Г. Наврузова: «МаIънийбышилхъан гьавас кIыл’валике гидгъыл»

Аlхырейни сенбышее цlаlхни халкьын маданият гьаlракате водун. Мани каре хаlбна иш едни мизелин маlънийбы гьекlванбыше вуккекка. Мани мардан Муслагъни хивее ешемишейхьена Гюл’сават Наврузовайн иштыракыд хаlдын водун. Маlнкъее джени уфтанни маlънийбышика инсанаршин йикlбы шадаъан хил’дже сенбы водунбы.

 

— Гюл’сават, хошгелди редакциейхъа.

— Сагъул.

-Мысыйле хъийгъане мани санаъаlтылхъан гьавас гидгъыл?

— Музыкайлхъан гьавас захъад кlылвал’ике водун. Декке зас поштайка гармын  хъавалявъуйнкъаl,  зы мактабейхъаний гьаейкlан.  Манке заке гармын гёотас югбаб ваахаl дешдий.  Манчин дарсыбы гьелесда яныл’ инсаныр ыхьа деш. Заке эйхьени саягъыл’ мана гёотаний. Аlрейнче сабара сенбы адкlынийле хъийгъа,  вардишейхъа гирхьуна. Гойне хьинне, йигънагъбышейхъа хъейтlал гиргъыл’. Дёлесни хиваршейхъар гьайекlаннаний.  Мааъад джаванарше алгъаъайгьени джурабаджура йигъынджагъбышей иштыракний гьаъа. Дурустра гьейкlва гиргъылийн хаlдда сенбы дешинбы. Цlебба микрафон хылехъа алябтlыйнкъаl, маlънийбы югда хъигъечlива инам дешдий.  Йизди маlънийбышис инсанарше югна кьиймат гьуво къавджы, зы сикlыл’рар гьавасылхъа хъары. Гьаlшде яваш дейхьа тезе-тезе маlънийбы ойкlан водунбы.

— Къийна студией маlъний обкlуний сибыкна иш дешобна. Мани  карее кумаг гьелена спонсор ворнане?

— Йигъын ихтилет гьаlкlен водун.  Са маlъний гьаlзирааъасдимее, хаlбба вахт авайкlан. Гойне хьинне, студиее аранжировка гьаъас, сес окlанас йицlыд аазырле агъаллан пыл айкlан. Маныд йиздиме хаlдын хаарджий водун. Хъийгъалетти, зы авхуйнбы хьинне даватбыше гьеека деш.  Манчихъа ил’дяакы, зы зигаара гьааъа деш. Эйхьени саягъыл’ тезе маlънийбы окlанас чалышмишейхьена. Дагъамийваллабыд ыхьейид, явашейхьи дешда. Репертуарейхъа тезе маlънийбы адаччи.

— Гюльсават, къийна  йигъни репертуаре хаlдда уфтанын маlънийбы растына хъайли. Манчис нейинки зы, хаlббананбыше ахтына кьиймат гьооли.  Шаваане манчисын джуваббы ойкlан?

— Хаlдданани маlънийбышин джуваббы йизынбы водунбы. Йишди  доюкани шаирарше одкlунийн шечlбышис къадсырийн маlънийбыд кlыл’да дешинбы. Манбышди аlрайл’ хаlдданан маlънийбы  хьойиккелий аlшукь Сафарни, Аlбдураlгьим Дадашевни кал’мабышис одкlунийнбы водунбы.  Манбы йишди халкьни санихьыйнийий къийнийни йигъыс аваакlыйн шечlбы водунбы. Гьаlшде хьейибле тезе маlъний гьаlзирааъа вобна. Гьайни йигъбышее манбы одкlун таамхьесынбы. Манчисын джуваббыд ооъад добы агъмишауйни  автораршинбы водунбы.

-Аlхырейни сенбышее гьоокlанбышдыйий шаираршини аlрайл’ сабара наразийваллабы растына хъайли.  Маlънийбы гьаъанбыше иджаза дена манбышин шечlбы ишлемишаъа.

— Мани караке засыб хабар вобна. Мани ишил’ гьаммаше темизийвалла вухьес вуккан. Шаираршиле дюгледа шечlбы алятlас ыккан деш.  Гыргына иш мыслагьаlтыка къавджес вуккан. Зы  маlъний окlанасее гьихъа, гьаммаше манбышике хъидгlын гьаъан. Садджу манчиле хъийгъа, маlънийбы ойкlан. Йишди шаирарше ненкеджад кьадагъа гивхьес деш. Амма манчихъа ил’дяакы, хъидгlын гьаъас ыкканан. Мани сардан зы шаираршиле разийра ворна.

-Инсанарше хъидгlын гьаъа вод, няъасый Гюльсавате хаlдын сольный концерт гьидели? 

— Манчини гьаlкlне зынар фыкырашмиш ейхьи ворна. Хаlдын концерт гьелесдимее, йизди репертуарее гьеххаалика маlънийбы водунбы. Мани сардан дагъамийвалла дешда. Къийна дюнйейна вазият, пандемиейка багълыба дагъамба вобна. Гыргынанкъаl концертбы гьелен залбы, шадлыгъбы алгъайгьен хайбы утlумда водунбы. Манбы ачмишхьайле хъийгъа, концертна мыслягьаlт къавджесда.

— Къийна йигъни маlънийбышилхъа кlыры гьеленбышис гьиджо эгьес ыкканий?

— Йизди маlънийбышис ахтына кьиймат гьувойхъа гора, сагъба вухьенбы. Геледжагъыл’  манчиле уфтанни маlънийбышиква шу шадааъаснбы.

— Вахт тlабалавъу арыйхъа гора, сагъра йихьена.

— Шосуд угъур аlрзуламишаъа.