Гьайни йигъбышее Рутул районни админстрациее йигъынджах илгъечlу. Мани йигъыл’ районни хааlрынкъве Ибрагьим Ибрагьимове Челябинскни шагьарее ишлемишехьени мебель гьаъани «Майя» ташкилатни хааlрынкъус Абутlалиб Мурадовыс «Рутул районна доюкана инсан» до гьуво.
Мани ахтыйни доюс мана гьагуйни хайирхагьни ишихъа гора, инсанаршини аlрайл’на доствалла утlумауйс, районна социал-экономик вазият юг хъавъуйс, гьар вахтал’ инсанаршис кумаг гьаъыйс лайикьра къаджы.
Манчика багълыбанана кьарар районни хааlрынкъве июльни вузани санчил’ гьуво. Амма тентенейква ман до гьайни уlл’джуме манкъус тасдикьау.
Манчис къадсырни иджласе районни администрациейн ишчерше, Магьаlчкъалейнче ва россиейни акьаlнани вилаетбышейнче абыйни цlаlхбышди ишкар инсанарше иштыракау.
Районни хааlрынкъве маджлис аахъанкъаl увгьойн: «Рутул район республикайни марказыле акьаlнада водун. Къийна районейнче хаlбба доюкан ишкар инсанар джурабаджура джигабышее чалышмишоохьи вобунбы. Манбыше джони гьаlракатыка, баджарыхыква, гьаъани ишбышика йишди районын, республикайн до ахтывалей гьуваджен. Манбышда сайир Абутlалиб Мурадов ворна. Манкъве гьаъан хайирхагь ишбы йишди гыргынкъукlле ацlа водунбу. Гьинчиле сабара сенбына гьихъа районее девхьесда иш вухьа. Манке районын администрацие гёдхьун. Манчини джигее тезе бина алявъу. Абутlалибе джуни хаишиква махъан са хаlдни машинейдын мебель оlтирау. Манчиле савагьийда, манкъве йишди районе ешемишоохьени хаlббанани инсанаршис хыл’ авхъаахъа. Мани сардан районни администрациейн манкъус ахтына кьиймат гьооли».
Гойне хьинне Ибрагьим Ибргьимове Абутlалиб Мурадовыс таlрифын кагъыз хъуво, барака гьавъу.
А. Мурадове джуни ишбышис ахтына кьиймат гьувойхъа гора, районни хааlрынкъус миннатдарийвалла агъмишавъу. Геледжагъылид лазимни карее кумаг гьелес гьаlзирра ворнава увгьо.
Абыйни мигьманаршини доюле А. Мурадов ишкар Мамедов Рамазан Шаlъбанни духее табрикау. Манкъве А. Мурадове Челябинскни шагьарее вуккеккани ишике, манкъвее къеджени хайирхагьни заlгьматбышди гьаlкlее йишонхьа. Манкъус гьаъани ишбышее угъурбы аlрзулаимшау.
Мурадов Абутlалиб Рутул районни Хиягъни хивейнчена ворна. Манкъве гьинчиле сабара сенбына гьихъа Челябинскни шагьарее цlедда мебель саъан ташкилат къурмишау. Къийна са вахталийни кlыл’ни ташкилатыке, хаlдын фабрика хъыхьа. Гьаlшде мааъаб 500 авабкьырийн ишчер ишлемишоохьи. Манбышди аlрайл’ цlаlхбыб кlыл’ба дешинбы. Къийна «Майя» фабрикын къеккан мебель Уралыл’, Сибирыл’ делесни хаариджи оlлкабышее растына хъайлен.
Шаца оlлкее пандемие гибгъылыйнкъаl, инсанар маскlабы дена авху. Манчикена кеситийвалла вухьа. Магьаlбна вазият къавджимее, ташкилатын маскlабы ийхьва гидгъыл. Маскlабы инсанаршис, больницабышис, сабара социал ташкилатбышис кьаlрад битlалау. Манке Челябинск шагьарни хааlрынкъве Наталья Котовае А. Мурадовыс таlрифын кагъыз гьуво. Мани дагъамни вахтал’ манкъве Дагъыстаныб кlеливханавъу деш. Манкъве ватанылхъа гьеххаалика масlкабы оlтирау. Манчиле гъайре инсанаршис лазымын дарманбы алищесдимее кумаг гьуво.
А. Мурадовни хайирхагь ишбышихъад сергьат дешда. Манкъве ненкеджаб хайирхагьни ишбышди гьаlкlее йишонехьи деш.
Мана гьамыр «Нур» кlазетна гьаваскар ворна. Гьар сен кlазетис подписка гьаъа, манбы имкан дешди цlаlхбышис бытlалаъа.
«Нур» кlазетни редакциейн А. Мурадовус гьувойни шарафукани доюка табрик гьаъа. Манкъус джанана сагъвалла, угъурбы аlрзаъа, вуджее хаlбвалла гьааъани ташкилатыс хаlдын имканбы аlрзуламишаъа.
