ШакIле ацIан, къийна инсанна ыIмыр, ешайиш телефоныква багълыда водунбы.  Агар телефонын связь  дешхьее, инсан къел’-хыл’ айтIылна хьинне хъехьи. АIсас магьаIбна тегьер сувал’ ешемишоохьени инсанаршис дагъамба хъабайли.

Сувал’ни маIгьалылхъа мобильный связь хъадыйн хаIдда сенбы водунбы. Къийна манчиле гъайре, сувал’ни цIаIхбышди хиваршее интернет ишлемишехьи гидгъыл .  Эгьес эйхьи, цIаIхбы дюнйейл’ни хабарбышди торее вобунбы.  Манзил’ни аIрее  манбышикIле дюнйейлин хабарбы ацIахьенбы. Анджах сабара дагъамийвал’бы, токIан иших адкIынийнкъаI эхьи. ТокIан иших Сувал’ни маIгьалыл’ экIда-экIда айкIан. Манчин сабаббыд шакIле ацIанбы : йиссейн трансформаторбы, симмар, истолбабы. СыкIылин гёгъыйбы, йизбы, мыцбы ыхьамее , манбы харабехьенбы. ОIт’мишхьайни уIл’джумее кьоIдле йигъна телефон ЦIаIхни дерайл’ ишлемишивхьа деш.  Телефонни вышкайлхъан токI ХыIягъни хивни трансформатореенче аIл’гьаа водун.  ЦIаIхни администрациейни хааIрункъуни Вагиф АIлиевни увгьойква , мани хивеедын трансформатор харабхьа. Манчихъа гора,  телефонын связь даянмишхьа. — КьоIдъэсди йигъыл’ зы хивни адамершиква Софий Наврузовыква, Арсен ШаIъбановыква ва мебынбышиква трансформатор гёдхьунни джигеехъа гьабкIын. Йишди увгьойка, трансформаторе замыкание вод ыхьа. АцIа деш манчис юрдылым хъетIу ваяхуд замыкание ыхьай. Махъа ши токIан генератор ыккы, маIгьад телефонын связь къайиккы. Манчиле хъийгъа , ши районни токIбышди идареехъа хабар гьуво. Манчиле гъайре, ши зенгбы  МаIгьачкъалее токIбышди идарабышее ишлемишоохьени йишди цIаIхбышилхъа – Кьурбан ЫIмаровылхъайий ГьаIзрат Гераевылхъа зенгбы гьаъы. Манбыше шас умыдбы гьувойнбы дёлесийвале ман трансформатор хъаъас, нейид медын тезе трансформатор гиххьес. Ман ишбы вахтал’ гьаъасдимее, гьаIракатука саджигее ишлемишивхьес вуккан, — В. АIлиеве увгьо.