Къийна Россиейни эскерарше СВО миллетчершиква вуккеккани вурушбышее хаIбна игитийвалла гьаагва. Манбыше джони гьаIракатыква, джомардийваликва йишди хаIнни оIлкайна – Россиейна садибыйвалла гьувааджес чалышмишоохьи. Манбыше гьар йигъыс растына хъадайлени дагъамийвал’бышее джона кьаIгьраманийвалла гьаагва.
Гьайни вузани 24-чил’ СВО гидгъылыйн ёкьудле сен быкырхьес. Манбы геед дагъамын сенбы ыхьа. Россиейни ярахни кьувватбыше миллетчерше аххъыйн тррпахбы азадаъасдимее хаIбна иш вукку. .
Хусуси ярахни даIвъийе менни эскераршиква саджигэй Дагъыстанейнчени джаванаршед хаIдын гьунар гьаагва. Манбышди гыргынкъве адамерше хьинне Ватанни гьийдын бордж хъели. Къийнийни йигъыл’ хаIббанан офицерар, прапорщикар ва эскерар гьокуIматни орденбышис ва медалбышис лайикьба къавджу. Манбышди аIрайл’ 18 инсан Россиейн КьаIгьраманар вобунбы.
Муслимов Муслим Джавидна дих, Россиейни КьаIгьраманни доюс лайикьна къаджына энки джаван офицер ыхьа. Мана Дагъыстанейнче КьаIгьраманын до алятIуйнбышди сиягьей 12-ъэсда ыхьа. Муслим мани ахтыйни доюс 2024-ъэсди сен лайикьра къаджы.
Россиейна КьаIгьраман М.Муслимов 1998-ъэсди сен Рутул районе едике ыхьа. Манкъуна дек’, Муслимов Джавид, мани сенбышее Рутул районе сергьадбы къорамишаъани дестейна ишчийний. Муслимын эскерни саIнаъатылхъан гьавас ушахвалиле гидгъыл. Манкъве мактабе хъаIдаххъанкъаI геледжагъыл’ деккини йаIххъын аIл’гьаасди кьарарейхъа хъары.
М.Муслимове мактаб быкыраумее, эскерын саIнаъат алятIасдимее контракт одкIун. Манчиле хъийгъа, военный училищейхъа кьабыл’хьа. Эскерни саIнаъатын къулай хаIдхъыхьайле хъийгъа, манкъве 74 мотострелковый бригаде взводна камандир ишлемишхьа. АIхырейни сенбышее манкъве ротайс хаIбвалла гьавъу.
СВО гидгъылни цIеддыйни йигъыле, Муслим Муслимов джуни гьамабазаршиква мааъар ыхьа. Мана хаIдданани дагъамни вурушбышда иштыракчий ыхьа. Мааъад гьагуйни игитийвалис офицер хаIдданани гьокуIматни орденбышис ва медалбышис лайикьра къаджы. Манбы медаль Суворова, медаль «За харабрость», медаль «За отвагу», орден «За заслуги перед РД» ва сабара медынбы ыхьа. 2024-ъэсди сен манкъус РФ-ни Президентни В.Путинни амрыква Россиейни КьаIгьраманын до гьуво.
2026-ъэсди сен феврал’ни 2-чил’ Россиейна КьаIгьраман М.Муслимов вурушбышди санчее дагъамра яраламишхьана. Ман кьаIгьраманын аIхырейдын вуруш ыхьа. Манкъве са игит хьинне, Ватанни гьийдын бордж хъеленкъаI джан гьуво. М.Муслимовын джаван ешбышее дюнйейле аркIыний хаIдын итки ыхьа.
Манчика багълыда республикайни хаIрынкъве кьаIгьраманни делесынбышис башсагълыгъыйвалла гьооленкъаI увгьойн: «Муслим гьаIкIена игит офицер ыхьа. Мана къийна йишди аIрайл’ дехьейир, манкъун до йишди йикIел’ водун. Мана са офицер ва кьаIгьраман хьинне гьаммаше йишди йикIел’ ихьес».
Эйгьи вод: «Игит хъикIвейир, манкъун до ахван». КьаIгьраман М.Муслимовын до Россиейни таарыхей гьаммашийс ахвасын.
