Цывлихъа редакциейн ишчер Сувал’ни магьалылхъа сафарыйка хъигъебачlен аlдат водун. Манке редакциейни ишчерше хиварше  ешемишоохьени инсанаршикан горушбы алгъайгьи, мааъад ишлемишехьени ташкилатбыше воохьи. Сувал’ни хиварше ыхьайни бадалхьайбышиква делёсваленче танышоохьи. Манчиле гъайре, кlазетыс подпискабы саъа. Гьайни йигъбышее редакциейн водун аlдат гьуваджы, мееб сафарийс хъигъебчlы.

 Гьини элес зы джурайра, гьоlкуматни сураке аlхырейни сен хаlбна фыкыр гьоолени инсанаршин ешайиш юг хъаъасдимее, социал мисалабышика дёлесвалейнче танышхьа. Цlерра зы сувал’ ишлемишехьени инсанаршина сагъламийвалла гьуваджени ташкилатбыше ыхьа. Манбышди вазиятыка танышхьа.

Къийнийни йигъыл’ инсанаршина сагъламийвалла  гьуваджесдимее  Сувал’ни магьаlлыл’ са больница, са амбулатория, йигlылед ФАП-бы ишлемишехьи водунбы. Манчини аlрайл’ сабарабы тезеда аляуйнбы водунбы. Ахуйнбыд гьинчиле хаlдда сенбына аахъыйнбы водунбы.  Аlлгьааlни сен Гыл’мецlнийий Джинаlгъни хиварше тезе ФАП-бы аляу, истифадейхъа хъуво. 

Зы цlерра Гыл’мецlни хивни ФАП-ни ишиква дёлесвалейнче танышхьа. Манчини ишиква зы дохтур Аlбдурагьман Мирзоеве ФАП-ыхъад уфтанын гозер, чlырынбышис цlеддийн кумаг гьелесдимее, мааъад гыргын имканбы водунбы. Дохтур Аlбдурагьман Мирзоев мааъар ишлемишехьена хаlдда сенбы водунбы. Шаквани горушее мана къийна ФАП-ын инсанаршина сагъламийвалла гьуваджесдимее вуккеккани ишбышике йишонхьа.  Манкъуни увгьойка, ФАП-ын хиве ешемишоохьени инсанаршис цlеддийн кумаг гьели. Чlырынбышис маалидже ыккека. Шахъад джурайда едаршин утагъыд водун.  Гойне хьинне Аl. Мирзоеве  къийна карановирусыка багълыда, ФАП-ын вуккеккани ишбышике гаф гьавъу. Дохтуре мани сардан хивее сакитийвалла вобнава кьейдау.  Хъийгъалетти заквани горушее манкъве кьейдгьауйнки, гьихъа Гыл’мецlа чlырынбы вухьайнбы. Манбыше гьагуйни саягъылин маалидже алятlуйле хъийгъа, хъувабкыйнбы. Чlырыхъувхьайнбышике хъикlунар ыхьана. Хивни инсанаршис вакцинабы гьаъа гидгъылийле хъийгъа, начахынбы растына хъавайли деш. Къийна Гыл’мецlни хиве хаlббананбыше вакцинабы гьау водунбы.  ФАП-ни ишике, мааъад къаджейни темизийвалике зы геер разийра аху. Зы са караке нарязийра аху. Махъана йаlхъ девхьайхъа гора, инсанарше хаlбна дагъамийвалла цlыцlаъа. ФАП хивни къузайыл’ аляуйхъа гора, кьыlдимына йаlхъ мыккын авхъаххъа. Чlырынбышдиме махъа гьаркlыний-хъарый дагъам хъехьи. Хивни администрациейна хааlрна Гъейбулла Имранове махъана йаlхъ гьайни дёлесийвалей абрейхъа адчесынва увгьо. 

