«Нур» кIазетни редакциейхъад СВО воохьени эскераршиква, манбышди хизанбышиква горушбы алгъайгьен югун аIдат водун. Гьайни йигъбышее ши Калел’ни хивее ешемишехьени СВО-ни иштыракчийка Къараев Тарлан АIлийни духайква хъызаахы ва кIазет хъаIдаххъанбы манкъукани горушни гьаIкеена хабарааъас.
— Эвеле шу хошгелдий. Зы аIрсее гьау хаахъа абыйхъа гора, шокIле сагъулва эйгьи. Мани карее зы гьаммаше «Нур» кIазетни коллективыс ахтына кьиймат гьооли. Шу ненкеджаб СВО иштыракчер кIеливханааъа дешоб. Манаб йишдимее хаIбна ишобна. КIазетни сайфабышее хаIдда манбышис къадсырыйн макьаалабы растына хъайли. Гойне хьинне, вушди мухбирарше мааъаб воохьени йишди эл’ни джаванаршиква гьар вахтал’ алаакьабы аххъаххъанбы. Манбышда вазият ваацIоохьена. Маныд йишдимее хошда водун. ШокIле ацIан, зы гьинчиле сабара вахтна гьихъа Украинайни миллетчиршиквани вурушбышди санчее йыIкьра яраламишхьана. Манчиле хъийгъа хил’дже вахтна госпиталее маалиджебышей ыхьа. Бабатхьамее, зы меер йыIкьалхъа саркIыл’. ГьаIшде зы сабара йигъбышис истирагьаIтыс хъары. ХаIббанана вахт хизаныква алгъаагьа. Манчиле гъайре, хаадын ишбы къеджи. Зас гьувойн йигъбы кIыл’да ыхьайхъа гора, СВО сакIалассе назарее аххъыйн ишбы быкыраъас чалышмишехьи.
— ШакIле ацIан, йигъын до цIебба Дагъыстанейнче мобилизациейхъа гябкIыйнбышди джаргее ыхьа. Манке ваквасана саджигее СВО хаIбба Дагъыстанейнче джаванар абкIын. Манбышда шас хабар гьевле.
— Зы 2022-ъэсди сенни сентябрьни вуза мобилизациейхъа гирхьу. Ман цIеддыйн ва аIхырейдын джаванар эскерейхъа хъоотIалан мобилизация ыхьа. Кагъыз хъадымее , нишихъаджар ил’дяккы увгьойни адресейхъа гьирхьыл’на. Ши СВО оIтирааъассе гьихъа Каспиийскни флотилиейни марказее гьаIзирийвалла илгъевчIу. Мааъаб хаIбба дагъыстанлыбы вухьа. Гьел’бетде, манбышди аIрайл’ цIаIхбышин джаванарыб вухьайнбы. Манбышиквана цIеббыйна танышийвалла йизда мааъаб вухьа. Марказее шас сабара гагьна эскерин саIнаъатын къулай хаIдхъау. Манчиле хъийгъа ши фронтейхъа абкIын. ЦIебба Дагъыстанэйнчен джегьилершин геллесынбы саджигэй вухьа. Гойне хьинне гьаарна са суралхъа аркIын. Манчихъа ил’дяакы, къийнаб ши сана-санкъуква алаакьабы акIанау деш, связейхъа хъигъейбачIенбы. ЭкIда-экIда зенгбы гьаъанбы, вазият ваацIоохьена. Шукур Аллагьылхъа, манбышдаб саламатийвалла вобна. Мобилизациейхъа гябкIыйни джаванаршикан захъад лап югун алаакьабы водунбы. АIрабирба зы манбышиква СВО растына хъайлена. Манбышикеб дешда девканна хабар.
— Къийна СВО хаIбба джурабаджурайни миллетбышди джаванарше иштыракаъа. Манбышикван алаакьабы водунбыне?
— Сабара гагьыле СВО гидгъылыйн ёьудле сен быкырхьес. Мани сенбышее зы хаIбба Россиейл’ ешемишоохьени халкьбышди джаванаршиква растына хъары. Къийна манбышди аIрайл’ захъаб хаIбба гьамбазар вобунбы. СВО ши са хизанын духйебы хьинне ешемишоохьи. Йишда иш мыга-мыгайс гьуво оIлкайна садибийвалла гьувааджий вобна. Гойне хьиннед, дагъамийвалейхъа гирхьуйни гьамбазыс, камандираршис кумаг гьувой водун. Манбышикван захъад гьаммаше югун алаакьабы ыхьайнбы. Геледжагъылид водун хьинне ахвасын.
