Мишлеш Сувал’ни дерайл’на цIаIхбышда энки хаIбна хив вобна. Мааъад 1368 инсанын прописка водун, амма мабышин хаIббананбы Дагъыстанни ва Россиейни шагьарбышее ешемишеебахьи.
Къийна Мишлеше администрация, мактаб, больница, клуб, ушахаршин бахче, библиотека водун. Мааъаб 121 инсан ишлемишехьи. Гыргыда хивее 176 тасарруфат водун.
Хивна хааIрна Ибрагьимов Ислам Оруджна дих ворна. Мана чалышмышехьена хивын, джамаъаIтын гедишат югда ыхьайнимее.
ОIтмишхьайни базарни йигъыл’ мана хивни джаIмаъатыква горушмышхьа ва 2025-ъэсди сен къаджейни ишбышин екунбы (отчет) ыккы.
Манкъуни отчётыле гьихъа Мишлешни джаIмаъатыква ва манбышди джаванаршиква Рутул районни РОВД ишчерше гьайни сенийни юххьанийни эскерейхъа хъобтIулуйни ва районни милицие контрактна къуллух гьавъуйни гьаIкIеедын маIълумат гьуво. Манбышди увгьойква, къийнийни йигъыл’ Рутулни районни РОВД-хъа инсанар вуккан вобонбы. Махъа ааIли таIгьсылни дипломнан ва мактаб таамаъу эскерийвалее къуллух гьавъу хъабыйн джаванар вуккан.
Гойне Ислам Ибрагьимов джаIмаъатни оIгийл’ йишонхьа ва манкъвее са сенни аIрее къаджейни ишбышди гьаIкIейдын маIълумат гьуво.
Манкъуни увгьойква, цIерра вудж хивейни ташкилатбышди чIакIынбышиква горушмышхьа ва манбыше са сенее къавджени ишина отчет алябтIу.
«ОIтмышхьайни сен ши районеени ва хивеени ташкилатбышиква саджигее джурбаджур ишбы къаджейнбы ва эгьес эйхьи ман ишбы югда адкIын. АIсас фыкыр ши юххьан ва цIывылихъа эскерейхъа хъобтIулуйни гьаIкIее, районни РОВД-ни ишчершиква саджигее джаванаршиква ва мактабни ушахаршиква экстремизмни ва терроризмни эксина йишонавъу, гойнеб пожарбышике къорамышебхьайни гьаIкIее вахт-вахтал’ йишонебхьа. ОIтмышхьайни сенни аIрее илгъечIуйн гьоIкуматын байрамбы джаIмаъатыква, СВО-ни иштракчершиква, пограничникаршиква, ветеранаршиква саджигее кечирмышаъу», — хивни хаIрынкъве увгьо.
ДжаIмаъатыкван горуш алгъагьа Ислам Ибрагьимове хивни гьаIйвандохтураршиква гыргыни малбышис биркIабы гиххьы ва манбы учетейхъа алятIува, йаIхъбышди фондни пылыква хивни гьихъийаллан йаIхъбы ремонтаъува, вахтале-вахталхъа имааджийбы гьаъу гьаIшбы саъу, булахбы, гимга хъавъува, къыIлина малбы гьуваджени ейлягъбышеехъа видир тезелемишаъува ва джахъа иших хьян цIыцIаъува увгьо.
Манчиле савагьийда Самуреенче хивни паркеехъа хьян цIыцIаъу, хивни някьвбышди гьихъийаллан (200 м) джига багъламышаъу, хивни манзикын тегьлука къорамышаъан паспорт гьаъу, ишихен диракбы ремонтаъу, ва оIтмишхьайни сен фаляакатбыше гьувойн зиянбы акIанаъасын ишбы къаджу. Гойнед сенбына гьаIллаъас дёохьена иш быкыравъува ( хивын генпланын кадастрын ишбы таамаъуй), хивни администрациейхъа, мактабеехъа ва больницеехъа интернетна хатI цIыцIавъува, — манкъве увгьо.
«Сабара ишбы ши оIтмышхьайни сен Бабаюртни къышлахбышейни тасарруфате къадже (СПК «Мишлеш»). Мааъад вахтале-вахталхъа джаIмаъатбышква горушбы алгъавгьу, ва СПК-ни адын ишихен диракбы бадалаъу ва 36 светильник гиххьы», — маIълумат гьуво.
Ши хаIбба фыкыр джаванар идманыква машкъулувхьайс гьооли вобна. ОIтмышхьайни сен идманыс 63 аазыр манат бюджете къейдавъу вухьа. Мани пылыке сабара ярышбышеехъа, горушбышеехъа ва байрамбышеехъа джаванар оIтиравъу.
Манчини аIрее МаскIавни шагьаре илгъечIуйн Быкырнироссиейн форум «Малая Родина – сила России», МагьаIчкъалайни шагьаре алгъавгьуйн футболын ярыш, Ростовни, Дербентни шагьарбышее алгъавгьуйин идманын ярышбы ва медынбы ыхьа.
Ислам Ибрагьимовни увгьойква, ман вуджее агъмышаъуйн ишбы гьайни сеныд къеджи водонбы ва оIтмышхьайни уIл’джумее хивее хаIбна имааджий илгъевчIу. Маа мед къыIлина малбы гьуваджени ейлягъбышена видыр хъавъу ва сабара медын хайирекван ишбы къаджу.
«Хивее къеджени ишбышиле савагьийда йишди администрациейн районни администрациейква ва ташкилатбышиква, республикайни министерствабышиква сабара хивыс хайиресди ишбышди гьаIкIее ишлемишебахьи вобонбы. Масалан, гьайни сен хивни маданиятни клубыс ремонтаъуй къейдеехъа алятIу водун. Манчисын пыл районни хазнеехъа хъады водун. Гойнед ши Дагъыстанни хивни тасарруфатни министерствайква аIлакье вобонбы йишди хивее футболын стадион гиххьыйниме. Мани ишбышее шас хаIдын кумаг «Нур» кIазетни Общественный советын гьели. МанбышикIле зы сагъулва, эйгьи. Ин Ша Аллагь, шокасана ва йишди достаршиквасана ши ман алятIуйн ишбы быкыраъасынбы. Аамин!
