Ноябрьни йихьынчил’ МагьаIчкъале, «Россия – йизын таарых» музейе «Мизяаршина сува» кинойн цIеддыйн гьагуй илгъечIу.

Дагъыстанни мизяаршини гьаIкIеедын кино МаскIав ешемишехьени режиссере Родион ЫIсмаилове гьазираъы. Мани ишее манкъус джуни съемочный дестейн ва джигайл’ ешемишоохьени хивынбыше, ааIлимарше, мизени устадарше кумагаъы.
Кинойн цIыцIаый кьоIдле сенна адкIын. Родион ЫIсмаилов джуни кино цIыцIаъани дестейква мани вахтал’ Дагъыстан Республикайни 42 районее ва 300 агъаллани хиваршее вухьа. Мааъаб манбы агъсаххъаларшиква, джегьилершиква, ешли адамершиква, едаршиква ва ушахаршиква горушмишивхьа. Манбышиква едини мизел’ гафбы гьаъы, интервьюбы алетIу, шечIбышихъа кIырыгяххъы. Манчиле гъайре дагъыстанни миллетбышин йиссейн аIдатбы, оIгийл аляъан тюлибы, таналхъа хъаъан ыIмаратбы ва йиссейн тиклибы гьагу. Джурабаджур ыIмрека, ешайишиква, дагъамийвал’бышика багълыданани суалбышда макьсаб ашкаравъу ва манчин сабаббы ацIахьа.
Дагъыстан хаIдда сувабынана республика джаб дешобна, мана мизяаршина сува вобна. Къийна йишди республике 32 мизяаршил’ юшенаъан инсанар ешемишебаххьи вобунбы. Сабара ааIлимаршини увгьойква, республике 56 мизяаршил’ юшенаъан инсанар ешемишебаххьи вобунбы.
Анджах дагъыстанын мизяарый , дагъыстанни миллетбышин мизяар джурайн карбы водунбы. Дагъыстанын мизяар 26 вобна, дагъыстанни миллетбышин мизяр 32 (56) водунбы.
Адабиятни мизяаршиле гъайре дагъыстанни миллетбышди мизяаршихъад 120 лугъадбы водунбы. Манбы гыргынбы са хаIбни тIучеедын тIетI’бы водунбы.
Эле гьамани «Мизяаршина сува» кинойна метлеб, мизяаршина вааджибыйвалла ашкаравъуй ва манбы гьуваджий вобна. Гьар миз, гьар лугъад Дагъыстанва эйгьени хавын са карпыч водун. Мизяар джурайнбы ыхьейид, гьиняъаб ешемишоохьени инсанаршин хасиятбы, гивъур-сугъоцый, фыкырбы ва ешайиш акаран водун. Къийна Дагъыстанеедынбы мееган хаIдда мизяарнан миллетбы ешемишехьен не республика, не оIлка дюнйейл’ дешин, нейид миллетбы сана-санкъуква муIгьуббатыква саджигее ешемишехьен гьоIкумат яраб ыхьее.
Кино гьагвассе гьихъа, режиссере Радион ЫIсмаилове кинойн таарых юшенаъы. Манчина метлеб гьиджойий вухьа ва шаваайий ман цIыцIаъасда мислягьаIт гьувы. Гойне манкъвее джус кумагаъыйн дагъыстанлыбы утагъни майдамахъа хъобтIул. Гьаарункъуни дойилхъа югун джуваббы увгьы.
Манчиле хъийгъа кино тамашейс гьагу. Ман саъаIтнайий сурана цIыцIахьа. Тамашейс абыйнбы разийба авху. Гьаарункъвее джус тезе Дагъыстан ачмишаъы. Киное иштыракаъанбышди аIрее йишди цIаIхбышин эл’чера муслагъалий МаIгьаммад МаIгьаррамов , мишлешелий СаIлигь Мамедов сайир мерна йишда миллетна дих ыхьа. Манбыше цIаIхни мизел’ джони миллетни мизени, таарыхни, ешайишни, дагъамийвал’бышди гьаIкIеедын маIълумат гьувы.
Хааишаъан гыргынкъус, мани кинойхъа иляакас. Манчее хаIдданни ваджибни суалбышисын джаваббы шосаххъа авайкес.