Январьни 22-чил’ МагьачIкъалайни шагьарее Редукторный гасабее тентенейква гьабтIуйни журналистаршис къабсырна Аллея ачмишавъу. Манчин авхъуйин чIие 5800 кв.м. водун ва мани джигее аллея вухьесдимее 2023 -ъэсди сен МагьачIкъалее ещемишоохьенбыше сесбы гьуво сечмишаъу ыхьва.
Ман федерални «Формирование комфортной городской среды» проектыква аляъу ыхьа, гойнед ман джига ремонт гьаъани вахтал’ чалышмишеебхьайнбы джаадын йиваар гьиваджес ва джаа инсанар пиядаба ивийкарна йаIхъ, инвалидаар ивийкаран пандусбы, ушахар гьиваган площадкIабы, ва сабара медын истирагьат гьаъасын шараитбы яратмишаъу водонбы. Манчиле савагьийда уфтанын плитка ва гивийъаран скамейкабы, ишыгъен диракбы, цIедын йиваар, ва кIатлен газон гихьы водон.
Журналистаршис къабсырна аллея ачмишааъани вахтал’ МагьачIкъалайни шагьарна хааIрна Юсуп Умавов, республикайни информациейни ва чапни Агентствайна хааIрна АIбдуразакь Джамалутдинов, республикайни тикинтийни министерствайни хааIрынкъуна муавин Шамил’ АIбдулмуталимов,
МагьаIчкъалайни шагьарни депутатаршди иджласна садры Морис Ильясов, НТВ телеканална мухбир Омар МагьаIммадов ва мебынбыше чыхышаъу.
Юсуп Умавове джуни чыхышее шагьарее гудмишоохьенбы аллеяйни ачылышиква тебрикавъу ва манбышди шагьарни администрациейни, джуни суракке Дагъыстанни хаIрынкъус Сергей Меликовыс, тикинтийни ва ЖКХ-ни министерствайс ва гыргыни ман аллея аляаъас заIгьматавъуйни устадаршис сагъул ва увгьо.
Манкъуни увгьойква, тезеба ачмишавъуни аллйе шагьаррыбышди, журналистаршди кумагуква гьабтIуйни журналистаршди добышикван йиваар эзас ва манчис хидмат гьааъас.
«Умуд гьааъана мани цIедни сквере эзуйин йиваар, къаджейн ишбы ва ушахар гьиваган площадкIабы гьиваджесынбы ва къорамишаъасынбы.
АIхреени вахтал’ йишди шагьарее иняхтын уфтанын джигабы хаIдда ачмишхьа водонбы ва манчин шагьар уфтанхъааъа. Ши чалышмишувхьесынбы вушди кумагуква махуIдын ишбы гьалед хаIдда къаджесва»,- Ю. Умавове увгьо.
Дагъыстанни информациейни ва чапни Агентствайни хаIрынкъве АIбдуразакь Джамалутдинове джуни чыхышее увгьойн: «Къийна журналистаршди хавни кIане ин уфтанын джига ачмишхьайн сабабкарар шагьарын администрация, республикайн информациейн ва чапын Агентства, ва журналистаршин иттифаг вобонмы. Мана гееб ваджибна ва югна иш вухьа. Иняа оозуна гьарна йив шакасана саджигее ишлемишебхьайни йишди достаршис къабсыр вобна ва джони дойил’ вобна. Ин ши истирагьат гьаъан ва гьихъийалла ешемишебахьени инсанаршин ва ушахаршин гьуваган ва истирагьат гьаъан джига ихьес»
НТВ телеканална мухбир МагьаIммадов увгьойква ин сквер гьайинчиле 15 сенна гьихъани ачмишаъас ыккан гьале ман геджхьайн. Шос йишин гьабтIуйн журналистар йикIелхъавалавуйис ва джон добы гьайняхуIдни аллеяйс гьувойхъа гора сагъулва эйгьи. Къийна иня сабара йизын достарыб вухьесынбыни амма манбы Украине командировке вобонбы. Манбышди дойилед зы шокIле сагъулва эйгьи».
ГьабтIуйни журналистаршин аллеяйн ачылыш, концертыква, меденият программайква, пылавыква ва чейиква таамхьа.
