Гьар сен июльни 24-чил йишди гьоIкуматыл’ кадастрни инженераршин Йигъ алгъайгьи. Ман санаъаIат чIиебы оIл’чмишаийква, сергьатбы цIыцIаъыйква багълыданан санаъаIат водун.

Мани Йигъын таарых 2007-ъэсди сен РФ № 221-ФЗ « «О государственном кадастре недвижимости» кьабыляуйни кьаануныква багълыда водун. Ман йигъ алгъагьасда мислягьаIт Ассоциациейн «Саморегулируемая организация кадастровых инженеров» къавдже. ЧIиебы оIл’чмишаъан , югунбыйий писинбы гьагван аIдатбы гьале Х асыреенче хъооI водунбы. Манке манчин сергьатбы кандирыквайий осани чуершикваний гьагва. Гойне мани къайдайл’ чIиебы оIл’чимишаъы катхударшисный пайлемишаъа. Манке эзан , хъийшалан джигабыджад деш, хайбы аляъасын чIиебыд, чIалагбыд оIл’чмишаъы гьаъы гьоIкуматыни учетеехъа алятIа ыхьа. Совет гьоIкуматни деврее Россиейл’ чIиебышин кадастр ыхьа деш, няъас увгьее гыргын торпахбы, чIиебы гьоIкуматни ыIгьтее ыхьа. Совет гьоIкумат дагъылмишхьайле хъийгъа, 1990 хусусият мед яратмишхьа. Мед хусусыда илгъечуйн чIиебы ва торпахбы тасдикьаъас лазымхьа.
Къийна кадастрни инженере чIиебышин техники инвентаризацие гьаъа, чIиен, аляъани бинаан пIлан аххъаххъа, документбы гьазираъа, сергьатбы джураъы гьагва, межевой пIлан гьазираъа ва медын ишбы къедже . Манчиле гъайре, манбыше чIиебышиква алаакьана экспертиза алгъаагьа. Кадастрни инженерарше садибда хьебыдле-ёкьудле санаъа1т гьаъа. Манчихъа гора манбышилхъа хаIдын иням ва ыIгьтибар ихьес ыккан. Манкъуни ацIаалике, гьаIракатбышике джIамаъатын ешайишид сассаджигабышее аIслыда эхьи.
Къийна гьоIкуматни реестре 40 аазыр аттестовать гьавъуйн кадастрын инженерар вобунбы. Манбышда сайир цIаIхийгъалий Улуханов Гьикмет МагьаIммадшефийна дих ворна. Манкъуни деккина насыл Калел’ни хивеенчена вобна. МагьаIаммадшефий чоджий деккини хизаныква Калел’гъанче Закаталеехъа кочмишхьа. Мана мани шагьарее джурабаджур къуллухбышил’ ишлемишхьа. Закаталайни йивани йаIххъыни вагъзална хааIрна ыхьа. Совет гьоIкумат дагъылмишхьайле хъийгъа, Дагъыстанеехъа мана хизаныква кочмишхьа. Дербентни шагьарее юрд абчы. МагьаIммадшефий чодже джуни миллетни аIрее югна гьуIрмат къазанмишавъу. Манкъвее гьаммаше йишди инсанаршис джуке вааIхана хыл’ авхъаахъа вухьа. ГьаIмагьдын наIсигьат ва тербие джуни ушахаршис манкъвее гьувы.
Гьикметна джегьилийвалла Дербент абкIын. Манкъвее 2005 сен Дербентни шагьаре 19№ йыIкьнекин мактаб таамаъы. Мактаб таамаъы, Гьикмет Улуханов Дагъыстанни девлет университетни юридический факультетехъа иккечIу. Ман 2010 сен а1ълада таамаъы, юристын санаъа1т алеетIу. Гьаманиджар сен мана юристна ООО «Ритм» ташкилатее ишлемишехьи гиргъыл. Юристын къулай алеетIуйле хъийгъа, Гьикмет чIиебы оIл’емишаъани шагьарни ташкилатеехъа илгъеч1у. 2015 сен Минимуществе аттестацие илгъечIуйле хъийгъа, МУП «Дагтехкадастре» хааIрна иженерна ишлемишехьи гиргъыл.
Йиц1ни сенни аIрее, мани ташкилатее ишлемишехье, Гьикмет Улуханове хаIдда кумаг йишди миллетни инсанаршис гьаъы. Манкъве чIиебы, хайбы дойилхъа (хусусу) хъаъас хаIббананбышис хыл’ авхъу. Кумаг гьаъыйнбышда сайир зы ворна..
Къийна манкъвее джуни ёлдашиква югни баба-дидершини аIдатбышиква ва адаббышиква ёкьуйре ушах чIакIыхъааъа вобунбы.
Ши Гьикмет Улухановыс джанана сагъвалла аIрзуламишааъа. Гьаъан кумагбы суваабыс окIананбы .