Сентябрьни 16-чил МаIгьачкъалэй миллетбышди ва динбышди арайл’ни алаакьабышди Советын иджлас илгъечIу. Манчина иш Дагъыстанни хаIрынкъве Сергей Меликове вукку.
Маджлисе йицIынчиле агъаллани Россиейни динбышди ташкилатбышди регьберарше, гьуIкумни идарабышди эл’черше, джаIмаъатчерше иштыракау.
Мигьманаршини аIрее РФ-ни Президентни Управлениейна хааIрна Евгений Еремин, Россиейна ХааIрна муфтий ТIаIл’гьат Таджуддинов, МоскIавни манзикна Баш имам Ил’дар Аляутдинов, Ставрополна ва Невинномысскна Митрополи тКирилл, Дагъыстанын,Чечняйн, Карачаево-Черкессиейн, Калмыкиейн, Астарханни ва Волгоградни вилаятбышин муфтийер ва мебынбы вухьа.
Маджлис гивгъалассе гьихъа МаIгьачкъалайни ва Дербентни архиепископе Варлааме МоскIавни ва быкырни Русьни Патриархни Кириллни доюле республикайни хаIрынкъус II дараджайлин Сергий Радонежскийн орден гьуво.
Гойне Сергей Меликове «Кавказ къийна ва къийхъа» фильм къурмишаийнбышис наградабы гьуво. Къузайл’ни Кавказни динэгьлершини чIакIынбышди ыIмырни гьаIкIее хабар гьааъан фильм иджласыле гьихъа Достваллайни Хааъад гьагу. Манчин аIсас кьаIгьраманар Дагъыстанна муфтий шейх АIгьмад- Эфендий ва МаIгьачкъалайнайий Дербентна архиепископ Варлаам вухьа. Сергей Меликове миннатдарийвалла агъмишааъан кагъызбы фильм къурмишаийни Батырбек Макиевусхъа, Екатерина Павловайсхъа ва Петр Павловусхъа хъуво.
Дагъыстанни регьберни увгьойка, гьини фильмее гьаIкIедад республикей эйхьени гьаIдисабышда хъобкуна хабаравъу. Шос хаIдын сагъул! Гойне манкъве агъмишаийн, къийна гьиняхъа гьар джурайл’ни ацIаал’бышикван инсанар сабы вобунбы. Джамияте къайда-кьанун гьувааджийниме инсанаршина садибыйвалла вуккан. ХаIббананбы Дагъыстанэй ваIщеле агъаллан халкьбы муIгьубыка ешемиш вухьайле маIгьатдал воохье. Манбышис шахъад са джанан код ыхьай баштада дешин.
Сергей Меликове республикайни динбышди регьбераршис Дагъыстанни муфтийис шейх АIгьмад-гьаIджийс, МаIгьачкъалайнийий Дербентни архиепископыс Варлаамыс ва Дагъыстанни ягьудершини хаIрынкъус Борис Ханукаевыс миннатдарийвалла агъмишавъу.
«Вушди джуваббышилхъа дагъыстанныбыше кIыры гьелен. Геледжагъылиб маIгьабна иш вуккуй вааджибба вобна»,- субъектни башчийе увгьо.
Республикайни хаIрынкъве къейдаийнки, душманаршис дагъыстанныбышда садибыйвалла кьабылёохьи дешда. Манбышис йишди халкьбышди арайл’ ледж адчес ыккан. Манчини аллад гьаIшде хаIбна фагьым профилактикайс гьевлес вуккан. Душманаршис заIъыфын регион лазымда. Манбышис СВО истифада гьаъас ыккан. Амма манбышикIле ацIа дешодун, миллетбышда хаIбвалла, динбышда хаIбвалла йишда заIъыфыйвалла дешобна.
