Китаб чапыке хъыгъечIуй аторни ыIмреена хаIбна гьаIдиса вобна. Ман гьазираъасдимее сенбы, сасса вахтал’ йицIыдле сенбы айкIан. Китаббышихъадыд джурабы водунбы: адабиятын, ыIлимын, таарыхын , мактабын ва медынбы. Манбы ойкIананкъаI, гьаарункъвее чис сикIына заIгьмат гьааъа ва манчини гьаарынчихъад чин къайдабы, тIабалбы ва усулбы водунбы. Китабна метлеб вобна инсаныс гьарджурайлин хъодкуйн маIълумат гьувой. Китабыс гивхьыйни заIгьматна дараджа йидж одкIунийнкъукIле ваацIа вобна.
Июнни 26-чил’ МаIгьачкъале , Расул Гьамзатовни доюл’ни Дагъыстанни миллет китабханее гьайни сен чапыке хъигъечIуйни ькоIни китаббышин презентацие алгъавгьу. Китабна « Жулла Ччаврил Дуниял» атор рутул районни АIраккулни хивее ешемишехьена лакбышда шааир, таарыхчий, публицист, Россиейни язычершини Союзна уIзву ГьаIдис ГьаIдисов ворна. Манкъуни китабеехъа ыIмрени, муIгьубни, табиятни , гьаIкIеедын сечмишауйн шечIбы эчIу. Гь. ГьаIдисов дагъыстанни адабиятни гьаваскараршикIле лап югра ацIа ворна. Манкъвее гьихъа медын китаббыд чапыке къайиккыйнбы. Манкъун сабара асарбы урусни ва дагъыстанни мизяаршилхъа сакIалау водунбы. Адабиятыле гъайре , ГьаIдис ГьаIдисов лакбышиква алаакьани таарыхыквар маIшкьулехьи. АIхреени сенбышее манкъвее гьам АIраккулни хивни манзикыс имамийвалла гьааъа вобна.
КьоIдъэсди китабна «Путешествие в мир лакского языка» автор педагогикайни ыIлимна ааIлим, Рутулни 1 мактабна директор Ямудин Таибов ворна. Йишин кIазет хъаIдаххъанбышикIле мана лап югра ацIа ворна. Мана «Нур» кIазетна штате дешда мухбир ворна. Вахтале-вахталхъа манкъун макьалебы, кроссвордбы кIазетее чапаъанбы. Шаца манкъун китаб « Увлекательный мир цахурского языка» Кьурбан Омахановыква саджигее одкIунийн шаца чапыке хъигъечIу. Мани китабеехъа цIаIхбышди миллетыква алаакьан ребусбы, кроссвордбы, мисалабы , гьаракийбы эчIу. Гьамани къайдалин китаббы Ямудин маъаIллиме дагъыстанни миллетбышинбыд одкIун. Къийнар мана манчиле ооъар ишлемишехьи ворна.Ооъад увгьойни китаббышди презентациехъа лакни миллетын интеллигенция, ишкарар, джамаъаIтчер, автораршин гогьарбы, адабиятын гьаваскарар, ааIлимар , журналистар абы. Мани йигъыл’ лакбышиле гъайре мани китабханайни утагъеехъа Рутул районеенчен эл’чера, «Нур» кIзетын ишчера ва шагьарее ешемишоохьен ааIлимар, телябабы ва мебынбы сабы.
Маджлис вуккекканкъве китаббышин къурлуш ва маIъна ашкаравъу. Автораршис миннатдарийвалла агъмишавъу. Гойне манкъвее чыхышбы гьаъас ва китаббышис кьиймат гьевлес адабиятчершис, ааIлимаршис, джамаъаIтчершис ва къуллухчершис хааиш гьаъу. Чыхышбы гьаъанбыше китаббышис ахтыйна кьиймат гьувы ва манчин анализ гьаъы. АIтрафлы чыхыш мани презентациее Рутул районни маданиятни управлениейни хаIрункъвее, журналисте, шааире Саид Сулейманове (Къинады Саиде) гьаъы. Манкъвее кьоIни сана китабыс ва манчини автораршис югна кьиймат гьувы ва нишисый, няхъайий ва няайий манбы ишлемишаъас лазымдава увгьо. АIсас манкъвее китаббышеени ватанпарасыйваликва , тербиейква алаакьани шечIбышилхъа ва кроссвордбышилхъа фыкыр гьувы. Чыхышбы гьаъанбышди аIрее гьам китабханабышин ишчера, гьам автораршин достарыб вухьайнбы. АIрее-аIрее мактаббышди шыгыртарше автораршин шечIбы йикIеенке хъаIдхъы, артистарше манбышди джуваббышикван маIънийбы гьекIу.
Кьурбан Омаханов
