ОIтмишхьайни уIл’джумее ЦаIхни йыIкьнекни мактабе хивни администрацейква саджигее Ватанни кьаIгьраманаршини йигъыс ташкIилявъуна маджлис илгъевчIу. Мактабни директорни ва хивни администрацейни мислягьаIтыква мана маданиятни марказни хаIрункъвее, Вагиф ГьаIджиеве вукку.
Мани линейкехъа хивни администрациейн ишчера, мактабын маъаIллимар , шигыртара сабы. Сабыйнбышди гьийд йишди гьоIкуматыл’ ыхьайни даIвъийбышди гьаIкIеедын таарых мактабни директоре АIбдулгьаIмид ГьаIджиеве ющенаы. Гойне манкъве СВО-ни гьаIкIеедын сабыйнбышис маIъалумат гьувы. Манкъвее йишди цIаIхбышди эскер-игитершини гьаIкIеедын марахыкван ихтелет’ гьаъы ва раIгьматыххъа абкIынийнбы йикIел’хъалявъу.
АI. Гьаджиеве мактабни ушахаршис манбышин хасиятбы, гьаIракатбы чечнайс гиххьы. Гойне манкъвее Ватан нягьаIбый вуккийканас вукканва увгьы. ХаIбни Ватанни даIвъийн иштракчера, Афганистан вухьайни даIвъийн игитера ва гьаIшде СВО эскерна къуллух гьааъан сана-санкъувка алаакьа гьавъу. Хъийгъа мани йигъыква алаакьан маIълуматыкван чыхышбы мактабни агъсаххъал маъаIллимарше – ГьаIджиуIмахан УIмаханове ва АIгьмадхан КIамазове гьаъы.
Гойне, хивни администрациейни хаIрункъуни маIъвыне ХанаIгмад Гераеве , мактабни маъаIллимарше ушахаршис джурабаджур патриотизмайни гьаIкIеедын хабарбы гьаъы, джони хивеенче ХаIбни Ватанни даIвъийе вухьайни ветеранаршини гьаIкIеедын эпизодбы ющенаъы. Мактабни шигыртарше даIвъийни, СВО-ни тематикайс ааидын урусаршини ва йишди шааираршин шеIбы хъаIдхъы.
Маджлис таамувхьайле хъийгъа , мактабын шигыртар , маъаIллимар , администрациейн ишчера хивни йыIкьнени гьаIйкалылхъа тIетI’бы гиххьес гьабкIын, едигарыс мааъад шикIыл’бы цIыцIаъы.
Гьамани джад йигъыл’ гьаIм­аIгьдын Ватанни КьагьIраманаршини йигъыс къадсырыйн маджлисбы Муслагъни йыIкьнекни мактабее ва ДжинаIгъни йыIкьнекни мактабее илгъечIу. Мактабни ешли маъаIллимарше тамашеехъа сабыйнбышис даIвъийбышин таарых ва нишихъа горайий манбы ыхьава увгьы. Манбыше ХаIбна Ватанна даIвъий аIлгьаанкъа тылын гьиджо кумагий фронтыс гьувыва увгьы.
ЙикIел’хъаляъа, гьайни СВО аIлгъаани сенбышее гыргыни цIаIхбышди мактаббышеехъа эскераршис басиркIабы ва кагъызбы одкIун. Къийнад манбыше фронтыкван алаакьабы гьуваджы водунбы.
Гьар мактабее джони хивни эскераршин шикыл’бышин стенд диварыс ыIхы водун. Ушахар манчиле гуянмишоохьенбы ва манбышик акаранбы вухьес чалышмишоохьи.