гьамбазаршини, командираршини гьаIкIеена гаф гьааъанкъаI увгьойн: «Шахъаб са макьсад вобна. Манаб миллетчершике гъамувхьайка багълыба. Чалышмишувхьесынбы мани макьсадылхъа гьивхьарас. Иншааллагь, ман йигъыд дёлес хъыхьа водун. Ши авхъуна йаIхъ гьаIкIена вобна».
АIлимагьаIммад Мирзоев къийна Россиейни ярахни кьуввабышда гьаIкIена джомард офицер ворна. Манкъуни дирибашийваллайс, игитийвалис гьокуIматын ахтына кьиймат гьооли. Манчика багълыда мана хаIдданани медалбышисый таIърыфни грамотабышис лайикьра къаджы. Манбы Жуковын, «Участник военной операции в Сирии», «За укрепление боевого содружества», «За возвращение Крыма», «75-лет Победы в ВОВ», «310 лет морской пехоты» ва медын медалбы водунбы. Мана гьамыр парашютист-аIълачий ворна. Манчиле гъайре АI.Мирзоев Севастополь шагьарни губернаторни грамотабышис лайикьра къаджы.
Къийнар йишда кьаIгьраман СВО ворна. Манкъве джуни гьамбазаршиква саджигее йишди хаIнни оIлкайна Россиейна садибийвалла гьувааджи. СВО иштыракчер гьаIшдийни замаанайн кьаIгьраманар вобунбы. Манбыше водни дагъамийвал’бышихъа ил’дяакы, нишиледжаб хъаIвайкьан деш. Йишин эскерар гьаIракатыква гьихъа ал’гьааI. Манбы, шакдена джони макьсадылхъа гьивхьарасынбы. Гвардий лейтенант Мирзоев АIлимагьаIммадыс, авхуйни мааъаб воохьени гыргыни Россиейни эскераршис СВО экIда таамхьа, хайбышейхъа савкIалас дилягбы гьеххъа.
