Гьар сен майни вузани 12- чил’ Россиейл’ медсестрайн йигъ алгъайгьен аIдат водун. Къийна мани санаъаIтыл’ хаIбба инсанар ишлемишоохьи. Манбыше джони ацIааликва гьар йигъыс ваIшбышиква инсанаршис больницабышее, поликлиникабышее, ФАП-бышее кумаг гьаъа. Манбышда сагъламийвалла гьувааджесдимее маалиджебы ыккекка.
МагьаIчкъалайни шагьарни №7 поликлинике ишлемишейхьена АIзизова Альбина Ниязна йиш мани санаъаIтыква джена ыIмырена йаIхъ гьибтIулыйн хаIдда сенбы водунбы. Мана къийна эндокринолог дохтурна кумагчий ворна. Альбине джени санаъаIтна гьаIкIена устад ворна.
МаIнкъыни увгьойка, гьар йигъыс ишил’ поликлиникейхъа абыйни хаIббанани чIырынбышиква хъызейха. Манбы джурабаджур диагнозыква дохтурусахъа абайли. Манбы къаршиламишавъуй, дохтурусахъа абыйна дерд ваацIавхьай, лазымын санаъатIбы сауй манмеегаб сибыкна иш дешобна. Иш дагъамна вухьейиб, абыйн чIырынбы селлимба гьавайсар деш. Манбышис гьагуйни саягъылин кумаг гьелен.
Альбине МагьаIчкъалайни шагьарее Р.П.Аскерхановни дойилин медицинайн колледж таамау. Манчиле хъийгъа, Дагъыстанни аграрни университете хъаIдхъый алетIу. Мааъад маIнкъей бухгалтерин учет, анализ ва аудит факультет быкырау. Амма манчихъа ил’дяакы, маIнкъыхъад цIеддыйни санаъаIтылхъан гьавас гуджнакван ыхьа. Мани саягъыл’ Альбине медсестрайн санаъаIт сечмишау.
Няъас йидже ман санаъаIт сечмишау хъидгIынаъанкъаI ,маIнкъей увгьойн: «Мани санаъаIтылхъан аIшкь, мугьуIб захъад гьаммаше хаIдын ыхьа. Инсанаршис кумаг гьувой, манбышди ыкIарбышис чараа къавджуй, йиздимее хошда водун. Манчихъа гора, зы сечмишауйни санаъаIтыле зы нимейхье разийра ворна».
А. АIзизовайхъад йидж ишлемишейхьени поликлинике гьамбазаршини аIрайл’ хаIбна гьуIрмат вобна. МанбышикIле мана са кар ацIана медсестра ва джена иш югба вуккеккана санаъаIткар хьинне ейцIа.
Мана гьамыр уфтанни хизанын ишыгъ гьувейджена ед’ ворна. Альбине джени ыIмырени ёлдашиква Саламыква саджигее кьоIйре дих чIакIы хъаъа. Манбы Исламый Кьурбан вобунбы. Аллагье джо гьуваадженбы.
Къийна Альбина хьинне медсестрайни ишиква джона ыIмрена йаIхъ гьибтIулыйн хаIбба цIаIхни халкьын адамерий едар вобунбы. «Нур» кIазетни редакциейн манбы гыргыба джони байрамыква табрикааъа. Манбышис джо сечмишауйни йыIкьни ишил’ угъурбы аIрзаъа.
