Мавлид кал’майна маIъна аIрабни мизел’ инсан дюнйейлхъа арый вобна. Мана МаIгьаммад пейгъанбар дюнйейлхъа арына ваз вобна. Гьайни сен мана ваз августни вузани 24-чил’ гибгъыл.
Къийна Дагъыстанее манчика багълыда хаIдда джурабаджура маджлисбы, йигъынджахбы, тадбырбы, конкурсбы алгъайгьи. Инсанар мавлидбышейхъа савайли, кьуръан хъаIбаххъа, мусурманарше динна уфтанийвалла гьаагва
ЦIаIхни халкьыныд манчис хаIбна фыкыр гьооли. Манбы саджигейхъа савайли, исламни динни темизийвалике йишонеебахьи. Сана-санкъус югун дилягбы гьеххъа. Симысынбы барышмишоохьенбы. Хиваршини, джамаъаIтбышди аIрал’на доствалла гуджлемишаъасдимее хаIдда хайирхагь ишбы къеджи. Хайир барака хаIдхъаъасдимее хайбышее мавлидбы хъаIдаххъа.
Гьайни дёлесвалей мани саягъыл’на хаIбна маджлис ЦIаIхыйни дерайл’ни Мишлешни хивее алгъавгьу. Манчисда имкан Дагъыстанни Муфтиятыний, Мишлешни хивни джамаъаIтын гьуво. Мани йигъыл’ Мишлешехъа хивын джамаъаIт, дёлесни хиваршейнче, акьаIнанче абыйн мигьманар сабы.
Маджлис Дагъыстанни муфтийни кумагчийе, «Ассалам» кIазетни редактор ГьаIасан Магьмудове кьуръанейнче гьаIдисбы хъаIдхъыйка ачухавъу. КIазетни редакторе Рабил’ ал’ аввал’ вузани гьаIкIее махъа сабыйнбышис гаф гьавъу. МаIгьаммад пейгъанбарни ыIмрыке йишонхьа. Джуни ихтелетни аIхырее Гь.Магьмудове Мишлешни хивее уфтанна маджлис вуккейс кумаг гьувойнбышис, хивни джамаъаIтыс, абыйни мигьманаршис миннатдарийвалла агъмишавъу.
Мишлешни хивни администрациейни хаIрынкъве Ислам Ибрагьимове абыйни мигьманршис хошгелди гьавъуйле хъийгъа, увгьойн: «АIхырейни сенбышее исламни диниква багълыда, манчина кок утIумааъасдимее Мишлешни хивее хаIдда джурабаджура маджлисбы, йигъынджахбы, горушбы алгъайгьенбы. МаIгьдыни тадбырбыше хивын джамаъаIт саджигейхъа саъа. Манбышди йикIбышее исламни динилхъа водун аIшкь, мугьуIб, гьавас хаIдхъаъа. Зас джурайда муфтиятни ишчершис сагъулва эгьес ыккан. Манбыше ши кIелиханааъа деш. ЭкIда-экIда Мишлешни хивейхъа маджлисбы алгъайгьес абайли. Ман югни аIдатейхъа гитхьу водун».
Гойне хьинне джуваб ЦIаIхыйни дерайл’ни имаме Эльдар Сулейманове алятIу. Манкъве мавлидейхъа сабыйнбышис югна ва хошна ыIмыр аIрзавъу. Джуни ихтелете манкъве исламни динни темизийвалике йишонхьа. Имаме кьуръанейнчен гьаIдисбыд хъаIдхъыйнбы. Манбы дяцIанбышис баштада ыхьайнимее тарджумабыд гьауйнбы. Манчиле хъийгъа Э.Сулейманове Рабил’ ал’ аввал’ни вуза алгъагьасди маджлисбышике махъа сабыйнбы танышавъу.
Рутул районна имаме ГьаIзрат Кадимове мани йигъыл’ мавлидейхъа сабыйнбы табрик гьавъу. Манкъве августни вуза Рутул районни хиваршее алгъавгьуйни ва алгъагьасди маджлисбышике махъа сабыйнбышис хабар гьавъу. Манчиле хъийгъа, Гь. Кадимове Мишлешни хивни джамаъаIтыс югун ва хошун ешайишбы ыккейсдимее дилягбы гьеххъы.
