Дагъыстанни конституциейхъа гора, цIаIхбы Дагъыстанни 14-ни титульный миллетбышин са водун. Кьаануныхъа гора цIаIхбышихъадыд ахуйни миллетбышихъад хьиннеен ихтиярбы ва борджбы водунбы.
Анджах аIхреени вахтал’ ихтиярбы лап кIыл’ хъыхьа, амма борджбы хаIдхъыхьа. ЦIаIхбышихъад не район, не ДР-ни Халкьни маджлисее депутат, не ДжамаъаIтни палате уIзвы, не джегьилершини парламенте, не кьаIсинбышди совете, не чIакIни къуллухбышил’ джон эл’чера дешинбы. Манчин тахсиркарарыб мебынбы деш, шиджаб вобунбы. Багьнаб мана вобна : къуллухылинбышикIле джони гогьарбышиле гъайре, мебынбышин дагъамийвал’бы къадже деш. Манчихъа гора, сана-санкъулхъан ыIгьтибар, инам кIыл’хъыхьа ва миллетна садибийвалла дагъылмишивхьана. КьоIдъэсдаб йишди миллетна дагъамийвалла кьоIнахъауй вобна. Мана пайиб шас Совет гьоIкуматыке авху. АIхреени вахтал’ сиясат, экономика, дин, алвер аликкыйнбы. Гьаарынкъвее вудж агъайс гьыIсабаъа ва ёргъан джулхъа цIыцIааъа. Агар ши са мислягьаIтеехъа хъидябее, шахъад геледжагъ ихьес деш. Ши оIгумышивхьай, гьыIдчатбы, фитнаабы, гьорбы , миз’ооккуй, сана-санкъвее масса гьувойбы гьассарас ыккан.
Кьийна са миллетихъа джанеенче гёрхьанна инсан дешдаки , ашкарда, ачухда миллетын дагъамийвал’бы эйгьена. Интернете гивъур « кьаIран» ихтелет’бы гьаыйле гъайре, медын гьидчуд дешин. Няъас йишди миллетна дагъамийвалла Руслан Кьурбанове къалхымишааъа? Нявхьа йишин «кокси гетан» къуллухчера, сиясатчер, ааIлимар? Няахьа йишди интеллигенциейн сес’? Къийна сабара суалбы миллетиква алаакьан, джуке аIхани къайдайл’, ЦНКА-ни садрее Рафаел’ АIлиеве къалхымишаъа. Манкъукаб мислягьаIтеехъа хъооI деш….
Ши хаIбхъувхьес вуккан, йишин конституционный ихтиярбы къорамишаъас, садджу «десмалаъас» деш.
9 октябрьле гидгъыл къийнийни йигъылхъамее ЦIаIхни дерайл’ тIокIан иших дешин. Поштина йаIхъыб, гунайле йаIхъ гьааъава, гагь утIумааъана, гагь ачмишааъана. Телефонын связыд ишлемишехьи деш. ДжитIада, Сувал’на маIгьал аIзабее вобна. ТокIан иших адкIынна багьнаб йаIхъбы гьаъанбыйий токIан иших къекканбы мислягьаIтеехъа хъидябый вухьа. Поштина йаIхъ гьааъанкъаI, ганзарше токIан 3-4 диракбы гьыIгъакараы. Манбы тезелемишаъасдимее диракбы, симмар, техника , мантёрар, джамаъаIтын кумаг ыккан.
Хиваршини администрациебышди чIакIынбышди увгьойка, ишихбы адкIынни йиигъыл’ джаб джо хабар гыргыни токIани идарабышеехъа гьувона, анджах къийнаб мана дагъамийвалла гьаIллавъу дешобна. Манбышди увгьойка , агар кумаг лазымдахьее, хиваршин джамаъаIт гьазирда водун.
ШакIле ацIан, тIокIан иших дешданкъаI, Сувал’ни дерайл’ гыргын «хъойсанан». ГьаIшде гонбы гяатIана вахт вобна. Инсанаршис чурыбы гьуваджес холодильникбы лазымехьи. Интернет, телефон ишлемишдехьенкъаI, инсанар къел’-хыл’ къацIадкIунийнбы хьинне воохьи.
Хьуледле сенне водун гьамани дагъамийваликва растна хъабайлен. Сенис ямалыхбы деш алеетIас ыккан, тезелемишааъас быкырба токIана линия вуккан.
Октябрьни 12-чини эхьалийс Сувал’ни дерайлхъа ишихбы хъадыйнбы, телефонын связь ишлемишехьи гидгъыл. Мааъаб ешемишоохьени инсанаршин ешайиш чини гьаммашийни къайдайлхъа хъадыйн.
«Нур» кIазетни редакциейн джамаъаIтни дойиле токIан ишихбы хъауйнбышикIле, заIгьматбы гьаыйнбышикIле сагъул-варул эйгьи!
