Майни вузани 22-23-чил’ республикайни гыргыни йыIкьнекни мактаббышее аIхырейдын зенгбы ыIхы. Мани йигъыл’ мактаб таамаъани шигыртарше, манбышис дарс гьувойни маъаIллимарше, ушахаршди деккяршейий едярше, абыйни мигьманарше хаIдын шадлыгъбы алгъау.
Гьини элейс йишди редакциейн ишчер Бабаюртни бинабышил’ни Калел’нийий, Тезе Муслахни мактаббыше вухьа. Мааъад маъаIллимаршикайий ушахаршиква саджигее, аIхырейдни зенгыс къадсырни шадлыгъбышее иштыракау.
Калел’ни йыIкьнекни мактабын магьаIлла тадбырбы ыккейсдимее гьаIзиравъу вухьа. Мактабни магьаIлле ши, директор Фергьад АIлиеве, маъаIллимарше къаршиламишавъу. Манбышди увгьойка, гьайни сен мактабыхъад 11-ъэсын сыныф таамаъан ушахар дешинбы. Манчихъа ил’дяакы, 9-ъэсын сыныф таамаъанбышди аIрайл’ мактабыква саламатамишоохьенбы вобунбы. Манбышис ши тентенейкван шадлыгъбы гьаIзирау.
Тезе Муслахни хивын йыIкьнекин мактаб гьайни сен хьони шыгыртын: хьебни гаде, кьоIни ичийн къадтиткын. Манбы йыцIыдсадъэсди сыныфын телебабы вобунбы.
АIхырейни зенгыс къабсырна линейка мактабни директоре Сафар Наврузовее аахъы. Манкъве махъа сабыйнбы табрикавъу. Мактаб быкыраъанбышис, манбышди делесинбышис геледжагъыл’ угъурбы гьевхъу. Директорее ушахаршис геледжагъыл’ югна, хошна йаIхъ аIрзау. Манбышике гьаIкIен кар ацIан санаъаIткар вухьес, хайишау. Сафар маъаIллиме, ушахаршис дарсыбы гьувойн маъаIллимарыб табрикавъуйнбы. Манбышис ушахар гаIзириавъуйхъа гора, сагъулва увгьо
Гойне хьинне амур хъаIбхъы. Шыгыртаршис мактаб таамауйни гьаIкIее хабар гьуво.
«Нур» кIазетни редакторе Байрам Абдуллаеве джуни чыхыше мактабын маъаIллимар, шигыртар, махъа сабыйнбы уфтанни шадлыгъбышика табрикаъанкъаI увгьойн: «Къийна Тезе Муслагъни йыIкнекни мактабее садджу цIаIхбышди ушахаршеджад деш, делесни аварбышдийий, даргибышди банабышиле хъавайлени шигыртаршед тербие, билиг аляатIа водун. Манбы мактабее са хизаын ушахар хьинне вобунбыва агъмишау. Къийна мактаб быкыраъанбышин аIхырейдын, тезе мактабейхъа хъавалесынбышин цIеддыйн зенг водун. Гыргыба манбы йикIейнче табрикаъанбы».
Гьайни сен мактаб быкыраъани сыныфыс регьберийвалла Надир Сулейманове гьавъу. Манкъвее трибунейнче мактабни маъаIллейхъа сабыйнбышис минатдарийвалла агъмишавъу. Гойне хьинне увгьойн: «ЙицIыдсадсенна мактаб вушда хизан вухьа. Шос гьиняаъад цIедда окIанас, хъаIдхъас хаIдхъыхьа. Мактабын шоке югун билигнан, кар ацIан инсанр гьавъу. Геледжагъыл’ шакIле вушди сурале садджу югун сесбы къайххьес ыккан. Шоке югун санаъаткарар вухьа, къавджес вуккан. Шос югна йаIхъ, угъурбы аIрзаъа».
Мактаб быкыраъанбышис хошун джуваббы манбышди деккяршейий едяршед увгьойнбы. 2023-ъэсди сен мактаб быкыраъанбышди джаргее Наврузова Майрам адийна невар ворна. МаIнкъее мактаббын маъаIллимар, шыгыртар уфтанни джувабышыкайий шечIбышиква табрикавъу.
— БатIрайн балабы, шу гыргыба вушди байрамыква табиркааъа. Шос дарсыбы гьувойни маъаIллимаршис сагъулва эйгьи. ЦIеддыйни сыныфыле къийнийлхъамее манбыше шос аIкIел’, ацIал’ гьуво. Къийна вушдимее аIхырейдын зенг ыIхас. Нена няхъа ааIхьей, джона иш угъатыква вухьена абчена. Геледжагъыл’ хъаIдхъый ыккейсдимее, фыкрее аххъыйни аали мактабышехъа иккебчIес къисматхьен!