Манкъуле хъийгъа, джуваббы ЦIаIхни дерайл’ни хиваршейни имамарше алятIу. Мишлешни хивни имаме Сабир Ибрагьимове, Гыл’мецIни хивни имаме АIсадуллагь Рамазанове, ЦIаIхни хивни имаме Джалалий АIббасове, Хьойикни хивни имаме Мустафа Бабаеве ва сабара мебынбыше мавлидейхъа сабыйнбы табрик гьавъу.
Мани йигъыл’ Мишлешни хивни агъсаххъаларшисыд джуваббы гьувойнбы. Мактабна директор ЫIсмаил Мамедове, Адам СайидгьаIсанове абыйни мигьманаршис хошгелди гьавъу. Манбыше авхъуйни ишбышис ахтына кьиймат гьуво ва геледжагъылид югун маджлисбы ыккейсын теклиф гиххьы.
Чыхышбы гьау таамувхьайле хъийгъа, мавлид хъаIбхъыI. Имамаршиква саджигее хивни джамаъаIтыныд мавлиде хаIдын гьаIракат гьау. Мавлид хъаIбхъы таамувхьайле хъийгъа, кубар гьау. Манчиле хъийгъа садакьа гьуво.
Гьаманиджад йигъыл’ хаIбна мавлид-маджлис Бабаюртни районейни цIаIхбы гуд’мишоохьени бинайл’ вухьа. Аттални, ДжинаIгъни, Калел’ни ва Коршни хивын джамаъаIт маркази манзикейхъа сабы. Манзикейхъа сабыйнбышди аIрайл’ къонши бинабышиле, МагьаIчкъалейнче ва сабара менни шагьарбышейнче абыйнбыб вухьайнбы. Хивна имам Элекпер Лезгиеве махъа сабыйнбышис хошгелди гьавъуйле хъийгъа, увгьойн Рабил’ ал’ авал’ мусурманаршис аIзизна ва гыранна ваз вобна. Мани вуза дюнйейлхъа МагьаIммад пейгъанбар ары. Манчика саджигее дюнйейни акьвал’ исламын дин гуджнаква еймишехьи гидгъыл. Къийна ши гееб шадба вобунбы мани динис ыIбадат гьаъава».
Манкъуле хъийгъа джуваббы хиваршее ешемишоохьени агъсаххъаларшис гьуво. Манбышед мавлид-маджлис тешкилявъуйнбышис таIърифын кал’мабы увгьо.
Мавлид хъаIбхъыI таамувхьайле хъийгъа, махъа сабыйнбышис болни нуIъматбышикван садакьа гьуво.
Сентябрьни 9-чил МагьаIммад пейгъанбар едике ыхьайс къабсырна мавлид Къызларни районни Мирный хивейиб вухьана. Мана районне энки хаIбба цIаIхыйн халкь ешемишоохьена хив вобна. Хивебынбы сувал’ни Мишлешни хивейнче кочмишувхьа хъабыйнбы вобунбы.
Дагъыстанни муфтиятын Рабил’ ал’ аввал’ни вуза мавлид маджлисбы алгъавъуй чIакIни шагьарбышейид назарее аххъы водун. Сентябрьни вузани 12-чил’ Санкт Петербургни шагьарее Рутул районейче хъигъебчIыйни инсанарше хаIбна мавлид алгъагьас гьаIзироохьи вобунбы. Манчиле гъайре МагьаIчкъалайни шагьарее сентябрьни 22-чил’ «Авропа» донани шадлыхбы ыккеккани залэе хаIбна мавлид вухьес. Ман гьам Мавлид ан –Набийс гьамыд ЦIаIхыйни хивее Ан Низамийни мадрасайни 950-ъэсди сенийс къабсырна вобна. Мавлид тешкилявъуйнбыше махъа хизанбышиква аблес хъоотIал.
«Нур» кIазетни редакциейн мани саягъылидын мавлид-маджлисбышис кумаг гьувойнбышис, мани карее иштырак гьаъанбышис джанана сагъвалла аIрзааъа. Джона иш суваабыс оокIаннава эйгьи.
