Гьар сен июльни вузани санчил’ йишди оIлкее вурушни гьадисабышди иштыракчершини йигъ кьейдаъа. Манбышди игитийваллайни гьаIкIее йыIкьале хъооIни насылбышис юшенауй йишин бордж водун. ЦIаIхни халкьни инсанаршини аIрайл’ мани саIнаъатыква ыIмыр багъламишауйнбышин сай хаIдын водун. Къийнийна йишда мигьман хаIдда сенбына республикайни МВД ташкилатее ишлемишхьана подполковник ГьыIсейнов Ибрагьим Мамедна дих ворна.
— Ибрагьим чоджий, иджааза гьеле къийнийн йишин горуш табрикуква гигъалас. Гъу гьийгъанче хъооIни вурушбышди гьадисабышди иштыракчершини йигъыка табрикаъана.
— Табрикауйхъа гора, сагъра ихьена. Зынад йизди сураке вурушбышее иштыракауйн игитер йикIейнче табрикааъанбы.
1999-ъэсди сенийна августна ваз Дагъыстанимее, оIлкайниме гееб дагъамна ваз вухьа. Манке йишди республикайлхъа хыле ярахуквани душманарше гьуIджум гьавъу. Буйнакскни, Ботлихни ва Новолакни районбышее хъидебтIул абыйни дестебышикван вурушбы гидгъыл. Республика манбышике къорамишаъас хъигIебчIыйнбышди джаргее зынар ыхьана. Зы Чабанмахийни ва Карамахийни хиваршее ыхьайни вурушбышда иштыракчий ворна. Къийна, аIрейнче хаIдда сенбы адкIынийле хъийгъа, йишди хаIнни оIлкее Россиейл’ мееб саакитийвалла дешда. ГьаIшде йишди ярахни кьувватбыше СВО вурушбы ыккекка. Имканыке истифада гьау зы джурайда са-кьоIлле кал’ма мааъаб воохьени джаванаршини гьаIкIее эгьес ыккан. Къийна манбыше йишди Россиейна садибийвалла гьувааджесдимее хаIбна иш къооджи. ХаIмна-йигъна душманаршиква вурушбы ыккеккан. Манбы Аллагье дагъамынчике гьувааадженбы. СВО таамхьа, гьаарна джуни хайбышейхъа сакIаалас аIрзаъа.
— ШакIле ацIан, гъу джурабаджурайни ишбышил’ ишлемишхьа. Амма манчини аIрайл’ йыIкьнекна джига республикайни МВД авхъаахъа. НаIгьарне гъу махъа хъары?
— Едике зы 1966-ъсди сен июльни вузани санчил’ Рутул районни ДжинаIгъни хивее ыхьа. РаIгьматтыгъ деккис ЧIародайни МЖС тезе кьуллух гьувойхъа гора йишда хизан Уланхолхъа кочмишувхьа. Манке зы кIылин ушахний. 1983-ъэсди сен Уланхол йыIкьнекин мактаб быкырау. Геледжагъылисын саIнаъат алятIасдимее МагьаIчкъалейхъа саркIыл’. СаIнаъатбы Дагъыстанни хивни тасарруфатни институтейхъа хъуво. Амма цIеддыйни сен махъа иккечIес кьисмат дехьайн. Эскерейхъа аркIын. КьоIдле сенна Ватанни гьийдын бордж хъувойле хъийгъа ооъад агъмишаийни институтни механизациейни факультетейхъа иккечIу. 1992-ъсди сен ман югни кьийматбышиква быкырау. КьоIдъэсын йизын хъаIдхъый юриспруденцейква багълыда. 2002-ъэсди сен МоскIавын гьокуIматын ачухын университет таамау. 2014-ъэсди сен кандидатын минимум хъуво. ЦIеддыйн аали мактаб быкырауйни сен МВД ташкилатее ишлемишехьи гиргъыл. Мани карее зас хаIдын кумаг йизди чоджее ГьыIсейин Мамедове гьуво. Манкъуни теклифыква зы экономикайн джинаятбы ашкараъани управленией ишлемишехьи гиргъыл’. Пенсиейхъа хъигъечIесмее мааъар чалышмишхьа.
Манчиле гъайре зы ишлемишхьайни джигабышин сиягьый кIылин дешодун. Агар гъу манчис маарах гьагвахье, заке манбы алядхъас ахаI.
— Писда ихьес деш.
— 1993-2008-ъэсди сенбышее Дагъыстанни МВД ни экономикайн джинаятбы ашкараъани управлениее хааIрна оперна ишлемишхьа. Мани ташкилатын МагьаIчкъалайни шагьарыс назаратау. 2008-2011–ъэсди сенбышее ишлемишхьес кьомани управлениейхъа илгъечIу. 2011-ъэсди сен гьаманиджар кьуллухул’ МагьаIррамкентни районее чалышмишхьа. 2013-ъэсди сен мер Дагъыстанни МВД-ни управлениейхъа саркIыл. 2017-ъэсди сен манчер пенсиейхъа хъигъечIу.
Къийнийна йизда иш джига мебна ворна. ГьаIшде зы республикайни эб хъоолени марказе ишлемишехьи ворна. Манчиле гъайре захъад медын гьаъан ишбыд гьеххалика водунбы.
— МВД ишлемишехьенкъаI, гъу хаIдданани наградабышис лайикьра къаджы.
