Дагъыстан ва сабара Урсиятни вилаетбышил’ ешемишоохьени цIаIхбышда едина Ватан Сувал’на маIгьал вобна. Нена няаъар ешемиш ихьейир, нена ненихье къуллухыл’ ишлемишехьи ихьейир гъу едике ыхьайн джига, йигъни баба-дидерше рыIгь гьувойн джига кIелиханаъас ыккан деш.
Сура асырна гьихъа джамаъаIтна гьаIракатыква ыIмыр ааIн джига, гьаIшде ёхсулхьайн. Сувал’ни маъаIлыл 12 цIаIхбышда хив вухьа. ХаIдданани хиваршее мактаббы, амбулаториебы, сельсоветбы, кIалхозын идаарабы, больницабы, ФАП-бы, поштбы ва медын ташкилатбы ыхьа. 70-80 фааиз инсанаршихъад ишджигабы ыхьа. Совет гьоIкумат дагъылмишхьайле хъийгъа, Сувал’ни маIгьалыл’ ешемишехьени джамаъаIтын ешайиш далыйлхъа ыIхы. ЦIебба джегьилер, хъийгъа джон хизанбы, джохъаб хъигьна джон деккяр едяар кочмшивхьа аIлгьаа гибгъыл.
Сен-сениле хивара кьаIрахъехьи гидгъыл, манчика барабарда хиваршеедын ташкилатбы утIумхьа. ГьоIкуматыхъаб хивар гьуваджесда ва манчис гьаIракат гьелесда программа вухьа деш. Инсанаршихъад тахсир дешин, гьаарна джуни гынейни хъийгьна хъигъечIу аркIын. Анджах, дюнйе илийкIаран кар водун. Къийхъа йишди вукIлелхъа гьиджойий хъалес, шавукIледжад аIца дешодун. Мункум вобна, ши меб Аллагье шас гьувойни Ватанылхъа савкIалас ва Аллагье шас гьувойни мизел’ йишонааъас. Таарыхе хаIдда маIгьдын гьаIдисабы ыхьайнбы, Манчихъа гора, ши няаъаб ешемишивхьее, агар шахъад мункумбы водхьее, хав-уджагъ хивеедын гьуваджес ыккан. Хиваршее шарааитбы яратмишаъас ыккан.
Ман ша Аллагь , маIгьдын гьаIракатнан игитера йишди миллетыхъаб вобунбы. Манбышди гьаIкIее ши «Нур» кIазете ва медни электрон СМИ-ше ойкIанан ва хабар гьоолена.
Дагъыстанни сагъламыйвалла гозетяаъани министерствеехъа ЦIаIхни хивеехъа ФАП гьеххъан кагъызбы одкIунийле хъийгъа, мислягьаIтеехъа хъабыйнбы ЦIаIхее модульный ФАП аляъас. Гыргын кагъыз-къугъыз гьазираъыйле хъийгъа, иш гибгъылна. Министерствеехъан кагъызбы «НУР» кIазетни редакциее гьазираъы. Ман ишбы гьаIракатеехъа джамаъаIтчее ГьаIзрат Гераеве адчы.
Манчини гьаIкIеена шас хабар тезера сечмишауйни ЦIаIхни администрациейни хаIрункъвее Рамазан Шихамирове гьуво :
«Гьайни сен ши ФАП ЦIаIхни хивее гиххьесын джига гьуво. Ман ЦIаIхни хивни йыIкьнекни мактабни яныл’ гиххьес. ОIгийл’ мани джигее кIалхозын фермабы ыхьа. Ши мислягьаIтеехъа хъабыйнбы, манбы хъотталас ва мааъад ФАП гиххьесын майдам гьазираъас. Гьайни декабрьни вуза ман йиссейн аваданий хъоттулыйн. Мани каре шас техникайкван ва янаджагъыкван кумаг Дагъавтодорни хаIрункъуни маIъвыне Замир УIмаханове , Рутул районни йаIхъбышди ташкилатни хаIрункъве, ДР-ни Маджлисни депутате ШаIфи АIбдуллаеве гьуво. Имаджийс, кьома ХаIнагьмад Гераевыква саджигее хивын джамаъаIт хъигъеIу. Манбышис кумагаъас Мишлешни ва Миххьейни хивенче адамера абы. Къийна майдам гьазирда водун. Гьайни дёлесийвале ФАП аляъа гивгъаласынбы. Инам гьаъан, мана иш цIыIцавхьес деш. ФАП ачухаъанкъаI, гыргынкъус хабар гьевлесда Мани ФАП ЦаIхни администрациейни чIырынбышис маалиджебы гьаъас ».