— Хусуси ярахна даIвъий ал’гъааIни нени шагьарбышейне гъу ыхьа ва фронтыл’ вазият наIгьбый?
— Зы хаIдданани шагьарбышее ыхьа. Запорожье, Курск, Сум, Донецк шагьарбы миллетчершике азадаъани вурушбышда иштыракчий ворна. Гойне хьинне сабара вахтна Херсонни вилаетылир ыхьана. Ши экIда-экIда джигабы ва шагьарбы бадалаъа. Зы ыхьайни шагьарбышин, районбышин, хиваршин сиягьый хаIдын водун. Камандирарше няхъае йаIххъыл’ гьааъа, ши махъа аттамишоохьенбы. ГьаIшдийни даIвъийн къайдабы медынбы водунбы. ХаIбна фагьам дронбышис гьооли. ШакIле ацIан, ши гьаIхълыба вобунбы ва умудуква гьихъа аIл’гьаанбы. Миллетчерше аххъыйн торпахбы шагьарбы, районбы, хивар йыIкьаIлхъа аляатIанбы. Мана иш вуккейсдимее шахъад нишикенаджаб кеситийвалла дешда. Техника, ярах, дронбы душманаршинчиле къат-къатна гуджнака водунбы. Манчини кумагыка ши джомардба вурушбы ыккекканбы.
— Тарлан, дих вая адамий эскерейнанкъаI, хаабынбыше хаIм-йигъна манбышин хаджалат гьаъа. АцIахьес ыкканий, нимее чакране хизаныква вас хъызаххас кьисматехьи?
— Йигъын ихтелет гьаIкIен водун. Ши сеней кьоIни элеес истирагьаIтыс къоокка. АIхырейни элеес зы гьайни сенни мартни вуза хааъар ыхьа. Манчиле хъийгъа аIрейнче молюбле ваз абкIын. КьоIдле уIл’джум гьауйле хъийгъа, йыIкьаIлхъа сивийкIал. Са хъары къеджи, сайир аIл’гьааIсда вахт хъабы гьивийхьарна. Хаадын ишбы къаджес геллесди вахтал’ усылэхьи деш. Мани карее йизди хизаныс хаIдын кумаг достарше, гогьар-гьамбазарше гьаъа. Аллагье джон джанбы сагъда гьаъанбы. Манбышиле зы нимеехьей разийра ворна. Манбы гьар вахтал’ хыл’ авхъас гьаIзирба воохьи.
— ЗакIле ацIан, йигъни игитийваллайс камандирарше вас гьаммаше ахтына кьиймат гьооли вухьай. Йигъни коксил’ закIле хаIдда наградабы къеджи. Манбы ненбыне?
— СВО зы инженер-сапёр ворна. Мана энки йыIкьна иш вобна. Сапёрыхъад саIгьв къайиккас иджааза дешин. Няъас увгьее, терсинаба иш къавджей, гъу сагъра ахвас деш. Манчини алла ши гьаммаше аIгьтиятыква воохьи. Эскерар гьихъа ал’гьаIссе, ши манбышда йаIхъ темизяаъа. Зы некеджад наградабы гозетяу деш. Къийнийни йигъыл’ захъад «За разминирование», Участник специальной операции» ва сабара Миноборонайн гьувойн медалбы ва таIрыфын кагъызбы водунбы.
— Зы гьаммаше эйгьен, къийнад текрар гьаъан: гьаIкIен ватанпарварар, гьаIкIен игитер СВО воохьен эскерар вобунбы.
— Ватан инсаныс аIзизба вобна. Манчина садибийвалла гьувааджий, йыIкьаIле хъооIни насылбышис мана саламатба хъувой йишди гыргынкъун бордж водун. Мана иш йишди джигайл’ ненкеджаб къырагъыле хъарынкъве гьааъас деш.
— Тарлан, шаква горушмишхьес вахт тIабалавъуйхъа гора, сагъул. Вас джанана сагъвалла ва СВО экIда таамхьа хизанеехъа салес кьисматаъа.
— Шосуд сагъул. Ши чалышмишувхьесынбы гьокуIматын, инсанарше шас гьагуйн инам аIхырейхъамее быкыраъас. Ватан миллетчершике ва манбышис кумагыс хаариджийле абыйни эскераршике темизяаъас. Захъад инам водун, ман йигъ аIкьанада дешодун!