Хъийгъыйн йизын горуш  Цlаlхийни хивни амбулаторие илгъечlу. Хивни джамаъаlтни увгьойка, амбулаторие аляуйн хаlдда сенбы водунбы. Гьийдни сенбышее ман больница ыхьа. Амбулаториейн Цlаlхийни администрациейхъа аlккяаъани хиваршее ешемишоохьени инсанршис хидмат гьагва. Базарын йигъ ыхьайхъа гора, манчини хааlрынкъуква горушмишхьес зас къисмат дехьайн.  Амбулаториейн адын джига манмегад писда дешод, амма  къадын баругбы беябырда вод. Сувагъбы хъодуйни баругбыше уфтанни Цlаlхийни хивын ярашугъ темизда  акlанаъа вод.  Мани каре Цlаlхийни хивни администрациейна хааlрна Вагиф Аlлиевейид, джуна наразийвалла билдирау. Манкъуни увгьойка,  къийна амбулаториейни ишиква, манчини ремонтыка багълыданан мисалабы районни къуллухчершини гьийд хьулехье агъмишауйнбы. Амма мана мисала къийнаб са суралхъа хъувхьа деш. Амбулаториейна бинаа къаанче темизба дагъалмишувхьа  вобна. Къийна манчис ремонтын ишбы ыккейс ыккан. Дешхьее мана оокlласда гичl вобна.

Вобни дагъамийвал’бышихъа ил’дяакы, амбулаториейни ишчерше джона иш вуккекка вобна. Амбулаториейна ишчий Эминехатун Раджабовайни джуваббышихъа гора, чlырынбышис джоке ахаlн кумаг гьели водун.  Къийна манбыше гыргынанкъаl хьинне,  коронавирусыка вуккеккани профилактикайни ишбышис хаlбна фыкыр гьооли вобна. Гьаlшде администрациейхъа гядакlвани хиваршее ешемишоохьени инсананаршини гелессынкъвее вакцинабы гьау водунбы. Къийнийни йигъыл’  коронавирусыка чlырынбы мани хиварше дешинбы. Манчиле гъайре, гьайни йигъбышил’ гриппына чlырывалла девхьесдиме хурни ушахаршис вейбар ыlхы.

Къийна Сувал’ни магьаlлыл’ са больница ишлемишехьи. Маныд Мишлешни хивее водун. Сувалин гыргыни хиваршейнчен чlырынбы маалиджейс махъа хъавайли. Больница йыссейда водун. Тезе аляаъасва гьаlзирувхьайн хаlдда сенбы водунбы.  Джамаъаlтын ман гозетяъа водун. Больница йиссейда ыхьейид, ман абырыква гьуваджи водун. Мааъад гьар вахтал’ темизийваллайка растына хъалес эйхьи. Больницайна хааlрна дохтур Геланний Ибрагьимов ишыква багълыда районейхъа гьаркlын ыхьа. Телефоныкани ихтилете, манкъвее  коронавирусыка быгълыда ыккыйнийий ыккеккани ишбышике гьар суракен маlълумат гьуво.  Манкъуни увгьойка, аlхырейни вахтал’ мани диагнозыква больнице начахынбы вухьа деш. Хивее хаlббананбыше вакцина гьавъу вобна. Манчиле гъайре вейбар ыlхаlс гьаlзирувхьайнбыб вобунбы. Вакцина хъавалес гозетяъа вобна.

Маныд эгьес, сабара хиваршейдын ФАП-бы доюил’нимее ишлемишехьи, няъас  увгьое манбы гьаммаше утlумда эйхьи. Манчин график садджу мааъаб ишлемишоохьенбышикlле ваацlа. Манбыше джос ыккананкъаl аахъанбы, гойнед мани саягъылид утlумааъанбы.

Хиваршее инсанаршина сагъламийвалла гьуваджесдимее ишлемишехьени джигабыше къаджейнче зы гьам шадау, гьамыр пашманауна.  Са джувабыка увгьое, гыргынанкъаl югни ишбышика саджигее,  нукьсанбыд растына хъадыйнбы. Къийна зы гьини  макьалее  мани ишин тахсиркарар тlабалааъа деш. ФАП-быше, амбулаториейн, больницайн джона иш сыкыlлбаб гьаlракатейхъа хъалявъээ писда жехьйий. Ман кал’мабы районее гювъурни къуллухчершисыд аваакlа водунбы, няъас увгьое къийна йишди оlлкее  инсанаршина сагъламийвалла гуваджесдимее хаlбна иш вуккекка вобна.