Манкъуни джуваббышихъа гора, аIсас къорхубышда са джегьилершини арайл’ экстремизмайн ва терроризмайн фыкырбы еймишхьай вобна. Манчис хаIдын кумаг соцсетьбыше гьели. Манчихъа гора республикайни гьуIкумни ташкилатбыше динбышди ташкилатбышиква саджигэй гьаракатаъан нягьаIкьни радикал ишбышин оIги ыIхас.
РФ-ни Президентни динбышди ташкилатбышиква алаакьабы аххъаххъани департаментни хаIрынкъве Евгений Еремине къейдаийнки, шасана 200 миллетбыше джохъад са оIлка ыхьай эйгьи. МаIгьдын кар няаджад дешин. Ман джуваббы гыргынчиле гьихъа Дагъыстаныс ааидда водунбы. Асырбышика гьиняаъад муIгьубыка аIдатеедын динбы ёлахъайли. ХаIдда миллетбы ыхьай мана йишда баракат вобна. Е. Еремине Россиейни Президентын джуваббы йикIел’хъаляу: « Россиейни халкьбышди садибыйваллайс, йишди динбышди садибыйваллайс эксинана инсан оIлкайна душман ворна». Манкъве умудааъана, гыргынкъуни гьаракатбышиква мана садибыйвалла гьаммашийс гьувааджесда.
Дагъыстанэй джегьилершини арайл’ экстремизмайн фыкырбы еймишдехьайниме манчис къеджени профилактикайни ишбышди гьаIкIее Россиейни КьаIгьрамане Темирлан АбутIалимове юшенау. Сабара гагьна гьихъа мана республикайни милли сиясатни ва динбышди ишбышда министрна гиххьы.
Манкъве мани сардан къеджени ишбышда хабаравъу. Хусусан Каспийске «Саджигэй террорус эксина» маъаIллимаршиниме ва таIгьсилни ташкилатбышди чIакIынбышдиме форум илгъечIу. Гойнехьинне Буйнакскни районе «Джегьил’ суIл’гьчий -2025» тадбыр вухьа. Манчее кьоIни ваIщелхъа авабкьурни джегьилерше иштыракау. Дербенте джурабаджурайн акциебы илгъечIу. СМИ терроризмайс ва экстремизмайс эксинан 3 аазырыле агъаллан материалбы еррашмишау, 30 видеороликбы гьагу.
Россиейни КьаIгьрамане Энвер Набиеве къейдаийнки, къийнийни шарааитбышил’ ватанпарасвал’ни тербиейна кьиймат къаткъатна хаIбхъоохьи. Манкъуни увгьойка, Дагъыстаныхъад хаIдын таарых водун. Манчее йыIкьнекна джига йишди баба-дидершини игитийваллайн авхъаахъа. Манбы джегьилерше чечнайс алятIас ыккан.
Дагъыстанни муфтийе шейх АIгьмад-Эфендий АIбдулаеве маджлисейхъа сабыйнбышилхъа мураджият гьаъанкъаI гыргын садибын месалабы гьаллаъас гьазирра ыхьай агъмишау. Республикайни хаIрынкъве манкъухъаб халкьни арайл’ хаIбна гьуIрмат вухьай увгьо. Манкъве дагъамни вахтал’ гьаммаше джус кумаг гьувойхъа гора муфтийис миннатдарийвалла бил’диравъу.
Хъийгъа джуваб Россиейни ХааIрни муфтийис ТIаIл’гьат Таджуддиныс гьуво. Манкъуни джуваббышихъа гор, къийна СВО мыга-мыгас гьуво джурайл’ни динбышиди эл’черше къуллухааъа. Мани душманыкани даIвъийе имамаршиныд хаIдын иштырак водун. Манкъве джуни чыхышее хаIбна фагьым джаванаршини арайл’ни терроризмайкени ва экстремизмайкени профилактикайни ишис ва ватанпарарасни тербиейс гьуво.
Маджлисни аIхрее Дагъыстанни хаIрынкъве мееб хаIдда миллетбынани Россиейниме гаф вуккуйни темабышда вааджибыйвалла агъмишавъу ва гыргынбышикIле республикейхъа чакба аблева увгьо.
