Су1лгьыквани ишиква ма1шкьулхьай, дёлесни инсанаршил мугъаетхьай — манбы гьар инсаныс лазымын ва ваажидын карбы водунбы. Анджах гьа1шдийни заманайл`, ламыс, гьа1яа, къорху инсанаршина к1ыл`хъувхьайнкъа1, а1сас джегьилер йа1хъыле гъадар ра1гьатба гьааъа. Динини джуваббышиква алдамишавъу , джегьилера челякканеехъа аккяаъа. Джон метлеббы быкыраъасдимее, джегьилер а1джалылхъа йа1хъы1ляаъа.
Манчина гьа1кьийкьатыйвалла ваац1авхьесдимее, Ц1унт1айни районни Хамаитли хивее ешемишехьени Арсен Кьадировыс йы1кьна кьиймат хъевлес гибхьы. Джуни джегьиливал`на ха1ббанана вахт дустагъее абк1ын, деккикейий едике , хунащейке, ушахаршике а1кьана. Манкъулхъа террористаршис кумагаъава тахсир гиххьы. Арсенни увгьойква, ма1гьад манкъуни ы1мрен накьыш бирданхьессе учотхын.
«Зы Хамаитли хивни делесни ч1алагее осбыний гьаъа. Бирданхьессе зас къаейна теркене хъабы хъибхьыр. Ёкьсуралххъа илякканкъа1, засхъа инсанний дёлесхъехьи. Мана йизда эмизада ыхьа». Сабара вахтна гьихъа мана « ч1алагахъаний арк1ын». Манкъвее Арсеныке охьанасын гней гьеххъы. Нягьа1дне гогьарыс гней гьиделес? Манчиле хъийгъа, гьаргьаммаше чоджни хааишиква «ч1алагни» дестейс охьанасын кар ыккекка ыхьа. Манке джегьилихъад 19 сен ыхьа. Мани ешее инсан вуджее къеджени ишбышил ` къаммышхьес ыккан. Анджах мани ешее Арсенее даватбы гьау, хизанна есси ыхьа. Манкъук1ле ац1а ыхьа, вуджее терсинан карбы гьаъа ыхьай, анджах манкъуна вук1ул ` къаршламишивхьана.
«Джегьил` ыхьа, эб джанее хъооххьар вухьа. Манке зы хъоркура ыхьава увгьо, зы кьа1раман ворна» — манкъвее увгьы.
Сабара вахтале манкъухъад террористаршикван алакьабы ыхьай, ихтиярбы гозетяаъани ишчершик1ле ац1ахьа. Арсен манбыше аххъына, гойне диван къац1адк1ун. Манкъус 5 сений 4 ваз йы1кьни дустагъна гьувы. Диван ц1ыц1аъас Татарстанылхъа о1тирау. Мани дагъамни вахтал` джуни к1ане садджу декий ед , хьунащейий ушахар, джанан чоджар авайку.
Дустагъеехъа аххъыйни кьо1ни вузаке Арсенык1ле ац1ахьайн, джуни хьунащейс ушах ыхьай. Манчин манъус ры1гь гьуваджесда ва ы1мрелхъан гьавас гьидякьварасда умуд гьуво. Дустагъейиб ы1мыр бадалааъас воохьена. Джегьилее мааъад машинбы хъаъанбышин санаъа1т алет1у.
Шаца, декабырни вуза дустагъее диван ц1ыц1ау, хъары едисый деккис, чоджаршисый хьунащейс, 6 сенеени духайс ху1ваайирхьуйле хъийгъа , мана тезена ы1мыр гьааъа гиргъыл ` .
«Дих ха1рхъаъас ыккан, мебын ушахар вухас, иш т1абалааъас вуккан, едисый деккис, чубышис кумаг гьелес, хизан доламишааъас вуккан. Анджах хивееаб иш т1абалавъуй вахарийна иш дешобна. Хъийгъад, захъад иджааза дешин менняа1нкъа аа1сын. Са сениле къадагъайна вахт быкырывхьесда. Манке ишлемишхьес магьачкъалайни шагьареехъа а1лгьаас. Фыкрее водун машинбы хъаъан санаъа1т гьауй ваяхуд устадыйвалла тиклибышее гьавъуй. Гьалекийс хаадын ишбы гьаъа водунбы» — Арсенее эйгьи.
Гьа1шде манкъухъад 26 сен водун. Мани дагъамийвалике илгъеч1уйле хъийгъа, манкьве джегьилершис тербие гьелен мислягьа1тбы гьели, нягьа1бый мани тореехъа гидябк1ас, мааъаб садджу ы1мыр гьавакьарааъа: «Деккихъайий едихъа к1ыры гьеле, манбышис кумаг гьеле. Гьорбы ва нягьа1кьын ва1ъазбы гьелени динэгьлершилхъа к1ыры гимаххъа, Манбы гьорбы водунбы, инсанаршике топкъалайсын чуры гьаъан. Мерункъуни са1гьыфбышил ха1бхъувхье, шу гьимаъа ман гъалатбы».
Арсен хьинеенбы Цунт1айни районе к1ылба деш вухьа. Ха1бба вахтна ман район террористар ха1ббанан район ыхьа. Хивни агъсаххъални Муса Сиражудиновни увгьока, мааъаб эн писда вазият 2010 гибгъыл 2015- хъамее вухьа.» Ха1ббанан джегьилер Сиреехъа абк1ын, сабаранбыше террористический актбы гьаъы».
Сираджутдинове месалайс са хабар абляаъа: «Ха1бананбышик1ле къайиххьы ихьес, нягьа1рий йишди хивни са джегьиле вуджееджр вудж Къызларни шагьарее къит1ок1алау. Сайиб манкъун кьо1йре чоджар спецопирацие гябт1у. Авхуна хизан иняхъа-шахъа дагъымишивхьа абк1ын. Ма1гьаб ха1бна хизан дагъылмишивхьа». Манкъуни фыкырбышиква, джегьилер йа1ххъыле терсинани пропагандайн гъадар гьавъу. Манбыше ман дарсбы интернетеенче алет1у. Са манчини тореехъа гирхьуна, авхуйнбы манкъвее ц1ыц1авъуйнбы. Манчина багьна районее джегьилершихъаб иш девхьай вухьа. А1хреени вахтал` вазият кокале бадалувхьана. Къит1отк1улыйбы, спецопирациебы кыл`хъыхьа. Инсанар сакитывхьайнбы, хьа1бкьынийна къорху джанеенче абк1ынна. Джегьилерыб гьорбышилхъа инамышоохьи деш. Манбышик1ле ац1ан, джо топкъалайни чурыйс ишлемишааъа вухьай».
Ц1унт1айни районни хаа1рункъуни ма1ъвынни Ы1мар Ма1гьаммадовни увгьойка, джоке джегьилершини а1рее профилактик иш вуккеес ва1вхийква гора, мани баляан о1ги даянмишаъас а1хыйн. « Анджах ма1гьабна профилактик иш о1гее лазымни къайдайл` вукку деш. Манчихъ гора, ма1гьдын лайикьий дешин гьа1дисабы ыхьа. Къийна йишди районее текасейрак джегьил ` инсан, 90 –ди сенбыше ваяхуд хъийгъа едике вухьайн хызаххас ,не дустагъее гидюурна, нейир гидик1уна.
Къийна дустагъее диван ц1ыц1ауйни ха1ббананбыше шас профилактик иш вуккейс кумаг гьаъа, манбыше мани йа1хъына зараалла, къорхувалла джегьилершис ашкарааъа»- манкъвее эйгьи.
