Гьар сен Россиейл, февральни 23-чил , Ватан къорамишааъанбышин йигъ алгъайгьи. Ман гьоIкуматын ваджибни байрамбышин са водун.
Байрамбы кьаIрадни джигайл’ арайлхъа хъадайленбы деш. Манчихъад хылийвалис цIыцIахьен таарых эйхьен. Ман джуваббы Ватан къорамишааъанбышди байрамысыд ааидда водунбы. Йишди оIлкайни гьарни хизанее джон кьаIгьраманар вобунбы. Манбыше джурабаджурайни даIвъийбышее иштыракау ва Ватанниме джанбы гьуво.
ХаIбни Ватанни даIвъийни вахтал’ 23 февральни байрамылхъа хаIбна фагьым гьооли вухьа. Ман байрам йишди гьоIкуматыл’ къейд гьаъан ваIщеле агъаллан сенбы водунбы. Ман йишдиме гьуIрмат-урватукан байрам гьыIсабехьи.
Ватан гьар инсаныс аIзизба вобна. Мана дарейнанкъаI, манчиниме джан гиххьес ши гьаIзирба. Сабара насылбышее кьаIгьраманийвалла архайле архайлхъа аIлгъааI. МаIгьабни насылбышда са Муслагъни хивейнчена Башироваршина насылобна.
Муслагъни хивейнче ХаIбни Ватанни даIвъийехъа ёкьцIалиле гьеххана игит’ аркIын. Манбышин хаIббананбы сабкIыл деш. Ватан душманыке къорамишааъас аркIынийнбышда са Баширов ШаIъбан ГьаIджимаIгьаммадна дих ыхьа. Мана 1942 сеныле даIвъийни аIхрелхъаме фронтыл’ ыхьа. Отделениейна камандир сержант Баширов 107 стрелковый дивизиейни таркибе вурушмышхьа.
Немец-фашистаршиквани вурушбышди санчее Ш. Баширове хаIбна игитийвалла ва джомардыйвалла гьаагу. Манкъве 15-ре немец эскер гикIу ва 7-ре есирна авхъу. Манбышике кьоIйре офицерар вухьа. Мани кьаIгьраманни гьаракатыс дивизиейни камандире ШаIъбан Баширов гьоIкуматни ШоIгьратни хьебыдъэсди дараджайни орденыс тагдимау. ГьаIйифки, ман орден игитилхъа гьидхьыр деш. Манчихъа ил’дяакы, ХаIбни Ватанни даIвъийна гьаракатукана иштыракчий Башироа ШаIъбан ГьаIджимаIгьаммадна дих гьоIкуматни менни орденбышис ва медалбышис лайикьра къаджы. Мана Ватанни даIвъийни I дараджайни орденна кавалер ыхьа.
Совет гьоIкуматни таарыхни уцIурни варакьбышда сайиб Афганни гьаIдисабышиква багълыба. Мааъад , Ватаныле къырагъыл’, джон интернационал бордж хъеленбышди аIрее цIаIхни миллетын игит’ духйебыб кIыл’ба деш вухьа. Манбышди джаргэй ветеранна дих Идрис Баширов ыхьа. Манкъуни гьаIкIее кIазетни гьийдни нумрее одкIунний.
ГьаIшде архайле архайлхъа аIлгъаани кьаIгьраманийваллайн аIдатбы раIгьматтыгъ ШаIъбан дидейни невабыше, Идрис чоджийни хыдыларше — Баширов МаIгьаммад-Загьир ва Баширов МаIгьаммад-Эмин АIбдулкьадирни духйебыше ва Баширов Мурад Эйвазни духее давамаъа.
МаIгьаммад-Загьире Чечен Республикеени частбышди санчее къуллухааъа вухьа. Украинайл’ СВО гидгъылме мана махъа къахову. Камандирарше гьувойн амырбы лайикьыква ерина етирмишаийхъа гора, мана медалбышис лайикьра къаджы. Манчиле гъайре маIгьарна дих хаIрхъауйс МаIгьаммад-Загьирни ед’ни доюлхъа миннатдарийвалла агъмишааъан кагъыз хъады.
АIбдулкьадир Башировна кьоIръэсда дих МаIгьаммад-Эмин СВО мобилизациейква Волгоградни шагьарейнче оIтирау. Мана украмиллетчершиквани хаIдданани вурушбышда иштыракчий ворна. Манкъуна игитийвалла ва джомардыйвалла гьоIкуматын ахтыйни наградабышиква тасдикьавъу. Манчини аIрее — «За отвагу» ва «Участник специальной военной операции» медалбы.
Насылна дарадже кьаIгьраманийваллайни гьаракатбышиква ахты хъааъана игитбышда сайир М.Э.Баширов ворна. Мурад мобилизациейхъа гябкIуйнбышди сыранэй СВО Къызларгъанче аттамишхьа. Манкъве джуни эмиогълерше ва хаIбба мебынбыше хьинне, ярахни даIвъийни операциее сувахъанныйс аваакIуна дирибашийвалла гьаагва вобна. Камандираршини ва эскер гьамбазаршини аIрайл’ манкъухъаб хаIбна гьуIрмат вобна. Мураде угъадука Башироваршини насылна, архайле архайлхъа аIлгъаана кьаIгьраманаршина йаIхъ давамааъа. Манкъуни баджарыгъбышис, джомардыйваллайс гьоIку матын ахтыйна кьиймат гьуво. Мана орден Мужествайна кавалер ворна.
Ши гьини макьалэй Ватанниме джан гийхьени насылни игит’ духйебышди гьаIкIеена хабаравъу. МаIгьдын насылбы кIылда дешодунбы. Манбышди гьаIкIее одкIуний йишин бордж водун.
Фырсантыке истифада гьау, гыргынбы 23 февральни адамершини байрамука табрикааъа. Шос джанана сагъвалла аIрзааъа. Гьасре СВО экIда таамхьеджен ва йишин игитер сагъба-саламатба хайбышейхъа савкIледжен!
