Къийна СВО Россиейни эскерарше Украинайн ярахын кьувватбы дагъылмишаъа гьихъа ал’гьааI водунбы. Манбыше гьаIракатыква миллетчерше аххъыйн шагьарбыйий районбы йыIкьаIлхъа аляатIа. Мани карее йишди эскерарше джона джомардийвалла, дирибашийвалла, кьаIгьраманийвалла гьаагва.
ГьаIджимусаев МагьаIммад-Салам АIлийна дих СВО гидгъылни цIеддыйни йигъылее мааъар ворна. Манкъве джуни гьамбазаршиква душманыкан вурушбы ыккекка, камандираршин амырбы быкырааъа. Игит эскерарше йишди хаIдни оIлкайна садибийвалла гьувааджи.
МагьаIммад-Салам ГьаIджимусаев 1978 -ъэсди сен Рутул районни МуIхаIхни хивее едике ыхьа. Хивын дагъайдни сыныфбышин мактаб быкырау, хъаIдхъый давамаъас ДжинаIгъни хивейхъа аркIын. КьоIдле сенна манкъве мааъад хъаIдхъы. Алидни сыныфбышин мактаб хъаIдхъас манкъус Камбулатни хивни йыIкьнекни мактабее кьисматхьа. Мактаб быкырау, саIнаъатбы Дагъыстанни девлет педагъожи университетни экологиейнийий географиейни факультетейхъа хъуво. Угъатыква ман ааIли мактаб таамау.2000-2006-ъэсди сенбышее маъаIллимийвалла гьавъу. Манчиле хъийгъыйн сенбы манкъун эскерни пешейква багълыда.
2012-ъэсди сен М-С. ГьаIджимусаеве цIеддыйн контракт одкIун. Манкъве къонши Чечен Республикайни военный частбышди санчее къуллухааъа ишлемишехьи гиргъыл’. СВО гидгъылыйква, мана джуни гьамбазаршиква махъа аркIын. МагьаIммад-Салам ГьаIджимусаев хаIдданан шагьарбыйий районбы азадаъани вурушбышда иштыракчий ворна. Манчини аIрайл’ энки дагъамынбы цIеддыйн сен адкIынийн вурушбы ыхьа. Манке йишди эскерарше Энергодарни шагьарее Запорожьейн АЭС душманаршике алятIасдимее хаIдын гьунарбы гьагу. Манкъуни увгьойка, манке адкIынни дагъамни вурушбышее душманаршин дестебы темизда дагъылмишауйнбы.
М-С. ГьаIджимусаевни игитийвалис, гьаIракатыс манкъуни гьамбазарше, командирарше гьаммаше ахтына кьиймат гьооли. Манкъухъад СВО гьагуйни игитийвалис сакIы, гьокуIматни сураке алятIуйн наградабыд водунбы. Мана даIъвый гидгъылыйле хъийгъа, мол’ни элеес махъа гьаркIын. ГьаIшде мана частыл’ ворна. Сабара вахтаке М-С. ГьаIджимусаев меер СВО оIххъаIс гьаIзирехьи.
Заквани ихтелете манкъве са-кьоIдле кал’ма джуква саджигее эскерийвалла вуккеккани цIаIхни халкьни джаванаршини гьаIкIее увгьо. Манкъуни джуваббышихъа гора, манбы гьаIкIен игит эскерар вобунбы. Манбышда гьаарна джомард ва дирибаш эскер ворна. Ши йишди камандирарше гьувойн амырбы быкыраъас гьар вахтал’ гьаIзирба вобунбы. Манбышда ватанпарварийвалла джо къеджени ишбышике ваацIоохьена.
Ихтелетни аIхырее МагьаIммад-Салам ГьаIджимусаеве джаванар ватанпарварийвалла гуджлемишааъас хъобтIул. Манкъве джегьилершилхъа оIлкайлхъан, миллетылхъан ва маданиятылхъан аIшкь ва мугьуIб гуджламишаъас ыкканва мурайиджатау. Манке ши гъамувхьесынбы, гьамыб гыргынбышди аIрайл’ цIеббыйнбы вухьес.
Шинад гыргынбыше хьинне СВО таамхьай гозетяъа. Иншаллагь, ман йыгъ дёлес хъыхьа водун. МагьаIммад-Салам хьиннени игит джаванарше мани карее шас хаIдын умудбы гьели.
