Мишлешин йыIкьнекин мактаб ЦIаIхни дерайлин эн хаIдын мактаб водун. Мааъад хъаIдаххъани ушахаршин, ишлемишоохьени маъаIллимаршин сай хаIдын ыхьайхъа гора ва югун ацIаалин натийджабы гьагвава, ман базовой мактабыс гьыIсабехьи. Йишди мактабын къавуккуйн шигыртар гьаIшде гьар джура чIакIни къуллухбышил’ ишлемишоохьи вобунбы.
Манбыше джо хъаIдхъийн мактаб, дарсбы гьувойн маъаIллимар гьуIрматыква гьувааджи. Манбыше джо хъаIдхъийн мактаб, дарсбы гьувойн маъаIллимар гьуIрматыква гьувааджи. ЙыIкьнекин мактаб Мишлеше ачмышхьайн 63 сен водун. Мани вахтни аIрее мактабее хаIдда бадалхьайбы ыхьа : хъаIдхъийн къурлыш, Госстандартын тIабалбы, мактабын бинаабы (корпусбы), директорар бадалувхьа. Анджах хъаIдхъийлхъан, ацIаал’бышилхъан гьавасбы ва гьаIракатбы ши гьаммаше гьуваджийнбы. Гьел’бедти, мактабыхъад Рособрнадзорын гозетяъан шарааитбы водхьее, гьам маъаIллимын, гьам ушахын ишилхъан, ацIаалилхъан гьавасбы хаIдхъехьи.Мишлешни мактабее зы ишлемишехьен 54 сен водун. Мани сенбышди аIрее зы гьар къуллыхбышил’ ишлемишхьа, хаIдда кар къадже-къайиххьы. Къийнар зы мактабее директорна маIъвынна (завуч-организаторна) ишлемишехьи. АIхреени сен мактабна либас быкырба бадалувхьана. Шаца Мишлешин мактаб 100 хъаъасди республикайни мактаббышди джаргеехъа программайка иккечIу. Рутул районеенче кьоIдле: Мишлешиний Къенын мактаббы гядкIу. Мани программайка йишин мактаб аIдатыйда къаанче, аанче абрелхъа адчы. Чардах, къадын диварбы, къулепбы, аккабы бадалау. Адын сыныфбы къайдайлхъа хъаляу. КъуIман, мыкIан хьян, къел’- хыл’ гьогъаласын умывальникбы, туалет ахъа аккишы. ГьаIшде ушахар хылеббы гьогъалас аккасяхъа хъигъебачIи деш. ГьаIшде уфтанни, темизни, ишыхека гяцIыйни мактабеехъа гьавасыква шигыртар, маъаIллимар, ишчер икIеебачIи. Манчин ацIаалилхъан гьаIракат, гьавас гьалед гуджлемишаъа. Йишди ушахаршис, джамаъаIтыс маIгьабна пай гьувойхъа гора, Дагъыстанни ХааIрункъус Васильев Владимир АIбдулаIлийни дихыс Мишлешни хивни джамаъаIтын миннатдарийвалла агъмишааъа. Гьел’бедти, йишин мактаб мани программехъа гихьасдимее, районна регьбер Ибрагьим Ибрагьимов, Мишлешни мактабна директор Ислам Ибрагьимов хаIбба чалышмишивхьа. Мани заIгьматын натийджабы шакIле къедженбы. ОIгее мани сардан гьаъасын ишбы гьале мейид водунбы.Йишди мактабыхъаб кьоIбле бинаа( корпус) вобна: са хаIмна, сайиб кIыл’на. ХаIбна быкырба хъавъуна, анджах кIыл’на корпус мани программехъа гибхьы деш. Ши чалышмишивхьесынбы манаб геледжагъыл’ либасеехъа хъаваляаъас. Мактабыхъад къад спортын дезгагьбынан майдан водун. Мактабын библиотека тезе ФГОС-ни стандартбышиквани китаббышика тезелемишхьа. Мани карейиб шахъаб къийна дагъамийвалла дешда. Къийна Дагъыстан Республикайн хъаIдхъийн ва ыIлимын министерства мактабылхъа «акьвуйна» садкIыл водун. Шахъаб мактабее гьаIшде са дагъамийвалла вобна. КьыIдимына мактаб ши къаейни гIадырыква къуIмаъа. Гагь югна гIадыр хъабайли, гьагь гьаIш. Манчихъа гора, дагъамивал’бы кьыIдимни сурал’ яранмишехьи. Гойнед гьаммаше мактабее угарын, чаIпал’ни кумайн эва гехьа, хивын экология харабаъа.Сабара вахтна гьихъа мактабни регьберарше манчини гьаIкIеена гаф Рутул районни хааIрункъус Ибрагьим Ибрагьимовыс агъмишавъу. Манкъвее гьайни сен мактабын отопление гIадырыле богъалинчилхъа (паровойлхъа) бадалаъас кумаг гьелесынва, джуваб гьуво. Агар ман кар гьаъас аIхее, мана аIълаана иш вухьес.
