Урсиятыл’ апрельни 1-чиле джегьилершин эскерехъан хъотIулый гидгъыл. ОIлкайни президентни Владимир Путинни кьарарыка къошинбышеехъа 160 аазыр инсан къахилес. Юххьанийн хъотIулый июльни 15-чилхъа меега цIыцIахьес.
Эскерийвалехъа 18 ешиле 30 ешилхъа мееган джегьилер алябтIас. ГьоIкуматни регьберее хьулехьейд къейд гьаийнки, манбы Донецкни Халкьни Республикее, Луганскни Халкьни Республикее, Запорожьейни, Херсонни вилаятбышил’ еррашмишхьайни частбышеехъа къахивлес деш.
ГьаIшдийле хъийгъа сабабдена эскерийвалейхъа хъобтIул гьидябкIынийни инсанаршис 30 аазыр манат джарма гьааъас. Манчиле гъайре эскерийвалике гьейбхынбышике 2025 сениле хъийгъа машин гьаъайкыйс ихтияр гьелен документ алятIас ва манчина вахт гьехха хъааъас аIхас деш. Манчиле савагьийда машин учотейхъа адчес, кредитбы алятIас, джуна иш ачмишааъас маIгьабни джегьилершис кьадагъа гиххьес.
Эскерее къуллух гьааъас гьашубые азадааъас: текда вуджее ушахыс тербие гьоолен деккяр. Манбы ушахын 18 сен быкырхьес мее эскерийвалике азадааъа; кьоIйре ва манчиле хаIббанан ушахарнан деккяр; джони ыIгьтеени кьаIсди дёлесынбышикван ватандашар; аккредитацие илгъечIуйни ааIли мактаббышин телябабы ( гиябыда хъаIдаххъанбышиле гъайре); сечкибы аIл’гьаани вахтал’ депутатар ва депутатыйвалехъан кандидатар; полициейн , гьоIкуматни нарконазаратни ташкилатын ишчер, поджарныйбы; хьебни сенилхъа меегани инвалид-ушахарнан ватандашар; ыIлми дараджанан ватандашар.
Джанас заIъыфын инсанар эскереехъа алябатIа деш. Эскереехъа хъоотIаланбышда джанана сагъвалла хьони категориебышиква «оIл’чмишааъа». «А» категорие мыIгькамни джанаквани джегьилершис гьооли; «Б» категорие гьувойнбышике десантее, спецназее къуллух гьааъас вааIхас деш. Амма менни къошинбышее къуллух гьааъасда имканобна; «В» категориейн срочный къуллухыке азадааъа. Амма геледжагъыл’ военный сборбышеехъа ва даIвъийни вахтал’ мобилизациейква мункум вобна хъоотIалас; «Г» категорие операциейле хъийгъа маалидже гьаъас лазымбышис гьооли; «Д» категориейн къуллухыле азадааъа ва эскерни учотыле акIанаъана. МаIгьбын инсанар мобилизациейс гябакIа дешобунбы.
Увгьойхъа гора, Дагъыстаненче гьайни сенийни юххьанийни хъотIулыйка ёкьуд аазырыле гьеххана джегьил’ къуллух гьааъас эскереехъа аIл’гьаас.
