Россия хаIдда миллетбы саджигее ешемишехьен , хаIдда мизяарнан, хаIдда динбынан гьоIкумат водун. Миллетбы, мизяар, маданият гьоIкуматна девлет вобна. АаIлимаршини увгьойква ва статистикайни тасдикьыква къийна Россияйл' 155 джура ющенааъан един мизяар водунбы.  

Едини мизаршис хыл' авхъуй ва манбы гьуваджесын ва артымишаъасын имканбы гьувой - гьоIкуматни са приоритет месала вобна.
Россиейни Президенте Владимир Путине 2025 сенни ноябрьни 4-чил указ обкIун, гьар сен 8 сентябрьни йигъыл' йишди гьоIкуматыл' Россиейни миллетбышди Мизяаршин Йигъ байрам х'ьинне алгъагьас. Ман йигъ алаакьа гьаыйн доюкани шааирни Расул Гьамзатовни едике ыхьайни йигъыква.
Дагъыстанее ва сабара вилаетбышил' сентябрьни вузани кьома Р. Гьамзатов едике ыхьайни йигъыс къадсырыйн адабиятын фестивальбы - «Джагваран дурнабы», «Гьамзатовын йигъбы» илгъечIи ыхьа.
Гьихъа гьар сен цывлихъа, сентябрьни цIеддыйни декааде, аIдатеехъа гидхьу Дагъыстанее ва медни Россиейни республикабышил', вилаетбышил', шагьарбышее Дагъыстанни шааирыс Расул Гьамзатовыс къассырыйн «Джагварани дурналаршин йигъбы» алгъайгьи ыхьа.Ман джамаъаIтбышди аIреедын адабиятын фестивал' ЮНЕСКО-ни мислягьаIтыква алгъайгьи ыхьа.. Мани йигъбышил хъаIдхъийбы, адабиятын маджлисбы, шааираршикван горушбы, китаббышин гьагуйбы, тематик горушбы ва концертбы алгъайгьи ыхьа.
ГьаIшде ман йигъ гьоIкуматни байрамылхъа садкIыл. Мани йигъна аIсас метлеб: едини мизяаршилхъа фыкыр вуккий, манбы гьуваджий ва артымишаъсда имкан гьувой. Манчини гьаIкIее йишди гьоIкуматни Президенте хьулехье джуни чыхышбыше текрараъыйн.
Дагъыстан ман Йигъ ярашугъыква алгъагьас гихъа джаб гьазироохьи гибгъыл. Республикайни шагьарбыше аблесди мигьманаршикIле ва республикайни халкьыкIле гьагвасын миллетбышин майданбы къурмишаъы
Россиейни миллетбышди мизяаршини Йигъыква республикайн джамаъаIт, абыйн мигьманар джони соцсет'бышеенче сбара гьагьна Дагъыстан республикайс хаIбвалла гьааъани Фёдор Щукине, ДР-ни Правительствайни садре МаIгьаммадов Рамазанове, ДР-ни Халкьни маджлисни садре Заур Аскендерове табрикавъу ва гыргынкъус джанана сагъвалла ва угъурбы агъмишаъы. Манбыше Россиейни миллетбышди мизяаршин Йигъна вааджибийвалла увгьо.
Дагъыстанее, быкырни гьоIкуматыл' хьинне, мизяаршин Йигъ сентябрьни 8-чил', Расул Гьамзатов едике ыхьайни йигъыл' гидгъыл. Йишди республикеехъа хаIбна шааираршина, язычершина десте ман йигъбы ярашугъыква алгъагьас Российни регионбышенче абы. Абыйн мигьманар мичIееб чакба Тарки-Тауйни тапылхъа, Р.Гьамзатовни нюкьнелхъа тIетIбы гиххьес гьабкIын. Махъа гьабкIынбышди аIрее сбара гьагьна Дагъыстан республикайс хаIбвалла гьааъани Ф. Щукин, ДР-ни правительствайна садры М. Рамазанов, Россиейни язычершина Союзни ЦIеррыйна катиб Геннади Иванов , ДР-ни маданиятна министр Зарема Бутаева, ДР-ни правительствайн уIзвубы, ДР-ни парламентын депутатар, Россиейни язычершини Союзын уIзвыбы, хариджийле абыйн шааирар, сайиб Р. Гьамзатовын достар, гогьарбы, дёлесинбы вухьа. Хъийгъа манбыше тIетIбы Республикайни Урус драмтеатрни гьийб гивхьуйни шааирни гьаIйкални авхъа гиххьы.
