Дагъыстанни маданиятыний мизяаршин Йигъ

Октябрьни 21-чил’ йишди республикее  Дагъыстанни маданиятыний  мизяаршин Йигъ илгъечIе. Мани йигъыл’ джурабаджур майдамбышее мани йигъыс къадсырыйн маджлисбы,  конференциебы, семинарбы алгъайгьи.

Сабара сенбына гьихъа Дагъыстанни миллетбышин маданият ва мизяар гьуваджесдимее   ДР-ни Правительствайн 21 октябрыл’ маданиятын ва мизяаршин Йигъ алгъагьасда мислягьаIт къавдже.  Мани Йигъна  метлеб Дагъыстанни миллетна кок, сифат, миз’, баба-дидершин аIдатбы гьуваджий вобна.

Миз’, адабият, маданият, йиссейн аIдатбы гьуваджий са хизаныний мактабын бордж дешодун. Манчини балее гыргын инсанар, ташкилатбы аххъас ыккан.  Манчини гьаIкIеедын телеверлишбы зарада-зарада гьагвас ыккан, СМИ-ше манчини гьаIкIеена вазият йишонааъас вуккан.

Гьар сен мани  Дагъыстанни маданиятыний ва мизяаршини Йигъыс къассырыйн йигъынджагъбы алгъайгьи, едини мизяаршил’ диктанбы ойкIан, миллетбышин майдамбы тамашейс гьагва. 

 Гьайни сен цIаIхбы ешемишоохьени хиваршди администрациебышее, мактаббышее  Дагъыстанни  маданиятыний мизяаршин Йигъыс къадсырыйн диктант « Дагъыстан — йишин хав»  одкIун.  НягьаIдый ман одкIун ва нен натийджабыйий гьагу, ши хъооIни кIазетни нумрее манчини гьаIкIеедын маIълумат гьелесын.

 «Нур» кIазетни редакциейн дагъыстанын миллетбы джони маданиятни, мизени байрамыква табрикаъа.  МуIгьуббатбы аIреедын гьалед маIгьккамхьай аIрзуламишаъа !