ГьуIрматукан цIаIхбы!
Къийнийни йыгъыл’ йишин миллет ацIаляъан, манчини таарыхни, мизени, адабиятни, маданиятни гьаIкIее ойкIанан садджу «Нур» кIазет водун. Къийна ман кIазет шаке гьуваджес даIхейни, шас хаIдын аIйиб водун. Йишди архайле хъооIни геледжагъбыше ман кар шас багъышаъас деш. Ман йишди миллетын аманат водун.
Гьар вахтал’ кIазетын одкIуний (подписка) гийгъаланкьаI, ши шолхъа манчис кумаг гьеъэва, поштейхъа гьабкIын йидж окIнева мураджият гьаъан. Йишди инсанаршди сабаранбыше манчис фыкыр гьооли деш. Амма гимгее, ва медни хаIбба инсанар сабыйни джигэй кIазетни гьаIкее манбыше гьааъана гаф гейб ахтыба воохьи. КIазетис кьиймат манчин акьва къидеджуйни инсанарше гьооли.
Кlазет миллетын акьва водун ва ман гьар хаахъа иккечIес ыккан. КIазетни одкIунее гыргыни джамаъаIтыкен иштырак лазымда. Къийна ши гыргынкъве эйгьен шахъад район, депутат, ахтыни къуллухейбын инсанар дешва. Ман карбы шахъад ихьесдимей цIебба ши сана-санкъве авхъас вуккан, лазымни джигэй кумагбы гьелес ыккан, миллетын до къеджени ишбышиква ахтыхъаъас ыккан. Ман кар шахъад дехьее, шахъаб районе, республикайл’ гьуIрмат вухьес деш.
Гьоlкуматын йишди миллетыс «Нур» кIазет, джамаъаIт саджигэйхъа саъасва гьуво. Миллетын до ахтыхъаъасдимее, йихъбы гьишубы вухьай дюнйейни акьвал’ ацIалаъасдимей «Нур» кIазетын хаIбна иш вуккейка вобна. Гьаlшде кlазетни кумагын манбы няаъаб ешемишувхьай, гьиджо ишбы гьаъа ыхьай, шахъаб няхуIбын ацIаал’нан ааIлимар, шейхар вухьай хаlббананабышикIле ацlа водун. Йихъбышин до дюнйейлхъа еймишхьа водун. Мааъад ойкlанан хаlдданан материалбы халкIыни таарыхыс, манбышди къийнийни йигъыс, гьаъани ишбышис, экономикайс кьадсырыйнбы водунбы. Манчиле савагьийда, кlазетни сайфабышее ши ааlлимарщис, ишкар инсанаршис, заlгьматкараршис, джаванаршис, шааираршис къадсырыйн материалбы гьеххаалика растына хъайленбы.
«НУР» кIазетын ишчера, чалышмишоохьенбы аIхани къайдайл’ йишди миллетни гьаIкIеедын маIълумат гьелес, манбышин сес республикайни, гьоIкуматни регьбераршилхъа гьихьараъас, йишди халкьыни аIрее ыхьайни югни ва писди гьаIдисабышди гьаIкIеена хабар хъобкуба шолхъа гьивхьарааъас, йишди халкьын аIдатбы, адабият, миз, маданият саламатда гьувааджес ва Дагъыстанейий Азербайджан ешемишоохьени цIаIхбышин алаакьабы маIгькамаъас. Йишди ишис кьиймат садджу шоке гьевлес вааIхас, няъас увгьее йишда иш шокIле къоодже вобна.
Гьел’бедти, шахъадыд саIгьвбы эйхьенбы. Вахтал’ гыргыни джигэйхъа вуIххъас усылоохьи деш. Сабара инсанаршис, ишбышис хъобкуна кьиймат гьевлес вааIха деш. ГьуIрматыс лайикьын инсанар, фагьам гьидёву аахва. Шу шакIле йишин нукьсанбы эгьес ыккан, шаквасана гаф джигайл’, ваяхуд редакциехъа абы гьааъас вуккан. Манке ши хъобкуни мислягьаIтеехъа хъавалесынбы.
Редакциейна энки хаlбна макьсад — ед’на миз’ гьувааджий, мана артмишавъий воб. Имканбы шахъад гьаманке ихьес, шу кIазет одкIунее ва манчис кумаг гьувее.
Россиейни джурабаджура джигабышее ишлемишоохьени ищкар инсанарше кlазетна иш юг хъааъасдимее джоке ахаlн кумаг гьелен. Анджах манбышин сиягьый хаlдын дешодун. Мани ишее авхуйнбыб къырагъыл’ илёозарас вуккан деш. ХалкIни къийхъыйн йигъ югун ихьесдимее джоке ахаlн кумаг гьелес ыккан. Водни дагъамийвал’бышихъа ил’дяакы, «Нур» кlазетын гьар сен мактаббышее хъаlдаххъани ушахаршини аlрайл’ ед’ни мизекен конкурсбы алгъайгьи. Манбышди аlрайл’ едни мизелхъан аlшкь, гьавас хаlд хъаъа. Югун билиг гьагуйни шыгыртаршис пайбы гьели.
Сениле-сенилхъа подписка гьаъанбышин сай кlыл’хъехьи. Къийна мани суракена иш сибык хъааъасдимее, редакциейхъар подписка гьаъана ишчий ворна. Мана шу увгьойни джигэйхъа айрес гьаlзирра ворна. Шохъаб подписка гьааъасда вахт дешхьее, редакциейка алаакьа аххъе.
АIзизын йихъбы, гьуIрматукан йишин халкь, дора «Нур» кIазетис хъооIни сура сенийсын подписка гьаъас, йидж багъламышаъасда мумкум гьидевлес. Манчина вахт лап кIылба авху вобна, июни 20-чилхъа мейга вобна.
Ненкъусе кIазет окIанас ыккан, дёлесни поштейхъа, кIазетбы масса гьелени киоскейхъа гьабкIын окIанас аIхасынбы.. Манчиле савагьийда кIазет редакциейхъа абы окIанас эйхьи водун. Электронныда аляатIасыд шоке аIхасын.
Мани сардан бирдан дагъамийваллабы шохъад ыхьей, гьайни нумрайлхъа мураджият гьаъас аIха: Телефон: 8960-420-06-61. Электронный адрес.
