Дербентни районейнчена Ярамир Темирханов Россиейна КьаIгьраман ыхьа. «ЧIаIрана хаIне» медал дагъыстанныйс Владимир Путине гьуво. КьаIгьраман ахтыйни доюква джуни телеграм-канале Дагъыстанни хаIрынкъве Сергей Меликове табрикау.
Северск аазад гьааъанкъаI Темирхановни гьаракатбыше манкъуни гьамбазаршис 20 агъаллан душманын ваджибын пунктбы аххъас ва 1500 агъаллан ешайиш хайбы темизяъас кумагау. Манчини аллана хабар ТАСС-ын гьуво.
«Джуни джегьилийвалихъа ил’дяккы, Ярамир Темирханове Россиейни Ярахни Кьувватбышди къошуныс – 6-ди джурайни гвардийни мотострелковый бригадайс хаIбвалла гьааъа. Манкъве хаIбвалла гьааъани къошунын хаIдын натийджебы къазаммишаъа. МаIгьадни угъурбышилхъа таджрубайквани гыргыни камандираршике деш гьивхьарас вааIха. Манкъуни игитийваллайни гьаIкIее зас хаIббананбыше хабаравъу. Ярамирни къошунын нягьаIде кIыл’ни иткибышиква душманын ваджибын пунктбы аляатIа ыхьа, Северск къаттивхьанааъанкъаI иштыракау, нягьаIде энки дагъамын мисалабы гьаллаъа ыхьа. Ярамире гьаммаше вудж гьаIкIена адамий хьинне гьагва ыхьа. Мана ыIгьтибарнана эскер- гьамбаз ва ацIаал’нана камандир ворна. Манкъука янашеба къуллух гьавъуйнбы манкъуни игитийвалиле ва рыIгьни гуджиле маIъатталоохьи.
Дагъыстанныйна къуллухна йаIхъ хаIдданани наградабышиква къейдавъу – хьебни Адамийваллайни орденбышиква, ДНР-ни КьаIгьраманни доюква. Манкъуни дирибаш хассиятбышди гьаIкIее манкъус вахтыле гьихъа полковникын звание гьувойнчиныд ацIараляъан. Ярамир Темирхановун угъурбы оIгийлид йишди Президенте къейд гьаийнбыний. ОIлкайни хаIрынкъве вуджее зенгау ва миннатдарийвалла агъмишавъу. Гьаммаше хьинне, гьоIкуматни регьбере меед эскераршини ва офицераршини балее ахванава субутау.
Йишди машгьур Расул Гьамзатове ойкIананний: «ДаIвъийн чIиейл’ кьаIгьраманар артмишааъа». Мани сардан дагъыстанныбыше СВО цIеддыйни йигъбышиле ман джуваббы ишиква цIайни авуд тасдикьаъа водунбы. Манбыше ненкеджад йаIгь-ламус, шас дёлесын аIдатбы, адаббы кIелиханаъа дешодунбы. Умудааъана, йишди кьаIгьраманни хасиятыс вудж хаIбба ушахарнани хизане хаIрхъыхьайнчин таIъсирау. Дек’ шофирна ишлемишхьа, еде габабы хъехани фабрике заIгьматавъу.
АIзизна Ярамир, гъу йикIеенче ахтыйни званиейква табрикаъа! Йигъни деккис, БуйнатаIли Мисриханни духайс ва едис, Мафият Исинни йищес, хаIдын сагъул. Гъу манбыше гьаIкIени кавказни тербиейква уйгъунра дирибашра хаIрхъау. Ши вале гуянмишоохьенбы!» — регионни хаIрынкъве одкIун.