АIйнейхъа верыгъ уIвхыI,
Хаахъа шавух воб гибхьы.
Мактабни магьаIллейхъа,
ЗвонокIын сес гидхьу.
ЙаIхъбышил’ асфальт ихьен,
Мактаб ачухда ихьен.
Шос дарсыбы гьувойни маъаIллимаршин
Джанбы сагъда ихьенбы.
Шадлыхбышее дагъайдни сыныфбышди шигыртаршед, мактаб тааманбышис къадсырыйн шечIбы хъаIдхъы, хурун-хурун тамашебы гьагу.
ЙыцIыдсадъэсди сыныфни телебабыше джос дарсыбы гьувойн маъаIллимар табрикавъу. Манбышис джо хъаIдаххъанкъаI гьувойни билигыс, тербиейс ахтына къиймат гьуво.Шигыртарше маъаIллимаршис минатдарийвалла агъмишавъу. Гыргынбышис тIетIбы гьуво.
Йигъынджагъни аIхырее мактаб быкыраъанбыше хаIйбышейхъа шарбы къайиккы. Манчиле хъийгъа, аIхырейдын зенг ыIхы. Махъа сабыйнбышис мактаббы быкырхьай ацIаляу.
Тезе Муслагъни йыIкьнекни мактабее аIхырейдни зенгыс къадсырыйн йигъынджагъ тентенейквани мыкIаршиквайий, едигарыс ыIхыйни шикыл’бышике таамхьа.
АIхырейдын зенгыс къадсырыйн югун тадбырбы ЦIаIхыйни дерайл’ни хиваршеедни йыIкьнекни мактаббышейид илгъечIуйнбы. Мишлешни хивни йыIкьнекни мактабын гьар сенийдын хьинне, гьайни элесыд мани йигъыс гьаIзирауйн йигъынджагъ алгъавгьу.
Мактабни гьийбна магьаIалла ярашугъейхъа абчы. Шигыртаршиква саджигее хивын джамаъаIтыд махъа тамашейхъа сады. АIхырейдни зенгыс гьаIзирауйн шадлыгъ мактабни директоре Арсен Мурадове аахъы. Манкъве цIедда мактаб чаIваъан шигыртар, мактабын коллектив, хивын джамаъаIт, абыйн мигьманар табрикавъу. Гойне хьинне, увгьойн: «Къийна вушдимее югун, аIзизын йигъ водун. ГьаIшде вушди гьийдын геледжагъылхъан аккабы аахъа водунбы. Мактабын шос йыцIыдсад сенна тербие, ацIаал’ гьуво. Манчина кок утIумауй шоке аIсылыда водун. Чалышмишувхье, садибын имтаIгьанбы югда хъелес. ШакIле шу аали мактаббышей хъаIдаххъа къавджес вуккан. Шос гыргынкъус югна, ачухна йаIхъ аIрзуламишаъа».
Мишлешни хивни администрациейна хааIрна Ислам Ибрагьимовее мактаб быкыраъанбышис, манбышис дарсыбы гьувойни маъаIллимаршини коллективыс югун дилягбы гьеххъы. Манкъвее линейкейхъа сабыйнбышис мактаб таамауйхъа гора, барака гьавъу.
Мишлешни хивын йыIкьнейкин мактаб гьайни сен ёкьни шигыртее таамау. Манбы кьоIйре гадебыйий, кьоIйрер ичер вобунбы. Манбышди сыныфни регьбере Исмаил Мамедове джуни ихтелете ушахаршис ахтына къиймат гьуво. Манкъуни увгьойка, ушахаршихъад гуджнакван хъаIдхъый водун. Манбышди гыргынкъве хъийгъыйни ыIмрее гьаъасын санаъаIт гьийгъанче гьийхъа сечмишау водун. Манбы джони мурадылхъа гьивхьарасын захъад хаIдын иням водунва, манкъве агъмишау. Чыхышни аIхырее И. Мамедове манбышис угъурбы аIрзау.
Йигъынджагъейхъа сабыйнбышди гьийд мебынбышед чыхышбы гьауйнбы. Манбышед мактаб быкыраъанбышис югун геледжагъ гьеххъы.
Линейка таамувхьале хъийгъа, шадлыгъбы гидгъыл. ХъаIдхъыйн сен югни къийматбышиква быкырауйни ушахаршис граммотабы, таIърифын кагъызбы гьуво.
Манчиле хъийгъа, аIадт гьуваджы, мактаб быкыраъанбыше цеддыйни сыныфни шигыртаршис гьадиебы гьуво. Хурунбышед манбышис тIетIбышин тIуччер гьаIзирау ыхьа.
Мактабни магьаIлле аIхырейдын зенг ыIхыйле хъийгъа, маIърака гибгъыл. Мактабын шигыртарше, маъаIллимарше, хивни джамаъаIтын тохувхьесынмен мыкIарау.
