Дюнйейл’ гьар джурайн хасиятбынан инсанар вобунбы: сабы оIгунмыш воохьенбы, сабы гьыIдчат гьаъанбы, сабы мерынкъуна пахырыйвалла цIыцIааъанбы ва мебынбы. Анджах инсанарашини аIрее магьаIбна тайфаб вобна – манбыше джона иш вукIул’ кIебчу гьааъа.
Манбыше джоджаб джо мысаджаб гьихъа гьооли деш, мебынбышиле гьеххара ыккекка деш, добышихъабый мукафатбышихъаб хъигьна къадаахьван деш. МаIгьабни инсанаршина кьадир, вааджибыйвалла вахтбы аIрайле адкIынле хъийгъа ацIехьи, йаIъни таарыхын джаб манбышис кьиймат гьоолена.Манбышда сайир «ЦIахур» донани маданиятни марказна директор ГьаIджиев Вагиф СалиIгьна дих ворна. Гьайни дёлесийвале манкъус 55- сен быкырхьа. Къийнийна йишда макьале манкъуни юбилейис къабсырна вухьес. Вагиф ГьаIджиев ( ЦIаIхни хивынбыше манкъукIле Вагиф эмий эйгьи) Рутул районни ЦIаIхни хивее къуллухчийни хизанее 1966 сенни январьни 20-чил’ едике ыхьа. Манкъуна дек’ СаIлигь дайий ХаIбни Ватанни даIвъийна ветеран ыхьа. Едее, Банавшее, кIалхозее ишлемишийхьа. Манбышди хизанее 5 дих 2 йишбы вухьа. Банавше халай раIгьматыххъа экIра аркIын. Вагиф хизанее энки кIыл’на дих ыхьа. Мана, эгьес эхьи, двухни едее Ниней хале хаIрхъаъы.Вагифна са чоджий, са йичи гьаммашийни дюнйейл’ вобунбы. Авхуйн чоджарый йичи хизанбышин саIгьыбар вобунбы. Манбышди гыргынбыше деккейий едее гьувойн къык, тербие, ацIаал’ гьаммаше ахтыда аххъы. Манбышин фыкыр гьаммаше инсафийвалла гьувааджий вухьа. ЦIаIхни дерайл’ джад деш, районе, республике СаIлигь дайийни хизаныхъаб гьуIрмат вухьа. В. ГьаIджиеве ЦIаIхыини йыIкьнекни мактабее хъаIдхъы. 1983 –ъэсди сен мана МаIгьачкъалайни культпросвет училищехъа хъаIдхъас иккечIу. 1983-1985 сенбышее Ватаныс бордж хъуво. 1987 сен училище таамаъы, В. ГьаIджиев ишлемишхьес йаIххъыляуна районни маданиятни управлениехъа. Манчер мана манбыше ишлемишхьес Гыл’мецIни хивни клубыс хаIбвалла гьааъас оIтирау. 1987-1989 сенбышилхъамее мана мааъар ишлемишехьенкъаI, манкъун йикIеенчен гьавас цIаIхбышди маданиятылхъа, фольклорылхъа , таарыхылхъа ачмышхьа. 1989 сен мана хъарына ишлемишхьес ЦIаIхни сельсоветни клубеехъа. 1989 сениле гиргъыл’ къийнийни йигъылхъамее манкъвее йишди миллетын маданият гьаIракатеехъа адаччи водун. 33 сенна ыIмыр манкъвее маданиятыс къабсыр. Мани сенбышди аIрее В. ГьаIджиеве джурабаджар хиваршини, районбышди, республикайни майдамбышее цIаIхбышди маданиятын, фольклорын аIдатбы концертбы, тамашебы гьагу. Хьуленихьее элейс мана Рутул районни маданиятни управлениейни ,ДР-ни маданиятни министерствайни сурале мукафатбышис, грамотабышис, дипломбышис лайикьра къадже. Манчиле гъайре, аIхреени сенбышее мана миллетни музейка маIшкьулехьи ворна. Джуни гьаIракатыква, джуни харджийбышиква Вагиф ГьаIджиеве клубни са утагъее музей ачмишавъу. Махъа манкъвее ваIщеле агъаллан йиссейн экспонатбы саъы водунбы. Мааъар ыхьана инсан , манчиле матехьена. Мани экспонатбыше йишин таарых гьагва. Анджах музейис шарааитбы яратмишаъасдимее , гьоIкуматни суракен кумаг ыккан. Мани музейни гьаIкIее ва дагъамийвал’бышди гьаIкIеена ши макьале кьоIдле сенна гьихъа гьувонаний. Амма иш джигайле гьихъа ооккы деш. Шахъаб манчини далыйл’ илёбзурийн инсанар дешинбы.Вагиф эмийхъад хивее кIылин алверыд водун. Манкъвее хивын джамаъаIт одхьанни караква, малаква таIъмыраъа. Инсанаршихъад хылеад пыл дешданкъаI, мал къекка. Чалышмышехьена кар мебни алверчершиле уджузда гьелес. Мани ишее манкъус кумаг джуни хьунащее Банавшее гьаъа. Вагиф ГьаIджиев йишди миллетна джан гийхьена , къайгъвее ахвана, хайир- шеирее ахвана йишда чодж ворна. «Нур» кIазетни редакциейни , йишди миллетни, маданиятни ишчершини дойиле Вагиф ГьаIджиев 55 сенни юбилейиква табрикаъа. Манкъус джанана сагъвалла, хизанее баракат , хылийна ыIмыр, ниятее аххъыйн карбы быкырхьай аIрзуламишаъа! Вагиф эмий, вас нягьаIрий йик
