Гьар сен сентябырьни 27-чил’ йишди оIлкее тербиечейрше джони саIнаъатни байрамын йигъ алгъайгьи. Мани йигъ цIедда 1863-ъэсди сен алгъайгьи гибгъыл. Манке Санкт-Петербургни шагьарее сифтыйн ушахаршин бахче ишлемишехьи гидгъыл. Къийна Россиейл’ йицIни аазырбышиле агъаллан ушахбахчебы водунбы.
Тербиечий геер гьуIрматыквана инсан ворна. Хизанейнче джуравхьайн хурун ушахар цIебба маIнкъысахъа хъавайли. Манбыше ушахаршини аIрайл’ хизанылхъан, саджигейни гьамбазаршилхъан, геледжагъылхъан мугьуIбый аIшкьеймишаъа. Бахчейхъа хъабыйникул’фатбышис одкIуний, хъаIдхъый, шикыл’бы цIыцIауй, гьуваагый хаIдхъаъа. Са джувабыква, эгьес эйхьи, тербиейчерше джони ыIгьтеехъа хъувойни ушахаршис ед’валлла гьааъа.
Тербиечийн къык раIгьатда къазанмишаъан къык дешодун. Сабаранбыше эйгьенки, йигъыс ушахаршиква гьуваагый, ийкырый, шикыл’бы цIыцIауй, одхьуний гьувой, манбы къалявъуй дагъамна ишне? Манбы тербиечийе вуккеккани ишина кьиймат дяаIцани инсанарше гьаъан ихтелетбы водунбы. Мани саIнаъатни ийессибыше ушахаршис тербие гьувойле гъайре, хаIдда медын ишбыд ыккекканбы. Мани сардан манбыше тербийечерше кул’фатбышди дёлесинбышиква алаакьабы къурмишаъа, мыIслягьатбы ыккекка, соцсетьбышее джо вуккеккани ишбышди гьаIкIее хабар гьооли. Няъас увгьойе, тербиечий раIгьымыквана инсан йихьес йиккан. Мана ушахаршина гьам тербиечий, гьам гьамбаз, гьамыр ед’ ворна.
Гыргын манбы хассятбы къийнийни йишди макьалайни кьаIгьраманыхъад водунбы. Ман джуваббы МагьаIчкъалайни №85-ъэсди «Золотая рыбка» ушахаршини бахчее чалышмишейхьени тербиечий Наврузова Замиля ЫIсайни йищес аидда водунбы.
З. Наврузовае ман санаъаIт гьаъан 12 сен водун. МаIнкъее шаквани горушее джес гыранни пешейке гаф гьааъанкъаI увгьойн: «Гьинчиле хаIдда сенбына гьихъа зы ушахаршини бахчее тербиечийн саIнаъат гьаъава инанмишейхьес дешдий. КIыл’валее зы дохтурыйвала хъаIбхъас фыкрей йихьа. Амма зас ушахаршин бахче кьисматхьа. Тезера ишлемишейхьи гиргъылыйнкъаI, хаIдда дагъамийваллабы ыхьа. Манке зы чекынмышеехьи йихьа. Къийна аIрейнче хаIбба вахт абкIынийле хъийгъа, зы сечмишауйни саIнаъатыле разийра ворна. Гьар йигъыл’ ишилхъа хъарыйнкъаI, акьвал’ аIхъанайкван ушахар къавджуйнкъаI йизын йикI’ шадехьен. Манбы заква хуIва абакIа, дёлесна инсанхьинне кьабыл’ гьейъа. Манбышди аIрайл’ закIле зы хошбахт инсанхьинне къейджи».
Замиля Наврузовайни увгьойка, тербиечийни санаъаIтыле йидж пашманра дешорна. ЦIерра ушахаршини бахчейхъа ишлемишийхьес хъарыйнкъаI, мааъар геер айхуй фыкрее ыхьа деш. АIрейнче сенбы адкIынийле хъийгъа, йизын мани саIнаъатылхъан аIшкь, гьавас гуджлемишхьайн. Мани карее зас хаIдын кумаг бахчейни хаIрыкъни кумагчее, методист Наиля Хайбаллаевае гьуво. МаIнкъее зас уфтанба иш къурмишааъас хаIдхъау. Манчини аIрее ушахаршиква ишлемишийхьес, манбышис ацIаал’ гьелес, хъаIдхъас, джурабаджурайн оIюнбы алгъагьас гьагу. Мани карее зы маIнкъыс миннатдарийвалла агъмишааъа.
— Югна тербиечий йихьесдимее, гыргынчиле гьихъа гъу сечмишауйни саIнаъатылхъан мугьуIб гьагвас ыккан. Гойне ушахаршис декканан гьаъас ыккан деш. Манбышиквана миз авайкее, гъу ушахаршис энки дёлесна инсан йихьес, — З. Наврузовае эйгьи.
МаIнкъыхъаб ишлемишейхьени ушахаршини бахчейни коллективей хаIбна гьуIрмат вобна. ГыргынбышикIле мана ишилхъа гьавас гьагвана, лазымынкъус кумаг гьелес гьаIзирнана инсанхьинне ейцIа. Гьелбетде манчини аIрайл’ кьомана джига, ушахаршис гьаагвани къайгъуйн авхъааххъа.
Шаквани ихтелетее Замиля Наврузовае джен гьамбазар саIнаъатни байрамни йигъыква табрик гьавъу. МаIнкъее къийна тербиечийни саIнаъатыс къуллухааъани инсанаршис югун дилягбы гьеххъы, джанана сагъвалла ва угъурбы аIрзау.
«НУР» кIазетни редакциейныд лазымна ва дагъамна пеше гьааъанбы байрамни йигъыква табрикааъанбы!
