Коронавирус чIырвалла дюнйейлхъа еймишоохьи Китайле сабара вахтна гихъа гибгъыл. ГьаIшде манчин гыргын дюнйейн континентбы гьалакау водунбы.
Мани хъигъоочIени COVID-19 эзерын садджу гьо1куматбышин экономикабыджад деш, хъаIдхъийид паралидж гьаы. ХаIдданан университетбы, колледжбы, мактаббы, ушахбахчебы карантинеехъа утIумхьа. ШакIле ацIан, агар хъаIдхъий даянмишэъээ, аIхир югда хъалес деш. Манчихъа гора, Россиейни хъаIдхъийн министерства мислягьаIтеехъа хъадыйн ааIли мактаббышди телябабышис, мактаббышди шигыртаршис дарсбы дистанционныда ыккейс. Ман хъаIдхъий маъаIллимнийий телябабышди, шигыртаршини аIрее манзилеенче илгъечIи, йаIъни гьаарна джуни хааъар гиъур, интернетенче дарсбы илгъечIи ва тапширыгъбы гьаIллаъа. Гьел’бедти, магьаIдни хъаIдхъийхъаб, шенчина хьиннена гудж дешда. МаъаIллимыке гыргын хъаIдхъийн процесс къулайква ыккейс аIха деш. Гойнед гыргынкъухъад деш интернет водун, ва гыргына деш интернетыква ишлемишхьес аIха. Анджах чараа дешди джигее, гьидчуджад гьидяуйле, манаб хаIбна иш вобна. Шагьарбышее дистанционныда дарсбы ыккий сыкIылда вахарийда ва къулайка водунбы, няъас увгьее гьиняаъад интернет, токIан ишихбы гьаммаше эхьенбы. Сувал’ни хиварше, ман хъаIдъийн процесс сыкIылда четинда ыккейс эхьи, няъас увгьее гыргыни деш хиваршее интернет ишлемишехьи. ТокIан ишихбыд сувал’ни хиваршее зарада-зарада айкIан.Дагъыстанеедын гыргын мактаббы, коронавирусыхъа гора, дистацинный хъаIдхъийлхъа илгъеечIу водунбы. НягьаIдый Сувал’ни маIгьалыл’ ва Бабаюртни бинабышил’ дарсбышин илгъечIуй ацIахьесдимее, ши мактаббышди директораршис ва завучаршис хааишау. ЦIаIхни йыIкьнекни мактабни директоре АIбдулгьаIмид ГьаIджиеве хабар гьувы: « Дагъыстанни хъаIдхъийни минитерствайни амурыква дитанционный усылылхъа йишин хъаIдхъий 2020-ъэсди сенни 6-ъэсди апрелиле илгъечIу. Мана иш къулайлхъа абчесдимее, цIерра джаваб хъелесда регьбер тасдикьау. Манкъвее сыныфни регьбераршиква саджигее тезе технологиебышикена иш вуккекка вобна. Гьар йигъысда хъаIдхъийна расписание къурмишааъа. Шигыртаршиква гьар дарс дистанционныда 30 дакьийкьана илгъечIи. Манчихъа гора, дарсан пIлан бадалаъас гехьа. Ши садджу шигыртаршиква джаб деш, джони деккяршиквайий едяршиква ишлемишоохьи. Назарат ыккекка, тапширыгъбы ёхламишаъа, хъаIдхъийн екунбы алгъайгье. Анджах ши дагъамийвал’бышикваб хъызааханбы. Манбы аIсас интернетыква багълыдананбы водунбы.Муслагъни мактабни директорни Мустафа МаIгьаррамовни увгьойква, джойиб хъабхъийна программа дистанционныба алгъааI вобна. Йигъыс мактабни маIъаллимарше маниторинг гьаъа водун. Тезе хъаIдхъийни формайн ушахаршин гьавас ацIалилхъа ачмышаъа. Мани хъаIдхъийни процесее гьаIшде гыргынбы (маъаIллимар, ушахар, деккярый едяр) къайгъвее авхъу вобунбы. ХъаIдхъийле гъайре, ши ушахаршис тербие гьели нягьаIбый джо чIырвалике къорамишивхьес,- М. МаIгьаррамове увгьы.Гьамани джа къайдайл’ дарсбы Мишлешни, ДжинаIгъни, Миххьейни, Гыл’мецIни, Лекни мактаббышее аIлгъаа водунбы.Гьайни йигъбышее йишин телефоныкван алаакьа Бабаюртни районеени Тезе Муслагъни мактабни завучика Сафар Наврузовыка ыхьа. Манкъейиб шас Тезе Муслагъни , Калел’ни, Камбулатни, Тезе Борчини мактаббышди хъаIдхъийна аIгьваалат йишон гьавъу. Манкъуни увгьойка, ман алядхъийн мактаббы гыргыда дистанционныда ишлемишехьи водунбы. Манчиле ооъад маIгькамын назарат водун. Къизил’юртни ТУО вахтале-вахталхъа ёхлама ыккекка. Тезе бадалхьайбышиква танышааъа. Лазымхьее кумаг гьели. — Къийна гьалекийс мани сардан йишди мактаббышихъаб хаIбна дагъамийвалла дешда. Инамаъан , ши мани хъаIдхъийни ва быкырни ешайишни дагъамийвал’бышике хъигъебчIесынбы. ЧIырвалин оIги ыIхасын. Мактаббышеехъа ацIаал’ ва тербие алеетIас ушахар хъавалесынбы,- С. Наврузове увгьо.Шасыб садджу геледжагъылхъана умуд авху. Аллагье гыргынбы йыIкьни чIыврал’бышике гьуваадженбы ва хъобкуни йаIххъылхъа сааъанбы !