Манчиле хъийгъа, Ленинни камсамолни дойил'ни паркее , Сулейман Стальни дойил'ни паркее, Республикайни миллетни китабхане мизеква, адабиятыква, маданиятыква багълыданан тамашебы ачмишхьа.
Абыйн мигьман ва садыйн джамаIт Расул Гьамзатовни ыIмрени йаIххъыква ва джуни адабиятыква танышавъу. Р. Гьамзатовын до быкырни дюнйейл' дойикани шааирын хьинне ацIа водун. Манкъуни шечIин «Журавли» адабиятни гьаваскараршини йикIбыше кIоран едигар гьассыр. Къийна Россиейни язычершини союзын Дагъыстанни миллетбышди шааирашин , язычершин асарбы урусни мизелхъа сакIалаъа водунбы. Инам гьаъан, гьоIкуматни суракед мана иш къавджес кумаг ихьесын. Мани митинге Россиейни регионбышди язычершини союзын уIзвыбы, шааирар йишонавъу.
Манчиле хъийгъа абыйн мигьманар Р.Гьамзатовни хаахъа- музейехъа гьабкIын.
Гьамани джад йигъыл', саъаIт 18-чил Поэзиейни Хааъаб шааираршина маджлис гибгъыл. Мана маджлис Дагъыстанни язычершини Союзни садре Марина Ахмедовае вукку. МаIнкъвее хааиш гьауйн абыйни шааираршис джон шечIбы ва сакIалауйбы друстда хъаIдхъас. Мани маджлисее доюкани Россиейни шааирарше джон джурабаджур, гьар тематиквайкан шечIбы хъаIдхъы, Джона джувабна устадыйвалла гьаагу. КьоIдъэсди йигъыл' абыйн мигьманар хьебни дестейлхъа джуребхьа, Гунибхъа, Хунзаххъа, Дербентхъа гьабкIын. Манбы мааъаб джамаъаIтыква горушмышивхьа ва адабиятын тамашебы алгъавгьу. Абыйн мигьманар гейб разийба авху. Шинаб делесийваленче фестивалеехъа абыйни Россиейни язычершиква доюкани шааирыква танышивхьа. Манбышди увгьойка, Дагъыстан шааираршина марказ вобна. Гьайняхъа абыйле хъийгъа, фыкырбы вушди республикайни гьаIкее быкырда бадалхьайнбы. Зы хааIбба оIлкабышил' вухьа, амма гьаняна хьиннена адабиятна аура, шааираршина гьIурмат гьуваджен, манбышис гиххьыйн гьаIйкалбы тека сейракни джиге къадже. Ши гьиняхъа, хъооIни элеес хаахъанбы хьинне аблес. Шас гьайня тезе достар, марахыкван шааирар, прозаикар, художникар авайкы, шакани горуше манбыше увгьо.
Гьаманиджад йигъбышил' Урусни ва Аварни театырни гьийд тамашейс миллетбышин маIънийбы, мыкIар ва фольклорын аIдатбы гьагу.
Байрамыс къадсырыйн хаIдын Гала концерт марказни йыIкьнекни майдама илгъечIу. Маъад джон гьаIракатбы дагъыстанни артистарше, миллетбышди фольклорный дестебыше ва абыйни мигьманарше гьагу.
Гьайни сенийн Россиейни миллетбышди Мизяаршин Йигъ
илгъечIуйн, амма адабиятна кьалам, миллетбышди мизяаршин сес йикIеенче аIл'гьаас деш!

Кьурбан Омаханов