Ноябрьни 25-чил Дагъыстанни хаIрынкъве Сергей Меликове едяршини Йигъыс къадсырыйни маджлисе иштыракау.
Маджлис исламни бизнесни ассамблеяйни президентни Марат Кабаевни кумагыка къурмишавъу.
Мигьманаршини арее Россиейни КьаIгьраманаршин ва СВО-ни иштыракчершин едяр, хаIбба ушахарнан едяр, джаIмаъатчий къуллухчер вухьа.
«Йишин горуш мугьуIбука ва къайгъыйква гяцIыйни едяршини Йигъыни байрамыле гьихъа илгъечIи водун. Мани ачухни сифатын шас гудж гьооли, дагъамийвал’бышди ыIгьтейнче хъавалес, угъурбышилхъа гьивхьарас, югвалла гьааъас, Ватан вуккыйканас кумагаъа.
Къийна ши югунчилхъани умудбышиква ешемишоохьи вобунбы. Энки гуджнакана едяршина дуъаI ушахаршини саламатыйваликва багълыба. Манчини аллад, гьасре гыргын гичIбы шале аIкьанада ихьедженбы ва едяршин йикIейдын арзубы быкырхьедженбы. СуIл’гь, раIгьимийвалла ва энки югун дилягбы шос ва вушди дёлесынбышис!» — регионни хаIрынкъве увгьо.
Манкъве агъмишаийнки, СВО-ни эскераршина игитийвалла дек’, ед’ни тербиейка алаакьаба.
«Едяршис гьуIрмат гьавъуй гьар вахтал’ дагъыстанныбышис ааидда ыхьа. Таарыхейнче игит едарше душманукани мубаризейхъа адамейр къалхмишавъийн хаIдда мисалабы адляъас эйхьи. ГьаIшдед ман гьаIмагьад водун. Къийна,шу, аIзизын едяр, энки югни миннатдарийвалла агъмишааъани джуваббышис лайикьба вобунбы. Хусуси ярахни даIвъийе игитийвалла гьаагвани йишди ватанэгьлершис вушди дилягбыше йикI’бы гьели. Вушди сабырыс ва рыIгьни кьувватыс ши ахтыйна кьиймат гьооли», — республикайни башчийе агъмишау.
Къийнийни Дагъыстанни хаIрынкъукани горушейхъа ёкьни ва хьони СВО-ни иштыракчершис тербие гьувойн едяр хъобтIул вобунбы.
Регионни башчийе йикIел’хъаляийнки, республике СВО-ни иштыракчершис ва манбышди хизанбышис кумаг гьувойниме гьаракатукана иш гьабтIыйни игитершини едярше, йичибыше, сипIрыйерше къооджи вобна. Мани едарше, дагъамийвал’бышихъа ил’дяакы, хаIбна заIгьмат гьааъа.
Сергей Меликове гьайни йигъбышее Къызларни районе ачмишаийни Едигарни багъни гьаIкIеена хабаравъу ва ман проект ишекечирмишаийни Хадижат Сайкумовайс хошгел’ди гьавъу.
Байрамейни мигьманаршини арее йицIынчиле агъаллани ушахарнан едярыб вухьа. Манбы – Асият МаIгьаммадова, Руманият Шамхалова, Саврижат Рамазанова, Наида Татаева.
«Йишди республике 125 аазырыле агъаллан хаIбба ушахарнан хизанбы водунбы. Россиейни президенте Владимир Владимирович Путине увгьойн: « ХаIбба ушахарнани хизане тербие алябтIуйнбышилхъа гьаIкIедад далбы хъизарас эйхьи. Манбыше ненкеджад не достар, не ишилин гьамбазар, не Ватан къелик’ авхъа гьевлес деш», — регионни хаIрынкъве увгьо.
Проектбы адчыйс Сергей Меликове хайирхагь Марат Кабаевыс миннатдарийвалла агъмишавъу. Исламни бизнесни ассамблеяйни президенте байрамейхъа вудж хъортIулуйс ташаккурийвалла бил’диравъу. Манкъуни увгьойка, югун ишбы гьаммаше къаджес ыккан ва гьаммаше едяршина гьуIрмат авхъас вуккан.
Республикайни муфтийе шейх АIгьмад Эфендий АIбдулаеве гьарни инсанни ыIмрее едина ваджибыйвалла йикIел’хъавалявъу. Манкъуни джуваббышихъа гора, Дагъыстан машгьур шааираршина, ааIлимаршина, спортсменаршина, динэгьлершина Ватан вухьай гыргынанкъаI ацIа водун. Ши гьаммаше йикIел’ аххъас ыккан: нимее ахтыйни дараджайлхъа гьибхьырейиб, ши ухоохуна ед’ ворна. Едяр гьуIрматыс лайикьба вобунбы. Гыргыни едяршис джанана сагъвалла,йикIена шадвалла, сабыр, хылийна ыIмыр ва ва экIда СВО таамхьай аIрзуламишаъа,- муфтийе увгьо.
ЦIеррыйни Россиейни КьаIгьраманни едее Сапижат Мазаевае,13 ушахаршини едее Саврижат Рамазановае, СВО гьабтIыйни кьоIни эскераршини едее Любовь Поповае республикайни башчийс гьаммаше эскераршис ва манбышди хизанбышис кумаг гьувойс миннатдарийвалла агъмишавъу.
Маджлисни аIхрее Сергей Меликове ушахар йаIгь-ламысыка чIакIы хъавъуйхъа гора едяршис хаIдын сагъулва увгьо.