— Манчин сиягьый геед хаIдын водун. Мааъар ишлемишехьенкъаI 42-ни элес зы джурабаджурайни наградабышис лайикьра къаджы. Манчини аIрайл’ йиздимее энки гыранынбы МВД-ни сураке гьувойн «За отличие в службе» хьебни степенын медалбы водунбы
— Гьар карахъаб кок вобна. МаIгькамни кокбынани йувын югна бар гьооли. Хизаныб йув хьинне вобна. Дора кIыл’на гаф гъу хаIрхъыхьайни хизаныке гьееъэ.
— Йизда дек’ ГьыIсейнов Мамед Раджабна дих, районее республикее геер доюквана инсан ыхьа. Мана республикее хивын тасарруфат сугъоцаъанбышда са ыхьа. Декке Рутул районын ва республикайн хивын тасарруфат къелилхъа хъаъасдимее хаIбна заIгьмат гьавъу. Манкъуна ыIмырена хаIббанана вахт чоIлбышее, сувабышил’ дамазлыгъбы гьуваадженбышди кIане абкIын. Уланхол ЧIародайни МЖС хаIбвалла гьааъа гиргъылийле хъийгъа, хааъар сейракраний эхьи. Манке Советни оIлкайна гуджнака хивын тасарруфатбы артмишаъана вахт вухьа. Ушахаршини тербиейква ед’ маIшкьулийхьа. МаIнкъе гьам шас тербие гьуво, гьамыб хааъана иш вукку. МаIнкъына ыIмыр, эгьес эйхьи, абыйни мигьманаршис одхьуний-илёдгъый гьаIзираъа абкIын. Дагъамийвал’бышихъа ил’дяакы, манбыше йигIыйре ушахар чIакIы хъавъу, манбышис хъаIдхъый гьуво, даватбы гьау. Джурайда зы сагъул йизди чубабышикIле эйгьи. Манбыше зас ачухни дюнйейлхъана йаIхъ гьаагу. ХаIрни чоджыс, джурайда сагъулва зы эйгьи. Манкъве зы мактабее ва иниституте хъаIдаххъанкъаI хаIбна заIгьмат гьавъу. Манкъуни кумагын зы манбы югни кьийматбышиква таамгьау. Мани вахтал’ чоджихъад хаIдын китабхананый. Мааъад водун китабы зы гыргыда хъаIдхъыйнбы. Дек’ дюнйейле экIра аркIын. Едее ваIще кьоIдле сен гьау. Мана гьинчиле сабара вахтна гьихъа раIгьматыххъа аркIын. Къийна зы манбышди гыргынбышис раIгьмат къихооли. Агар гъу йизди хизанни гьаIкIее хъидгIын гьаъахьее, захъар са йиш ворна. Манар аилейква Дербентни шагьарее ешемишейхьи.
— Захъад гаф гьааъанбышис гьаммаше гьелен са суал водун. Къийнад ман текрар гьаъас ыккан. Нимее экIра-экIране гъу едике ыхьайни хивее эйхьи?
— ДжинаIгъ йизда кIыл’на Ватан вобна. Мана йишди баба-дидейршина юрд, маскан вобна. Манчилхъан аIшкь, мугьуIб зы гьаммаше гьуваджен. Сенее кьоIни-хьебни элеес зы хивейхъа гьайкIан, гогьар-гьамбазыква хъызаххана. Гойне хьинне, гьабтIыйни дёлесни инсанаршин горханъабы зияратаъа.
— Инсанар ешбышейхъа гьибхьырыйнкъаI, ишиква багълыданан фыкырбыд бадалехьенбы. Мани джуваббышиква гъу разийране?
— Йизди гьавъуйни ыIмырыле ва кавджейни ишбышике зы гьаммаше разийрра ворна. Зы оIгийл’ ва гьаIшде геедни югни коллективыка ишлемишхьа. Чиле хъийгъа, захъаб гееб уфтанна хизан вобна. Манаб хаIбна хошбахтийвалла вобна. Амма манчихъа ил’дяакы, са карын зас диндж гьели деш. Манчини гьаIкIее зы меринкъус гаф гьавъу деш. Гъу цIеррыйна инсан ворна. Манаб зы сечмишауйни саIнаъатыка багълыбанана мисала вобна. КIыл’вале йизда мураад дохтур ыхьай вухьа. Дохтурын саIнаъат алятIасва зы хаIрра чалышмишхьа, амма ман зас кьисматхьа деш. Къийна зы са ешбышейхъа гьирхьылейир, мани фыкырыква ешемишехьи.
— Къийна гъу дохтур дехьейир, дохтураршини аIрайл’ ишлемишехьи. Вахъаб садджу джагварана хаIлет дешоб. Манаб тIабалавъуй дагъамна иш дешобна.
— (АIхъана гьаъа) Сагъра ихьена. Йигъни ихтелетын зас хаIбна кьувват гьуво.
— ШакIле ацIан, садъэсын июль ооъад агъмишауйни байрамыле гъайре, гъу едике ыхьайн йигъ водун. Гьайни сен, Аллагьни кумагыква, гъу юбилей къейдаъас. Вас хылийна ва хошна ыIмыр ши аIрзааъа. Гьаммаше къийнийна хьинне гумрагьра ахвана.
— Зы аIрсей гьау арыйхъа гора, вакIлед сагъулва эйгьи.
