Гьайни йигъыбышил’ Дагъыстанни девлет политехни университетни телябабыше Къузайл’ни Кавказыл’ ешемшоохьени миллетбышин аIдатбы гьагван «Этнова» донан фестиваль алгъавгьу. Мааъад Дагъыстанни къонши республикабышейнче ва крайбышиле абыйни мигьманарше иштыракау.
Йигъынджагъ уфтанни маIънийбышиквайий макьамбышиква гидгъыл. Майдамейхъа сабыйни телябабыше, маъаIллимарше, абыйни мигьманарше мыкIаршиква фестивалыс ярашугъ гьуво.
«Этнова» фестиваль ДДТУ-ни ректоре Назим Баламирзоеве ачухау. Манкъве махъа сабыйнбышис хошгелдий гьавъуйле хъийгъа, увгьойн: «Университете инягьдын йигъынджагъ алгъайгьен 10 сен водун. Сениле-сенилхъа фестивале иштыракаъанни ааIли мактаббышин сай хаIдхъехьи. Гьини элеесда маджлис ши росмолодежь ташкилатын алятIуйни грантни кумагыка алгъаагьа. Къийна йишди шадлыгъбышее 17 ааIли мактаббыше иштыракаъа. Манбышди арее хаIббананбы Къузайл’ни Кавказни республикабышейнче абыйнбы вобунбы. ГьаIшдийни фестивалын телябабышди аIрайл’на доствалла гуджлемишааъа. Манчин джаванар саджигейхъа сааъа».
Гойне хьинне фестивалей иштыракаъанбышис грамотабы гьуво. Манчис лайикьба вухьайнбышин геллесынбы абыйн мигьманар вухьа.
Фестиваль хьебни этапыква илгъечIу. Манбы — этномагьаIллабы, миллетбышин мыкIар ва миллетбышин маIънийбы. Дагъыстанни миллетбышин аIдатбы, хорагбы, маIънийбы, мыкIар университетни факультетбыше гьаIзирау. Компьютерни технологиейни ва гьыIсабаъани техникайни факультетни телябабыше цIаIхни халкьыква багълыданан аIдатбыйий хорагбы тешкиляу.
ЦIаIхни халкьни майдама телябабыше йиссейни аIдатбышиква цыма бег’на гяъу. Манчиле хъийгъа даватбышейхъа абыйнбы бегисхъа баракайс абы. Телябабыше гьагуйни аIдатбышис джурайн ярашугъ бег’ни утагъейни нуIъматбышиквани болни истолун гьуво. Мани йигъыл’ махъа сабыйнбышихъад плавыке, долмабышике, , алабышди кьуцIершике, астайке дад гьаъасын имканбы ыхьайнбы. Майдамейхъа сабыйни мигьманаршис гьам цIаIхни миллетын аIдатбы, гьамыд хорагбы кьабыл’хьайнбы.
Керимов Керим компьютерни технологиейни ва гыIсабаъани техникайни факультетна ёкьудъэсди курсна теляба ворна. Манкъве цIаIхни халкьын майдам гьаIзираъасдимее хаIдын иштыракау. Манкъуни увгьойка, вудж фестивалыс гьаIзирехьена кьоIбле вазний. Мани карее хаIдын кумаг зас йизди хаабынбыше ва дёлесынбыше гьуво. Гойне хьинне, факультете хъаIдаххъани телябабышис сагъулва эгьес ыккан. Манбышин иштыракыд кIылин ыхьа деш.
Фестивалыс ярашугъ садъэсди курсни телябае Линда Делиевае гьавъуйни цIаIхни мизел’ни маIънийн гьуво. Линда чечен миллетна йиш ворна. МаIнкъей авазыква гьавъуйни цIаIхни мизел’ни маIънийс жюрийн е югна кьиймат гьуво.
«Этнова» фестивалейхъа абыйн мигьманар къаджейнчиле разийба авху. Манбыше геледжагъыл’ мееб аблесынва къейдау.
