Февральни вузани 24-чил’ Украинайл’ СВО гидгъылыйн ёкьудле сен быкырехьи. Мани сенбышее Россиейни ярахни кьувватбыше украмиллетчершини къошунбышиква гьаракатыкван вурушбы ыккекка водунбы.
Ёкьудле сен кIыл’на вахт дешобна. Манчин йишди оIлкайни тезе таарыхей ваджибна джига авхъааххъа. Къийна йишди эскерарше джони гьаIракатыква ва такьатыква Укранаийс ва манчис кумаг гьелени оIлкабышис дурустба ешемишувхьесдимее гьаIкIена йаIхъ гьаагва. Амма манбышис ман башта эйхьи деш. Манбышис СВО таамхьа ыккан деш. Авропайн са сураке миллетчершис ярахый техникIа оIтираъа. Манчихъа ил’дяакы, йишин игитер гьихъа аIлгьаа вобунбы ва азгъунувхьайни душманаршис лайикьын хъели водун.
СВО менни миллетбышди эл’чершиква янашеба Дагъыстанейнчени эскераршед джона н джомардыйвалла гьаагвана. Манбышике 18-ре игит Россиейни КьаIгьраманни доюс лайикьра къаджу. Аазырбышиква дирибаш эскерар гьокуIматни джурабаджурайни медалбышис ва орденбышис лайиькьавъу. Манбышди гьаарынкъве хаIдни гьунарыква Ватанни гьийдын бордж хъели водун. Офицерарше, эскерарше йишди хаIнни оIлкайна – Россиейна садибийвалла къорамишааъас чалышмишоохьи.
СВО иштыракаъани эскераршин аIрайл’ цIаIхни халкьын джаванарыб гьеххаалика растына хъавайленбы. Манбы Миноборонайн, Росгвардиейн эскерар вобунбы. Гьел’бетде манбышиква саджигее хаIдын гьунар СВО джони хаишиква абкIынни ва мобилизациейква оIтиравъуйни джаванарше гьагва водун.
Джуни хааишиква СВО гьабкIыйнбышди джаргее Миххьейни хивейнчена Сафаров АIгьмад Ил’ясна дихыр ворна. Къийна манкъве йыIкьра яраламишхьайле хъийгъыйн реабилитацие ыккекка.
АI. Сафаров 2002-ъэсди сен Краснодарни диярыл’ едике ыхьа. Манкъве садъэсди сыныфыле молюдъэсди сыныфейхъаме МиххьегIни хивни йыIкьнекни мактабе хъаIдхъы. ЮчIудъэсди ва йицIыдъэсди сыныфбышейхъа Шиназни хивни йыIкьнекни мактабейхъа аркIын. ЙыIкьнекин мактаб АIгьмаде Каспийскни шагьарее быкырау.
АI. Сафарове контракт одкIунмее, СВО Донецкни вилаетылхъа оIтирау. Мана Щербиновка, Торецк, Константиновка шагьарбышди аллани вурушбышда иштыракчий ворна. Добы агъмишауйни шагьарбыше геед йыIкьын вурушбы ыхьа. Манчини санчее АIгьмад ва джуквана гьамбаз яраламишувхьайнбы. Мани дагъамни вурушни гьаIкIее гаф гьааъанкъаI АIгьмаде увгьойн: « Мани вурушбышис миллетчер гьаIзироохьен хаIдда сенбы ыхьа. Манбыше гьийгъанче гьихъа джона аIгьтият къооджи вухьа. Мани сардан сангарбы гьаIзирау. Махъа ярахый ва сабара техника сау. Манбы шакIле къаджейнбы …
Яраламишхьайн йигъ зас лап югда йикIел’ водун. Мана йыIкьейлийна вахтный. Ши гьамбазаршиква къазмабышений. Ёкьудле йигъна шаке манче хъигъебчIес ваIвхы деш, няъас увгьее миллетчершини дронбыше шас имкан гьооли вухьа деш. СыкIыл’на саакитийвалла вухьамее, зы йизди гьамбазыква хьян гяцIес хъигъебчIы. Булахысахъа гьивхьарассе, хаIйбышейнче дрон хъады гьидхьырыйн. Дроныле гьебхасдимее йишда гьаарна са суралхъа гьиху. Амма йишди дёлесвалей къутIобкIулни бомбайн чина мурдал иш къавджена. Йишда кьоIйирсана йыIкьба яараламишувхьайнбы. Госпитальбышее маалиджебы алятIуйле хъийгъа, хаахъа саркIыл’».
АI. Сафарове хидмат гьавъуйни частни камандирарше ва эскерарше манкъуни джомардийвалис ахтына кьиймат гьооли. Манбышди увгьойка, манкъвее гьаIкIена игитийвалла гьаагу. АIгьмаде гьам джуна, гьамыб джуквани гьамбазаршина ыIмыр къадтивхьанавъу.
Гьаагуйни игитийвалис АI.Сафаров гьокуIматни наградабышис лайикьра къаджы. Манбы гьайни дёлесвалей джосахъа гьихьарасынбыва, АIгьмаде агъмишау.
Къийна АI.Сафарове хааъад маалидже гьаъа. Манкъуни къелис хъетIуйн зиян хаIдын ыхьайхъа гора, манкъухъаб СВО сакIаласда имкан дешда. Ши манкъус экIра хъуваркый ва джанана сагъвалла аIрзааъа. Камандираршиква саджигее шинад манкъуни дирибашийвалис сагъулва эйгьи.
