ГьуIрматыкван чоджар, йичибы, аIзизин цIаIхбы! Шос шадни хабарна гафааъас вуккан.Гьайни сенни ноябрьни вуза дагьайдни сыныфбышисын цIаIхни мизен ва адабиятын китаббы: «Алифба» («Букварь») авт. К.З.Омаханов, Гь.Х.Ибрагьимов, Н.Гь.ЫIсаев, «Адабиятын хьаIдхъий» («Литературное чтение»), 2 сыныф, авт. Кь.З.Омаханов, «ЦIаIхна миз», («Цахурский язык») 3 сыныф, авт. Кь.З.Омаханов чапыке хъигъечIу.
Манбы адабиятни мизел’, гьоIкуматын хьаIдхъийн тIабалбы гозетяъа гьазираъы. Тезе киттаббышин къурлыш, гыргын оIл’чибы гозетяъа къурмишаъы. Манчиле гьайре, китаббы тезе методикайква ва манчини усулбышиква гьазираъы. Гыргын китаббышее гьелен дарсбы йишди Россияйл’ (Дагъыстан) ва Азербайджан ешемишехьени миллетыква багълыдананбы водунбы. Манчеедын тапширыгъбыд, адабиятын асарбы йишди ааIлимарше, маъаIллимарше, шааирарше, язычерше одкIунинбы водунбы.
Китаббы чапыке къайиккасда мислягьаIт Дагъыстанни хъаIдхъийни ва ыIлимни министерствайн къавдже. Гойне РФ-ни Просвещениейни министерствайн манчис кьуват гьуво.
Китаббы окIанассе гьихъа хъаIдхъийн программабы урусни мизел’ ва цIаIхни мизел’ гьазираъы. Манчис ааидын китаббы 2010 сен ойкIан гибгьыл. Шукур Аллагьылхъа, цIеббыйна бар алебтIуна. Гьел’бедти , мана иш вахарийна деш вухьа.
Китаббы Дагъыстанни ыIлим ахтармишааъани педагожи институте гьазираъы. Гойне китаббышин хылен язмабы ёхламишаъас Москвеехъа, Санкт-Петербургхьа йаIххъыляьы. Шенбыше иджааза гьувойле хъийгьа, мани китаббышин макетбы МаIгьачкъалэй, «Алеф» донани чапханее гьазираъы. Гойне чапыке къайиккас Грозныйни шагьареехъа , «Грозненский рабочий» чапханеехъа оIтираъы. Мааъад манбы чапыке къайиккы. Къузайни Кавказыл’ са манбышихъад мактаббышисын китаббы къайиккасын иджааза (лицензия) водун.
Мактаббышисын китаббы са быкырни дестейн: ааIлимарше, маIъаллимарше, методистарше, психологарше, художникарше гьазираъа.
Манбышис кумаг редакторарше, корректорарше, дизайнерарше ва мебынбыше гьаъа. Манбы са мотор хьинне ишлемишебахьи.
Гьел’ бедти, маIгьдын китаббы кьайиккасдимее, манчис « кьел’бы» гьаъан ва хыл’авхъаахьан инсанар лазымоохьи.
Мани карее шас кумаг йишди миллетни джаIмаъатчерше, едини мизени терафчерше, РФ -ни Думайни депутатарше, журналистарше, ва мебынбыше джувабыква кумагаъы.
ГыргынкъукIле зы, цIаIхни миллетни ушахарше САГЪУЛ-ВАРУЛ эйгьи.
Къийна ахуйни дагъайдни сыныфбышди китаббышил’ ооъаб ааIлимар: МаIгьараммов М.Д, Къоджаева Ш.ЫI., ЫIсаева З.Н; журналистар АIбдуллаев Б.С., Шамхалов К.Н., Бабаев Ю.И.; шааир Гьамзаев В.М.; маъаIллимар: Асланова Г. Кь., Ибрагьимова М. Д. ишлемишоохьи вобунбы. Инам гьаъас ыккан, манбыше джолхъа алеетIуйн юк аIхреехъаме гьихьараъасын. Сенни аIхреехъассе цIеддыйн хылен язмабы гьазираъы ёхламишаъас хъелес ыккан.
Ман къайиккыйн китаббы, хаIбна иш вобна. Умудааъана, манчин йишди едини мизес маIгькамын диб гиххьес. Манчике дарсбы , ацIаал’бы, билиг, тербия гьам Россияйл’ ( Дагъыстанэй), гьам Азербайджан ешемишоохьени цIаIхбышди ушахарше алеетIас. Аамин!
